သၞာံ (၂၀၁၈) ဏံ ခြာဟွံလအ် သွက်ဂွံအိုတ်အာ စိုပ်ဒတုဲတုဲ သၞာံ (၂၀၁၉) ဂှ် ညောန်ကြပ်ကၠုၚ်ရ။ ပ္ဍဲကဵုသၞာံ (၂၀၁၉) ဏံ ပ္ဍဲကဵုဂကူမန်ပိုဲ ယဝ်ရ ဟီုပရူဗၠးၜးဂကူရောၚ် ဟီုမ္ဂး အဓိက အကာဲအရာပရေၚ်ၜိုဟ်လလံ မကတဵုဒှ်မံၚ် အခိၚ်တ္ၚဲဏံဂှ်တုဲ သာ်လဵု ဂွံပလေဝ်စဂှ်ကီု လတုဲ သွက်ပေဲါရုဲမာဲ (၂၀၂၀) တေံကီုဂှ် သာ်လဵု ဂွံပလေဝ်စဂှ် ပၟိက်ဇၞော်ကွေံရောၚ်။
မ္ၚးနူကဵု ပရေၚ်ဍုၚ်ကွာန်တုဲ ပရေၚ်ကောန်ဂကူတၞဟ်ဟ်တံလေဝ် ပိုဲတံ ဒးကၠောန်တဴ နွံတဴ တၟာဂလိုၚ်ဏီရောၚ်။ ပရေၚ်ပညာ ကောန်ဂကူမန်ပိုဲ သာ်လဵု ဂွံခိုဟ် အဆံၚ်ဂွံသၠုၚ်တံဂှ်လေဝ် ဒးကၠောန်တဴဒၟံၚ်ဏီ။ ဆဂး ပရေၚ်ဆိုအ်ဗဒၟံၚ် စပ်ကဵုပရေၚ်ပညာသၟတ်တံဂှ် ဂဥုဲၜူမာဲတံဂှ် သာ်လဵု ဂွံဗတိုက်သရိုဟ်အာရော။ ပရူဏံလေဝ် ပၟိက်ဇၞော်ကွေံရောၚ်။ မ္ၚးနူဂှ်ပၠန် ပ္ဍဲကဵုအကာဲအရာ ဒေံါဒၟံၚ်ပန်ပှော် ဂွံလဝ်ပရေၚ်ၜိုဟ်လလံ ညိညဏံ ပရေၚ်ပိုန်ဒြပ် ဂကူပိုဲ ညံၚ်ဂွံစိုပ် ပ္ဍဲတဲပိုဲ ပၟိက်ဇၞော်ကွေံရောၚ်။
ကိုပ်ကၠာအိုတ် သဳကၠဳအာ ပရေၚ်ၜိုဟ်လလံ ကၠာရောၚ်။ အကာဲအရာ ပရေၚ်ၜိုဟ်လလံ ပ္ဍဲသၞာံ (၂၀၁၉) ဏံ ကၠာရောၚ်။ အကာဲအရာပရေၚ်ၜိုဟ်လလံ သွက်သၞာံ (၂၀၁၉) ဏံဂှ် စဵုကဵုခိုဟ်ကွေံကွေံ ဟွံသေၚ်ရောၚ်။ ဒပ်ပၞာန်ဗၟာတံဂှ် ပရေၚ်ၜို်ဟ်လလံဏံ သွက်ဂွံလီုလာ်ဟေၚ် ဍေံတံ ချပ်ဖန်က်ဒၟံၚ်ရောၚ်တုဲ ကောန်ဍုၚ်အရေၚ်တံ အေၚ်ဒုၚ်ဟွံမာန် ပရေၚ်ၜိုဟ်လလံတံဂှ် ဍေံပရေံစှေ်အာဒၟံၚ်ရောၚ်။ လတူ ဒပ်ပၞာန်ဗၟာတံဂှ် အလဵုအသဳအေန်အေဝ်ဒဳ (NLD) ဂှ် မုလေဝ် ဟီုဂးကဵု ဟွံမာန်ရောၚ်။
လၟုဟ်မ္ဂး သွက်ဂွံတက်ကျာ ကုဂကောံရပ်လွဟ်ပၠန်ဂတး ရဲသၟဝ်ကျာတေံတုဲ ဒပ်ပၞာန်ဗၟာတံ ဒေံါပန်ပှေ်ာ ဗၞတ် (၄) ဂိတုရောၚ် လလောၚ်တြးလဝ်ရ။ မွဲအခိၚ်ဓဝ် ဒပ်ပၞာန်ဗၟာတံ အာဗတိုက်ဒၟံၚ် ဒပ်သပုန်ရခေၚ်တေံပၠန်တုဲ အကာဲအရာ ပရေၚ်ၜိုဟ်လလံဂှ် ဒးစွံသတိဇၞော်ကဵုဒြဟတ်ရောၚ်။ ဒပ်ပၞာန်ဗၟာတံဂှ် မွဲအခိၚ်ဓဝ် လုပ်အာဗတိုက်ဒၟံၚ် ပ္ဍဲကဵုတိဍာ်ကရေၚ်တံလေဝ် နွံမံၚ်ကီုရ။
ဒပ်ပၞာန်ဗၟာတံ ဗီုလဵုသဳကၠဳပရေၚ်ၜိုဟ်လလံကီုလေဝ် ညံၚ်ဟွံဂွံလုက်စုက်ဒးအာ သၞောတ်ဝ်ဒက်ပတန်ဍုၚ် (၂၀၀၈) ဂှ် ဍေံစဵုလဝ်တုဲ အလုံဂကူမန်ပိုဲ ကေၚ်ပတိုန်ထ္ၜးလဝ် စပ်ကဵု မူဒက်ပတန်ဍုၚ်ဖေဝ်ဒရေဝ်ကီု သွက်ဂွံဒက်ပတန်အာ သၞောတ်ဝ်တွဵုရးညးကဵုညးဂှ် ဍေံဒှ်ဝါတ်ညိရောၚ်။ ဟိုတ်ဂှ်ရ ပရေၚ်တက်ကျာ ပရေၚ်ၜိုဟ်လလံအခိၚ်တ္ၚဲဏံဂှ် ဍေံဆိုအ်ဗဒၟံၚ်တုဲ သာ်လဵု ဂွံတတ်ၜက်အာ ပ္ဍဲကဵုသၞာံ (၂၀၁၉) ဏံဂှ် ဂကူပိုဲသၟးဟွံသေၚ် အလုံကောန်ဍုၚ်အရေၚ်တံ သွက်ဂွံသဳကၠဳတက်အာကျာဂှ် ပၟိက်ဇၞော်ကွေံရောၚ်။
လၟုဟ်မ္ဂး ဗော်ပရေၚ်ဍုၚ်ကွာန်မန် အပ္ဍဲဍုၚ်တေံ ကောံကလောံညးသကအ် ဒှ်အာမွဲရ ဂးတုဲ ပေဲါရုဲမာဲ သၞာံ (၂၀၂၀) တေံဂှ် ပၟိက်ဇၞော်တဴ ဗွဲမလောန်ရောၚ်။ သွက်ဂွံဇၞးပေဲါရုဲမာဲ (၂၀၂၀) တေံ သွက်ဂွံကလိဂွံခုၚ် ပ္ဍဲကဵုအလဵုအသဳတွဵုရးဍုၚ်မန်ကီု ကၠတ်ထဝ်တွဵုရးဍုၚ်မန်ဂှ် ပၟိက်ဇၞော်ကွေံတုဲ စနူကဵုအခိၚ် (၂၀၁၉) ဏံ စတုဲ ဒးပ္လေဝ်ပ္လေတ်အာဂှ် ဒးဖျေံလဝ် လၟေၚ်ကမၠောန်ရောၚ်။
ပ္ဍဲကဵု သၞာံ (၂၀၁၉) ဏံဂှ် သွက်ဗော်မန် (ဗော်ညဳသၟဟ်ဂကူမန်) ဂှ် ဒှ်အခိၚ်ဒက်ပတန်သၟးဟွံသေၚ်၊ သီုကဵု ဒှ်အခိၚ်ပရေၚ်စန်ဒက် ညးဍုၚ်ကွာန်တံရောၚ်။ အဓိက ညးဍုၚ်ကွာန် ဂကူမန်ပိုဲ ညးဟွံမွဲကဵု ဓရ်ပတှေ် လတူဗော်ပရေၚ်ဍုၚ်ကွာန်မန်တံရောၚ်။ အခိၚ်တေံ ဂကူမန်ပိုဲ ထံက်မံၚ်ဂလာန် ကုဗော်ကောန်ဂကူတၞဟ်ဟ်တံဂှ် ဒးက္လေၚ်စန်ဒက်ပတိုန်တုဲ သွက်ဂွံထံက်ဂလာန် ဗော်မန်ဂှ် ဒးဟီုဂးလဝ်ရောၚ်။
မ္ၚးနူကဵု ကမၠောန်ပရေၚ်ဍုၚ်ကွာန် ဗော်ပရေၚ်ဍုၚ်ကွာန်တံတုဲ ပရေၚ်ညဳသၟဟ်သွက်အလုံဂကူမန် သွက်ဂွံဒက်ပတန်တို်န်ဂှ် ပၟိက်ဇၞော်ရ။ အပ္ဍဲကဵု ဂကူမန်မ္ဂး ဗော်ဍုၚ်မန်တၟိ (ဒြဟတ်ရပ်လွဟ်ပၠန်ဂတး)၊ ဗော်မန် (ဝါ) ဗော်ညဳသၟဟ်ဂကူမန် ဒှ်ဒြဟတ်ပရေၚ်ဍုၚ်ကွာန် အပ္ဍဲဍုၚ်၊ ကေုာံ ဒြဟတ် သၚ်/မဟာဇန် ညးဍုၚ်ကွာန် အလုံမွဲဂၠးကဝ်ဏံရ။ ဒြဟတ်ပိဒြဟတ်ဏံ ဂွံညဳသၟဟ်ညဳသာဂှ်လေဝ် ဒးဂိုတ်ဂစာန်အာ ပ္ဍဲသက္ကရာဇ် (၂၀၁၉) ဏံရောၚ် ပတိုန်ထ္ၜးဏာကီုရအဴ။
One reply on “သၞာံ (၂၀၁၉) ဏံ မုဂကူပိုဲ တာလျိုၚ်နွံရော?”
ပရိုတၟိတၟိဟွံပတိုန်ပုဟ်ဟာ