ကၠောန်ဗဒှ် သဘၚ်ဟီုတွံပရေၚ်မန် အပ္ဍဲဍုၚ်သေံ

အဇာတာ – ရန်ကဵုဂကူမန် မစိုပ်ဍုၚ်သေံတံတုဲ နူဂကောံပရေၚ်ကေၚ်ကာမန် သ္ပသကိုပ်သကတုဲ ပ္ဍဲဂိတုဂျာန္နဝါရဳ ၂၀ ဏံ ကၠောန်ဗဒှ်သဘၚ်ဟီုတွံ ပရေၚ်မန် ပ္ဍဲဘာဝါတ်ခေါ် ဍုၚ်မဟ္ၚာဲရ။

ခမဳသၚ်မန် ၃၀ ဇကု ကေုာံ ပုရိသာတ် ၜိုတ် ၅၀၀ တၠပြၚ် တိုန်စိုပ်သဘၚ်ဟီုတွံဂှ်အိုတ်ရ။

“သွက်သၟာကမၠောန်မန် စိုပ်မံၚ်မဟ္ၚာဲဏံရ။ သာဲခြာမံၚ်ကဵု ဒေသဇကုလေဝ် လအ်လောန်ကွေံရ။ ဝၚ်မန်တြေံတံကီု၊ အကာဲအရာ ပရေၚ်ဍုၚ်ကွာန်လၟုဟ်ကီု၊ အကာဲအရာ ပရေၚ်ပိုန်ဒြပ်ကီု သဳကၠဳတုဲ ပါ်ပရအ်ဗဟုသုတမာန်ဏောၚ်” သာ်ဝွံ ညးမကၠောန်ဗဒှ် သဘၚ်ကၞာမွဲတၠ ဟီုရ။

ပ္ဍဲသဘၚ်ဟီုတွံဂှ်မ္ဂး ကဏ္ဍသၟာန်သွဟ် မပ္တံကဵု ပရေၚ်ပညာမန်၊ ပရေၚ်ကောန်ဍုၚ်အရၚ်မန်၊ ဝၚ်၊ လိက်ပတ်ယေန်သၞာၚ်၊ အကာဲအရာ ပရေၚ်ပိုန်ဒြပ် ဒေသမန်၊ အကာဲအရာ ကွးဘာတက္ကသိုလ်မန်လၟုဟ်တံလေဝ် ပါလုပ်ကီုရ။

ပ္ဍဲသဘၚ်ဟီုတွံဝွံ သကိုပ်စၞောန်ပ်ညုၚ် (တြေံ) နူဌာနထိၚ်ဒဝ် တၚ်သမ္တီကောန်ဂကူ နာဲမိုၚ်တဝ်၊ ဥက္ကဌ ဗော်ဒဳမဵုကရေဇြဳ အလုံရးမန် (AMDP) ကေုာံ သၞာဲဒါပရေၚ်ပညာတြေံ နာဲဇၞူမန် ကော် နာဲၚိုဲတိၚ်၊ တၠကမၠာန် ပရေၚ်ပိုန်ဒြပ်မန် နာဲဗညာသာန်ကေုာံ က္ဍိုပ်သကိုပ်ကွးဘာတက္ကသိုလ်မန် နူတက္ကသိုလ်မတ်မလီု မာံရာဇာ တံ ပါလုပ်အိုတ်ရ။

သအာၚ်နူဂှ်ပၠန် ကျာ်ဇၞော်အာစာ ဘဒ္ဒန္တပါလိတ နူဘာတိုက် ကွာန်ကၟာဝက် ပွိုၚ်ဍုၚ်မုဟ်ဍုၚ်လေဝ် ဟီုမြော်ဂလာန်သြဝါဒ ကီုရ။

ဝၚ်မန် ကေုာံ ဗီုကၟိန်ဍုၚ်မန်တံ စမံက်တိုန်ကၠုၚ်၊ အရေဝ်ဘာသာ မန်ခမာ ဗီုပြၚ်ဆက်စပ်၊ ဗီုကောန်ဂကူမန်တံ ဖျေံသဇိုၚ် ကၠောန်ကၠုၚ်ပရေၚ်ပိုန်ဒြပ် ကေုာံ ပရေၚ်အခိုက်ကၞာ ပြဝေဏဳ တၟေၚ်တၞဟ်ခြာတံဂှ် နာဲမိုၚ်တဝ် ဟီုတွံဏာရ။

အနာဂတ်ဏံ ပရေၚ်ပိုန်ဒြပ်မန် ဂွံအံၚ်ဇၞး သာ်လဵုဂကူမန်တံ ဒးကောပ်ကာဲစဳဇန်ဖန်ဖက်ကီု၊ ပရေၚ်ပတိတ်ဗၞိက် ပရေၚ်တိုပ်ဒေပ်တမ်ရိုဟ်တံကီုဂှ် တၠပရေၚ်ပိုန်ဒြပ်မန် နာဲဗညာသာန် ဍိုပ်က္ဍိုပ်သဳကၠဳဏာရ။

ပရေၚ်ဘဝသၟတ်မန် မစိုပ်ဘာတက္ကသိုလ်၊ ပရေၚ်ချဳဒရာၚ် ဗ္တောန်လိက်ပတ်မန် ဥတုက္ညၚ်၊ ပရေၚ်ဂၠာဲသြန်ဗွဝ် ထံက်ပၚ်ပရေၚ်ပညာ ကေုာံ ပရေၚ်ဂဥုဲၜူမာဲ ပြးထၞာန်မံၚ် အပ္ဍဲတွဵုရးမန်တံဂှ် သၟတ်မန်တံ ညံၚ်ဂွံဝေၚ်ပဲါလေပ်တံဂှ် က္ဍိုပ်သကိုပ်ကွးဘာတက္ကသိုလ်မန် မာံရာဇာ သောၚ်ကလး ပတိုန်ထ္ၜးဏာရ။

သၞာဲဒါပရေၚ်ပညာတြေံ နာဲဇၞူမန်ဂှ် စပ်ကဵုပရေၚ်ဆဵုဂဗညး ပွိုၚ် ၄၀ သၞာံ ဃောကေၚ်ယိုၚ်ဂၠေၚ်ကၠုၚ် တာလျိုၚ် ပ္ဍဲဌာနပရေၚ်ပညာဂှ် ဟီုသောၚ်ကလးဏာတုဲ သာ်လဵုကောန်ၚာ်တံ ဂွံဗ္တောန်ပညာ ကေုာံ အကာဲအရာ ပရေၚ်ပညာကောန်ဍုၚ်အရၚ်တံဂှ်လေဝ် ပတိုန်ထ္ၜးဏာကီုရ။

“တ္ၚဲဏံ ဂွံကလၚ်ဏာ ပရေၚ်မန်၊ ဝၚ်၊ ပရေၚ်ပိုန်ဒြပ်၊ ပရေၚ်ကွးဘာတက္ကသိုလ်မန်တံဂှ် ဍိုက်ဍိုက်ပေၚ်ပေၚ်တုဲ ပတိုန်ၚုဟ်မး ဟွံမာန်ရ။ ပရေၚ်ဟီုတွံဗီုဏံ အကာဲအရာကဵုကၠုၚ်တှေ် ထေက်ကဵု ဒးဆက်ကၠောန်ဏောၚ်” သာ်ဝွံ သၟတ်မန် မတိုန်စိုပ်သဘၚ်ဟီုတွံဂှ်မွဲတၠ ဟီုရ။

သဘၚ်ဟီုတွံ ပရေၚ်မန်ဝွံ ပ္ဍဲဂိတုဂျာန္နဝါရဳ ၁၇ ဂှ် ပ္ဍဲ ဍုၚ်သဳရိရာချာ (Sriracha)၊ ခရိုၚ်ၛာန်ပူရဳ (Chonburi) ကီု၊ ပ္ဍဲ ၂၁ ဂှ် ပ္ဍဲဇြူရာတ်ဌာနဳကီု ကၠောန်ဗဒှ်ကၠုၚ်တုဲ ပ္ဍဲ ၂၂ ဂှ် ပ္ဍဲဍုၚ်ပူကေတ် ကေုာံ ပ္ဍဲ ၂၃ ဂှ် ပ္ဍဲခရိုၚ်ဖါန်ၚ ဆက်ကၠောန်ဗဒှ်အာရ။

လောန်ကၠုၚ် ပ္ဍဲဂိတုအံက်တဝ်ပါ ၂၆၊ သၞာံ ၂၀၁၂ ဂှ် ဂကောံဒက်မိတ် ကောန်ဂကူမန် ဍုၚ်သေၚ်ကာပေါဝ် (Mon Friendship Association Singapore) သ္ပသကိုပ်သကတုဲ ကၠောန်ဗဒှ်ကၠုၚ် သဘၚ်ဟီုတွံ ပရေၚ်မန် ပ္ဍဲဍုၚ်သေၚ်ကာပေါဝ်တုဲ ပ္ဍဲ ၂၈ ဂှ် ဆက်ကၠောန်ဗဒှ်ကၠုၚ်လဝ် ပ္ဍဲဍုၚ်မလေဝ်ယှာပၠန်ရ။