ဂၠံၚ်ဍာန် ဍုၚ်မတ်မလီု-ရေဝ်
မာံအဲ ။ ။ ဂၠံၚ်ကွဳစက်မွဲဒမြိပ် ဍုၚ်မတ်မလီုကဵု ဍုၚ်ရေဝ်တံဂှ် အကာဲအရာပြဟ်ဟ်ဏံ ပွမစၟဳတ် ညးမအာတရဴတံ တေၚ်တိုန်နူသၞောတ်ဓမ္မတာရောၚ် ဂွံတီကေတ်ရ။
အကြာဂိတုဂျူလာၚ်အိုတ် ကၠောံကၠုၚ်ဂိတုအဝ်ဂေတ်သတ္တဟပထမဏံတုဲ အလုံဂၠံၚ်မွဲ စၟဳတ်တေၚ်မံၚ်တုဲ ဗွဲတၟေၚ် ကၠာဟွံဂွံလုပ်ဍုၚ်မတ်မလီု အပ္ဍဲဖအံက်ကဵု အပ္ဍဲလုပ် ဍုၚ်မုဟ်ဍုၚ်တံ ဗဒေါံကွဳစက်ချိုတ်တ်ပၠိုတ်တ်တုဲ စၟဳတ်မံၚ်ရ။ ”နူဍုၚ်ရေဝ် ဂွံစိုပ်မတ်မလီုဂှ် ဒးဒုၚ်စၟဳစၟတ်ကၠုၚ်အလုံဂၠံၚ်မွဲရ၊ မွဲမွဲဒၞာဲတှေ်လေဝ် လအ်မံၚ်ဟဂှ်ရ ကဵုစှေ်နူကာတုဲ ကဵုကွာ်တတ်ထောံသၞေဟ်ဍေံ ထ္ၜးလိက်စၟတ်ကောန်ဍုၚ် မွဲဒၞာဲတှေ် ၜိုတ်ကဝက်နာဍဳ ဍေံဗဒေံါ စၟဳတ်မၞိဟ် စၟဳတ်ကာရ” သာ်ဝွံ ညးမအာလဝ်တရဴ နိုၚ်ချေတ် ဟီုရ။
နူညးတာလျိုၚ်အလဵုအသဳတံ ပွမစၟဳတ်မၞိဟ်အာတရဴတံကီု ပွမပတေၚ်ပတိုန်ဂီုကၠီုတံကီုဂှ် တန်တဴကဵု အကာဲအရာတၟေၚ်တုဲ ဍေံတံကၠောန်သ္ပမံၚ် မွဲနှမွဲနှရ။ မွဲမွဲဂၠံၚ်တၟေၚ်တိုန်မ္ဂး ဍေံတံဟတေၚ်တိုန်ဂီုကၠီုတွဵုရောၚ်ဂှ်လေဝ် ညးဒေသတံဟီုရ။
အကြာဏံ ဟိုတ်နူကြပ်ကၠုၚ်ကဵုတ္ၚဲ ၈ ပန်မတုဲလေဝ် ညးတာလျိုၚ်တံ ဖျေံပတေၚ်လဝ်ဂီုကၠီု၊ စၟဳစၟတ်တေၚ်တိုန်နူသၞောတ်တြေံတေံလေဝ်ဒှ်မာန်မံၚ်ဂှ် သၟတ်ကွးဘာတက္ကသိုလ် လ္တူဍုၚ်မတ်မလီုတအ် ဟီုမံၚ်ရ။ “လညာတ်အဲတှေ် ကြပ်ကၠုၚ်ကဵု တ္ၚဲ ၈ ပန်မတုဲ ဍေံတံဂွိၚ်ဖေက် ပရေၚ်ကညာၚ်ကရေဲ အာတ်မိက်အခေါၚ်ဗၠးၜး ဒဳမိုကရေသဳ၊ တုဲပၠန် အကြာဏံလေဝ် စပ်ကဵုပေါဲရုဲမာဲတုဲ ဂွိၚ်ဖေက်ကတဵုဒှ်မွဲမွဲဗီုတုဲ ဍေံတံစၟဳတ်မံၚ်” သာ်ဏံ သၟတ်ကွးဘာတက္ကသိုလ် မွဲတၠ ဟီုရ။
အကာဲအရာလၟုဟ်ပၠန်လေဝ် ဂကောံဗော်ပရေၚ်ဍုၚ်ကွာန်တံလေဝ် အဃောစှေ်မံၚ်ပရေၚ်စန္ဒက် သွက်ပေဲါရုဲမာဲကီုတုဲ ဂွိၚ်ဖေက်ဒှ်အာ ပရေၚ်ကလိုက်ကမဵုမွဲမွဲသာ် ဒှ်အခက်အခုဲကဵုပရေၚ်ပေဲါရုဲမာဲဍေံတအ်ကီုတုဲ ဖျေံပတေၚ်လဝ်ဂီုကၠီု ဒှ်မာန်ရောၚ် သၟတ်ကွးဘာဂှ် ဆက်ဟီုရ။
လောန်ကၠုၚ်မွဲၜါဂိတုတုဲကၠုၚ်ဂှ်လေဝ် ရဲဖံက်ဗတိုဟ်တံ နူပယျဵုမွဲကဆံၚ် လုပ်စိုပ်မံၚ်အပ္ဍဲကၟိန်ဍုၚ်ဗၟာနွံမံၚ်ဏောၚ်ဂးတုဲ ပွမစၟဳတ် ပွမပတေၚ်တိုန်ဂီုကၠီုနွံကၠုၚ်ရ။ အကြာကွာန်လေဝ် ညံၚ်ကဵုဂွံမၚ်ပမံၚ်သတိကဵု မၞိဟ်လုပ်တိတ်တံဂှ်လေဝ် နူဒပ်ပၞာန်တံကဵုကၠုၚ်လဝ်သတိနွံရ။
