တဆိပ်ဒပ်ပၞာန်စဵုဒၞာၜိုဟ်လလံကောန်ဂကူမန်

ဌာန်ပရိုၚ်ဗၠးၜးမန် – ဒပ်ပၞာန်စဵုဒၞာ ၜိုဟ်လလမ် ကောန်ဂကူမန် ဃောပကောံပကေဝ်မံၚ်ဇြဟတ် သွက်သ္ဂောံပြံၚ်လှာဲ အယောၚ်အလာ ဒပ်ပၞာန်စဵုဒၞာကွာန်ဂှ် ဗက်မံၚ်အကံက်အခေါန် အကြာသၟာပရေၚ်ပိုန်ဒြပ်တံရောၚ် သ္ဂောံတီကေတ်ရ။

နာဲယှံၚ် ကိုပ်ကၠာတေံ ညးမဍိုက်က္ဍိုပ် ဒပ်ပၞာန်ရာမည ဗွဲကြဴ ပ္ဍဲသၞာံ (၂၀၀၉) လုပ်ပံၚ်ကဵု က္ဍိုပ်နာဲအံၚ် ဒပ်ပၞာန်စဵုဒၞာ ၜိုဟ်လလမ် ကောန်ဂကူမန်တုဲ မဒှ် ဒုဥက္ကဌဂှ်ဝွံ လၟုဟ် ကောန်ဂကောံညးတံ ဗက်မံၚ်အကံက်အခေါန် အကြာသၟာပရေၚ်ပိုန်ဒြပ် မၞုံအပ္ဍဲပွိုၚ်ဍုၚ်ပါ်လၟိုၚ် ပွိုၚ်ဍုၚ်ရေဝ်ရ။

ဂကောံဂှ်ဝွံ ဗက်မံၚ်အကံက် အပ္ဍဲတၠဖုၚ်ကဝ်လက်သေံ၊ တၠစက်သ္ၚု၊ တၠစက်ဆုဂမၠိုၚ်တုဲ တၠဖုၚ်ကဝ်လက်သေံမွဲတၠမ္ဂး မွဲကိုဋ်ဒကေဝ်၊ တၠစက်ဆု တၠစက်သ္ၚုမွဲတၠမ္ဂး မသုန်လက်ဒကေဝ် ဒးကဵုမံၚ်ဂကောံညးတံရောၚ် တၠဖုၚ်ကဝ်လက်သေံမွဲတၠ ဟီုရ။

“ညးတံ ကၠုၚ်ဗက်အကံက် ကဵုကယျိုၚ်ပၞာန်ညးတံ။ ညးတံကံက်ဂှ် ဟွံတုပ် ညးသကအ်ပုဟ်၊ ယဝ်မၞိဟ်ဍုက်ကေဝ်ကဵုညးတံတှေ် ဒးကဵုအောန်ညိ” သာ်ဝွံ တၠဖုၚ်ကဝ်လက်သေံ နူကွာန်တံၚ်ပါရၚ်မွဲတၠ ဟီုရ။

ဂကောံညးတံဝွံ အတိုၚ်အလဵုအသဳပၞာန် အာတ်မိက်လဝ် သွက်သ္ဂောံသ္ပ ဒပ်ပၞာန်စဵုဒၞာကွာန်ဂှ် ဗက်ပကောံပကေဝ်မံၚ် ကောန်ဂကောံ အကြာသ္ဂံၚ်ဒေါံဇူ နူဗော်ဍုၚ်မန်တၟိ ကေုာံ ညးမပၠုပ်မၞိဟ်ဍုၚ်သေံတံရောၚ်ဂှ် ညးမတီညာတ်မွဲတၠ ဟီုရ။

ဂအာၚ်တိ မ္ၚးကွာန်တံၚ်ပါရၚ် မၞုံကဵုတၠ လ္ၚဵုတံဂှ်လေဝ် ဂကောံညးတံ သီကေတ်လဝ် နွံကီုရောၚ် ကောန်ကွာန်တံၚ်ပါရၚ်မွဲတၠ ဟီုရ။

“ညးတံ သီဂှ် ဂအာၚ်တိ မ္ၚးကွာန် ဂၠံၚ်အာလၟိုၚ်တေံ၊ ညးတံ ဂွံနၚ်အမိၚ် နူဒပ်ပၞာန် ဍုၚ်ရေဝ်တုဲယျရောၚ် ညးတံဟီု၊ တၠတိ ဒးဒုၚ်သီတံဂှ်လေဝ် ဂွံတေၚ်ကဵု ညးလဵုရောဂှ် ဒှ်မံၚ်အခက်အခုဲဖိုဟ်” သာ်ဝွံ ကောန်ကွာန်တံၚ်ပါရၚ်ဂှ် ဟီုရ။

ဂကောံညးတံဝွံ ဗက်ပကောံပကေဝ်မံၚ် ကောန်ဂကောံတၟိ ပ္ဍဲပွိုၚ်ဍုၚ်ရေဝ်၊ ပွိုၚ်ဍုၚ်ဇြပ်ဗု၊ ပွိုၚ်ဍုၚ်မုဟ်ဍုၚ်တံတုဲ ပ္ဍဲဂိတုမေ သၞာံဏံဂှ် ပံက်ကၠုၚ် ဘာသဇိုၚ်ကွတ်ပၞာန် ပ္ဍဲပွိုၚ်ဍုၚ်ဇြပ်ဗုရ။

သွက်ဂကောံညးတံဂှ် အလဵုအသဳပၞာန်တံ ကဵုလဝ်အခေါၚ် သွံရာန်ကွဳစက် ဟွံမွဲကဵုလာၚ်ဇြန်၊ ဓရိပ်ကွဳစက်လာၚ်၊ ဗက်အကံက်သၞေဟ်ကၚ် နူကွဳစက် ဓရိပ်လာၚ်၊ ဗက်အကံက် နူသၟာပရေၚ်ပိုန်ဒြပ်တံအိုတ်ရ။

လၟုဟ် ဒပ်ပၞာန်စဵုဒၞာ ၜိုဟ်လလမ် ကောန်ဂကူမန်ဝွံ ဖျေံလဝ်သဇိုၚ် ပ္ဍဲကအ်ယက္ခ၊ ပွိုၚ်ဍုၚ်ဖာအၚ်၊ တွဵုရးကရေၚ်ရ။ ဥက္ကဌဂှ် မဒှ်သကိုပ်ပၞာန်တြေံ ဗော်ဍုၚ်မန်တၟိ နာဲအံၚ်နာၚ်တုဲ ဒုဥက္ကဌဂှ် မဒှ်သကိုပ်ဗိုလ်ဇၞော် ဒေါံဇူ နူဗော်ဍုၚ်မန်တၟိ နာဲယှံၚ်ရ။