ကရောၚ်ပၞာန်ဒပ်ကမ္မယှေန်ပၞာန် မလုပ်စိုပ်ကၠုၚ် ကြပ်ကွာန်ကျာ်ပိ၊ ပွိုၚ်ဍုၚ်ဍာ်ဗု၊ ရးတၞၚ်သဳဂှ် စံၚ်ဂစိုတ်ထောံ ညးတြုံဒေသ (၁) တၠတုဲ ညးတြုံ (၁) တၠပၠန်ဂှ် ရပ်ကော်ဏာလဝ်ရောၚ် ဂွံတီကေတ် နူဂကောံဒပ်ပၠန်ဂတးတံရ။
ဂိတုနဝ်ဝေမ်ဗာ စၟတ်တ္ၚဲ (၁၁) တုဲကၠုၚ်ဏံ အခိၚ်သဝ်တ္ၚဲ ၜိုတ် (၄) နာဍဳဂှ် ကရောၚ်ပၞာန်ကမ္မယှေန်ပၞာန် လၟိဟ်ဇြဟတ်ကဵုစှ်တံ လုပ်စိုပ်ကၠုၚ် ဇရေၚ်ကွာန်ကျာ်ပိရ။
ယၚ်ကရောၚ်ပၞာန်ဂှ်ဝွံ ဖျေံဒပ်ပ္ဍဲကၠအ်ထ္ၜိုတ်မွဲ အကြာကွာန်အံၚ်ဇၞးကဵု ဠအ်တိုၚ် ကြပ်ကွာန်ကျာ်ပိ ရပ်လဝ်ညးတြုံ (၂) တၠတုဲ ညးတြုံ (၁) တၠဂှ် စံၚ်ဂစိုတ်ထောံလဝ်ရောၚ် ညးတာလျိုၚ် နဲဗျူဟာ (၃၃) ၊ ဌာနရးပၞာန်တၟေၚ် PDF ကိုဝ်သဝ်ဒါကိုဝ် ဟီုရ။

“ဒှ်အာဂှ်တှေ် ဒၞာဲအကြာကျံက်ကဒေန်ကဵု ဠအ်တိုၚ်ရ။ အေဒၞာဲဂှ် သ္ၚိကၟိန်မၚ်မံၚ်ကၠအ်နွံရ။ ဍေံတံလုပ်ကၠုၚ်တုဲ ရပ်ညးတြုံၜါတၠရ။ မွဲတၠဂှ်တှေ် စံၚ်ဏာဂျိုၚ်ဂျိုၚ်ရ။ သီုစံၚ်သ္ၚိရ။ သှေ်မွဲတၠဂှ်တှေ် ဂြောပ်စုတ်မုက်တုဲ ကော်ဏာရ” သာ်ဝွံ ကိုဝ်သဝ်ဒါကိုဝ် ဟီုရ။
ညးတြုံၜါတၠဂှ် ဒှ်ဂကူကရေၚ်တုဲ ဒှ်ညးဂှ်ရောဟီုဂှ် ဟွံဂွံတီကေတ်ဏီရောၚ် ညးတာလျိုၚ် ဂကောံဒပ်စဵုဒၞာညးဍုၚ်ကွာန်ကာန်ပံက် ကိုဝ်အံၚ်ပါန် ဟီုရ။
“ဒၞာဲဂှ်ဂှ် ကြပ်ကွာန်ကျာ်ပိရ။ ဂကူကရေၚ်ၜါတၠဂှ် စကစတံ ကၠုၚ်ရပ်ရ။ ပ္ဍဲကဵုၜါတၠဂှ်တှေ် မွဲတၠဂှ် စံၚ်ဂစိုတ်ထောံရ။ မွဲတၠဂှ် ဍေံတံ ရပ်ဏာရ” သာ်ဝွံ ကိုဝ်အံၚ်ပါန် ဟီုရ။
ကရောၚ်ပၞာန် နူတမ်ဒပ်ကမ္မယှေန်ပၞာန် ဖျေံသဇိုၚ်ဍုၚ်ဍာ်ဗုဂှ်ဝွံ ချဳဓရာၚ်အာကၠုၚ်ဒၟံၚ် အပ္ဍဲကွာန်ဍာ်ဂမ္တဴ၊ ကွာန်အံၚ်ဇၞး၊ ဠအ်တိုၚ်ကဵု သာယာမန်တုဲ ကၠောန်သ္ပမံၚ် ပရေၚ်စၟဳစၟတ်သၟာန်သၟုက် ညးဒေသတံရဂှ်လေဝ် ဂွံတီကေတ်ရ။
ယၚ်ကရောၚ်ပၞာန်ကမ္မယှေန်ပၞာန်ဂမၠိုၚ်ဂှ်ဝွံ ဒပ်ပံၚ်ကောံပၠန်ဂတးတံ ဗ္တိုက်ကဵုမာၚ်ကီု ကြတ်ဗ္တိုက်ကီုနွံတုဲ ပရေၚ်ဒးဘဲဝပ်ချိုတ်ဂျိုၚ်ၜါလ္ပာ် နွံရဂှ်လေဝ် ဂွံတီကေတ်ရ။
