မိကျေဝ်ဂေါဝ် – သွက်သ္ဂောံကလေၚ်ပံက်ကဵု ပရေၚ်ပိုန်ဒြပ် ပ္ဍဲဍုၚ်ဗၟာဂှ် ဗော်ဒဳမဝ်ကရေဇြဳ အလုံရးမန် အာတ်ဏာ သမဂ္ဂယူရောပ်ရ။

ဥက္ကဌ ဗော်ဒဳမဝ်ကရေဇြဳ အလုံရးမန် နာဲဇၞူမန် (ကော်) နာဲၚိုဲတိၚ်

ပ္ဍဲဂိတုမာတ်ချ် ၁၅ ဂှ် က္ဍိုပ်သကိုပ် ဗော်ဒဳမဝ်ကရေဇြဳ အလုံရးမန် နာဲဇၞူမန် (ကော်) နာဲၚိုဲတိၚ် မွဲဟာန်ကေုာံ က္ဍိုပ်သကိုပ် ဗော်ပရေၚ်ဍုၚ်ကွာန်တၞဟ်တံ ဆဵုဂဗကဵု ကလုတ်သမဂ္ဂယူရောပ်တုဲ သဳကၠဳတဴ ပရေၚ်ကိစ္စကၟာတ်ပရေၚ်ပိုန်ဒြပ်ရ။

ပ္ဍဲကာလသဳကၠဳဂှ် နူသမဂ္ဂ ယူရောပ် ညးစၞး ၜိုတ် ၂၀ တၠ ပါလုပ် တုဲဗော်ပရေၚ်ဍုၚ် ကွာန်မိက်ဂွံကဵုကလေၚ်ပံက် ပရေၚ်ပိုန်ဒြပ် ဍုၚ်ဗၟာဗော်ဒဳမဝ် ကရက်တေတ် သေံ၊ ဗော်ဖောအ်ဗြေဝ်တဴတက် ကောန်ဍုၚ်အရၚ် ယခေၚ်၊ ဗော်ဒဳမဝ်ကရက်တေတ် (ဗၟာ) ၊ ဗော်ဂကောံဇြဟတ် ဒဳမဝ်ကရေဇြဳ ကောန်ဂကူ ကေုာံ ဗော်ဒဳမဝ်ကရေဇြဳ အလုံရးမန်တံ ပါလုပ်အိုတ်ရ။

“ယဝ်ကၟာတ်ပရေၚ်ပိုန်ဒြပ်တှေ် ညးဍုၚ်ကွာန်တံ အောန်ကဵုဂၠိုၚ် ဒးဒုၚ်ဇီုကပိုက်တွဵုရ။ ဟိုတ်ဂှ်ရ ကၟာတ်လဝ်ပရေၚ်ပိုန်ဒြပ်ဂှ် ညံၚ်ဂွံကလေၚ်ပံက်ကဵု ပိုဲဒးအာတ်မိက်” သာ်ဝွံ ညးအုပ်ကာနာနာ ဗော်ဒဳမဝ်ကရေဇြဳ အလုံရးမန် ဒံက်တာမာံနာဲသဵု ဟီုရ။

ဟိုတ်နူကၟာတ်လဒဵုလဝ် ပရေၚ်ပိုန်ဒြပ် ဍုၚ်ဗၟာတုဲ ညးဍုၚ်ကွာန်တံဟေၚ် ဒးဒုၚ်ဇီုကပိုက်ရောၚ်၊ ၜိုန်ဂှ်လေဝ် လၟိဟ်လဵု ဂလိုၚ်လဵု ဒးဒုၚ်ဇီုကပိုက် ဂွံဟီုချိုတ်ချိုတ်ပၠိုတ်ပၠိုတ်မာန်ဂှ် ဝါတ်ဂါတ်ကွေံရောၚ် ဒံက်တာမာံနဲသဵု ဟီုရ။

“ယဝ်ရ ဂွံအခေါၚ်ကူသာန်သွံရာန် ဗၠးဗၠးၜးၜးတှေ် သွက်ညးဍုၚ်ကွာန်တံ ဒှ်ဂုဏ်ဖဵုဏောၚ်” သာ်ဝွံ ညးဆက်ဟီုရ။

ၜိုန်ရဗော်ဒဳမဝ်ကရေဇြဳ အလုံရးမန် ညာတ်ကေတ်လဝ် သာ်ဂှ်ကီုလေဝ် ဟိုတ်နူကၟာတ်လဝ်ပရေၚ်ပိုန်ဒြပ် ဍုၚ်ဗၟာတုဲ ညးဍုၚ်ကွာန်တံ ဟွံဒးဒုၚ်ဇီုကပိုက်ရောၚ်ဂှ် ကေၚ်ကာဗဟဵု ဗော်ဍုၚ်မန်တၟိ နာဲတၠညး ဟီုရ။

“ညးဍုၚ်ကွာန်တံ ဝါတ်ဒိုက်မံၚ်ဂှ် ဟိုတ်နူဍုၚ်သအာၚ်တံ ကၟာတ်လဝ်ပရေၚ်ပိုန်ဒြပ် လတူဍုၚ်ဗၟာ ဟွံသေၚ်ပုဟ်၊ ဍုၚ်ပိုဲဂှ် သယံဇာတ ဂၠိုၚ်ကွေံကွေံ။ ဍေံတံ အုပ်ဓုပ်ကောပ်ကာဲ ဟွံလေပ်ဏောၚ် ညးဍုၚ်ကွာန်တံ ကမၠောန်ကၟိတ် ဟွံမွဲတုဲ ဂွံဒိုက်ဝါတ်မံၚ်။ မုလေဝ် ဟွံဆေၚ်ကဵု ကၟာတ်ပရေၚ်ပိုန်ဒြပ်ပုဟ်” သာ်ဝွံ နာဲတၠညး ဟီုရ။

နကဵုသမဂ္ဂ ယူရောပ် ကလေၚ်ပံက်ကဵု ပရေၚ်ပိုန်ဒြပ် ဒှ်ဟွံမာန်ရောၚ် ညးညာတ်ကေတ်ရ။

သမဂ္ဂ ယူရောပ်ဂှ် ကၟာတ်လဒဵုလဝ် ညံၚ်ဟွံဂွံသွံကဵု လွဟ်လက်နက်ကဵု ဍုၚ်ဗၟာ၊ ကၟာတ်လဒဵုလဝ် အခေါၚ်လုပ်ဍုၚ် ကုကောန်ဂကောံအလဵုအသဳ ကေုာံ ညးမစုက်လုပ်ကဵု အလဵုအသဳဂမၠိုၚ်၊ ကၟာတ်လဒဵုလဝ် မတ်မၞိက် ဆုကၠ အခေါၚ်ပလံၚ်ပတိတ်ဍုၚ်မ္ၚးတံရ။