မာံသုတ – ၜိုန်ရအလဵုအသဳဗၟာတံ ဟီုလလောၚ်လဝ် ဒေံါပၞာန်ပ္ဍဲဒေသလဂျာယာန် တိဍာ်ကချေၚ်ကီုလေဝ် ဒပ်ပၞာန်ဗၟာတံ ပတိုန်အသိၚ် ဆက်ဗတိုက်ဒၟံၚ်ပၞာန်ဂှ် တုပ်တဴညံၚ်ရဴ နာဇြဳတံ ပရးဝါဒရောၚ် သာ်ဝွံ ဌာနလလောၚ်ပရိုၚ် ကံၚ်ဇြဳဖက်ဒရေဝ် ဂကူကောန်ဍုၚ်အရၚ် ညဳသၟဟ် UNFC ဟီုဏာ ပ္ဍဲဂိတုဂျာန္နဝါရဳ ၂၀ ရ။
“ဆက်ဒှ်မံၚ် ပေဲါဗတိုက်ဖိုဟ်။ စၞောန်ဟွံစိုပ်ကၠုၚ် မုက်ပၞာန်ဏီရောၚ်လေဝ် ဟီုမံၚ်နွံရ။ ဒပ်ပၞာန်အလဵုအသဳ ဒေံါပၞာန်ဏောၚ်ဂှ် လီဠာန်ပရးမံၚ်ဝါဒတုဲ ဆက်ဗတိုက်မံၚ်ပၞာန်ဂှ် တုပ်ကဵု နာဇြဳတံ ကၠောန်သ္ပမံၚ် ပ္ဍဲလက်ထက်ပၞာန်ဂၠးကဝ်ဒုတိယတေံရ” သာ်ဝွံ ညးဟီုရ။
ကြဴနူအလဵုအသဳဗၟာ လလောၚ်ပရိုၚ် ပ္ဍဲဂိတုဂျာန္နဝါရဳ ၁၈ ဂှ်တုဲ ဆက်ကၠောန်အာ စဵုကဵုကလိဂွံ ပရေၚ်ၜိုဟ်လလမ် ဍာံဍာံပြပြရောၚ်၊ ပြဟ်ပြဟ်ဏံ သအာၚ်နူ KIO/KIA တုဲ ထပက်စၟတ်တဲ ဒေံါပန်ပှော်ကဵု ဂကောံရပ်လွဟ် ကောန်ဍုၚ်အရၚ် ၁၀ ဂကောံတုဲ ပ္ဍဲသၞာံ ၂၀၁၃ မံက်ဏံဂှ် ပလေဝ်ပလေတ်လဝ် သွက်ဂွံတက်ကျာသဳကၠဳ ပရေၚ်ဍုၚ်ကွာန်ရောၚ်ဂှ် သမတ ဥူတိၚ်သိၚ် ဟီုကၠုၚ်လဝ်ဂလာန် နွံရ။
ပရေၚ်ဒေံါပၞာန် ဒပ်ပၞာန်ဗၟာတံဂှ် ဒေံါပ္ဍဲဒေသလဂျာယာန်သၟးဟွံသေၚ် ထေက်ကဵုဒးဖအောန်ဖျေံ ပရေၚ်ထပက်ပၞာန် အလုံဒေသကချေၚ်မွဲတုဲ စၟဳကေတ်လဝ် ဆက်ဓမံက်အာ အကာဲအရာလအာခိုဟ်ခိုဟ်မာန်ရောၚ်ဂှ် ပ္ဍဲဂိတုဂျာန္နဝါရဳ ၂၀ ဏံ ကမ္မတဳဗဟဵု KIO ပတိတ်လဝ်လိက်လလောၚ်တြး နွံရ။
ပ္ဍဲဂလာန် သမ္မတဥူတိၚ်သိၚ်ဂှ် “ကမၠောန်ပရေၚ်ၜိုဟ်လလမ်ဏံဂှ် သကုတ်က္ဍိုပ်သကိုပ်သၟး ဆၜိုတ်ထပက်စၟတ်တဲ၊ ဆၜိုတ်ဆက်မိတ်ဂြဲတဲသၟး ဟွံရုမ်ဂပ်ပုဟ်။ သွက်ပရေၚ်ၜိုဟ်လလမ် ဂွံအံၚ်ဇၞးဂှ် ညးဍုၚ်ကွာန်တံလေဝ် ဒးပါလုပ်ထေက်ရ။ တၚ်တုပ်စိုတ် က္ဍိုပ်သကိုပ်တံ ညံၚ်ဂွံစိုပ် ညးဍုၚ်ကွာန်တံမာန်ဂှ် အခန်ကဏ္ဍဂကောံပြဝါမၞိဟ်၊ ဂကောံမဟာဇန်တံလေဝ် ပၟိက်ဇၞော်ဗွဲမလောန်ရောၚ်” သာ်ဝွံလေဝ် ပါလုပ်ရ။
ပ္ဍဲဂိတုဒဳဇြေမ်ပါ ၁၀၊ သၞာံ ၂၀၁၁ ဂှ် သမ္မတ ဥူတိၚ်သိၚ် ကဵုလဝ်စၞောန်ကဵု ညးဍိုက်က္ဍိုပ် ပရေၚ်စဵုဒၞာ သအာၚ်နူစဵုဒၞာ ဇကုဇကုတုဲ သွက်သ္ဂောံဒေံါထောံ ပရေၚ်ထပက်ပၞာန် ပ္ဍဲဒေသကချေၚ်ကီုလေဝ် ပေဲါဗတိုက်ဆက်ကတဵုဒှ်ဒၟံၚ်ဏီရ။
“သီု KIO သီု UNFC ဂွံဒှ်ပေဲါတက်ကျာသဳကၠဳဂှ် တန်တဴမံၚ်ကဵု လပါ်အလဵုအသဳရ။ KIO ဂှ် ဒှ်မံၚ်ကောန်ဂကောံ UNFC ဏောၚ်။ ဒပ်ပၞာန်ဗၟာတံ ဍိုက်ဗတိုက်မံၚ် KIO မွဲဓဝ်။ ပေဲါဗတိုက်ဆက်ဒှ်မံၚ် အတိုၚ်ဏံရတှေ် မွဲလပါ်ကဵုမွဲလပါ် ဓရ်ပတှေ်အောန်မံၚ်ဏောၚ်” သာ်ဝွံ သဝ်ဒေဗေတ် တာကပဝ် ဟီုရ။
ၜိုန်ရဂကောံလလောၚ်ပရိုၚ် အလဵုအသဳဗၟာတံ လလောၚ်လဝ်ပရိုၚ် ဒေံါပရေၚ်ထပက်ပၞာန်ကီုလေဝ် ပ္ဍဲဒေသကချေၚ်ဂှ် ပေဲါဗတိုက်ဆက်ကတဵုဒှ်မံၚ် သကာတ်သကာတ်မြဟ်မြဟ်ဖိုဟ်ရ။