ဌာန်ပရိုၚ်ဗၠးၜးမန် ။ ။ကောန်ပၞာန် နူတမ်ဒပ် ခလရ (၃၂) မဖျေံသဇိုၚ် ပ္ဍဲဒေသကျာ်ပိ (၄) တၠ လောန်ကၠုၚ်ၜါတ္ၚဲတေံဂှ် လုပ်လ္ၚတ်အာ ပ္ဍဲဗဒိုပ်ၜါန်တန်ယျၚ်ရောၚ် ညးမကြပ်ညောန်ကဵု ညးတာလျိုၚ်ဗဒိုပ်တံ ဟီုအိုတ်ရ။
ပ္ဍဲကောန်ပၞာန်မလုပ်လ္ၚတ် (၄) တၠဂှ် ဒု ဗိုလ်မွဲတၠ ပါလုပ်တုဲ နူဒဵုဂဂါ မၞုံဒိုဟ်နေရတိ ဍုၚ်ကျာ်ပိဂှ်မွဲကဆံၚ် လုပ်ကၠုၚ်ဗဒိုပ် နူဂၠံၚ်ဗလးဇၞော်ရောၚ်၊ ညးမတန်တဴ ပ္ဍဲဗဒိုပ် ကောန်ပၞာန်ရာံတိတ် (၂) တၠတံ ကော်နၚ် ညးပန်တၠဂှ်ရောၚ်ဂှ် ညးမကြပ်ညောန်မွဲတၠ ဟီုရ။
“ဍေံတံ ကၠုၚ်ဝေၚ် အဖဝ်ရဲဍေံ မၞုံအပ္ဍဲဗဒိုပ်ဏံ ပွိုၚ်ပိတ္ၚဲဏောဝ် တေၚ်လဝ်ကၟုဲ၊ ဆဂး ညးတာလျိုၚ် ဂီုကၠီုကွာန်တံ မိၚ်အာပရိုၚ်တုဲ ဂေတ်မံၚ်ကၚ် အတိုၚ်မွဲဗတံ၊ ဍေံတံလေဝ် ယိက်ဒးအာ အကာဲအရာဂှ်တုဲ ဂွိၚ်ဖေက်မံၚ်အာတုဲ နူဂယးပြဟ်ဂှ် ဍေံတံ ကလေၚ်တိတ်အာ နူဗဒိုပ်ဏံ” သာ်ဝွံ နာဲသဳဟ ညးမကြပ်ကဵု ညးတာလျိုၚ်ဗဒိုပ်ဂှ် ဟီုရ။
“အဓိက ဍေံတံ ကၠုၚ်ဗဒိုပ်ဏံဂှ် ဍေံတံ မိက်ဂွံကၠုၚ်လ္ၚတ်တိဍာ်ရဏောဝ်၊ အဓိကဂှ် ဍေံတံမိက်ဂွံလ္ၚတ် အကာဲအရာပယျဵု ကဵု တိဍာ်ဗော်ဍုၚ်မန်တၟိ” သာ်ဝွံ ညးဆက်ဟီုရ။
ညးပန်တၠဝွံ နူတနေံတေံဂှ် ကလေၚ်စဴအာကျာ်ပိ လပါ်ဂၠံၚ်ခလံက်ခနဳရောၚ် နာဲသဳဟ ဟီုရ။ ၜိုန်ဂှ်လေဝ် ညးတာလျိုၚ် တမ်ဒပ် လၟိဟ် (၅) ဗော်ဍုၚ်မန်တၟိ မၞုံပ္ဍဲဗလးဒုန်ဖာ်ဂှ် တးပဲါဂလာန်ဂှ်ရ။
“ပိုဲလေဝ် မိၚ်မံၚ်ပရိုၚ်ဂှ်ကီု၊ ကၠုၚ်နူဂၠံၚ်ဗလးဇၞော်၊ တိတ်လေဝ် ကလေၚ်တိတ်အာ လပါ်ဂၠံၚ်ဗလးဇၞော်ဂှ်ပၠန်၊ ဍေံတံတိတ်အာ လပါ်တိဍာ်ပိုဲဏံဂှ် ဒှ်ဟွံမာန်ပုဟ်” သာ်ဝွံ ညးဟီုရ။
စရဖ မွဲတၠ မၞုံပ္ဍဲဍုၚ်ကျာ်ပိ မညောန်ကဵု ခလရ (၃၂) ဂှ်လေဝ် ကောန်ပၞာန် နူတမ်ဒပ်ဂှ် (၄) တၠ လုပ်အာဗဒိုပ်ၜါန်တန်ယျၚ်ဂှ် ဒှ်ဟွံမာန်ရောၚ် ကယျာန်တးပဲါရ။
ညး (၂) တၠ မကော်နၚ် ကောန်ပၞာန်ဗၟာတံဂှ် လၟုဟ် ညးတာလျိုၚ်ဗဒိုပ်တံ ဆက်စၟဳစၟတ်သၟာန်သၟုက်မံၚ်ရ။
ဗဒိုပ်ညးတၠဒဒိုက် ၜါန်တန်ယျၚ်ဝွံ ပၞောဝ်ကဵုဗဒိုပ်ညးတၠဒဒိုက် မၞုံပ္ဍဲပယျဵုသေံ–ဗၟာ (၉) ဗဒိုပ်ဂှ် ပါလုပ်မွဲတုဲ မၞုံအပ္ဍဲဂြိုပ်ဆု မသက္ကုဘဲ ဂၞကျာ်ဨကရာဇ် ဍုၚ်သေံ ပ္ဍဲခရိုၚ်ကမ္မရဳ ပွိုၚ်ဍုၚ်သၚ်ခလပူရဳရ။ သ္ၚောဲခြာနူဍုၚ်သၚ်ခလပူရီ ၜိုတ် (၂၀) တိုၚ်တုဲ အတိုၚ်ဂၠံၚ်ဂြိုပ်မ္ဂး သ္ၚောဲခြာနူဍုၚ်ကျာ်ပိ ၜိုတ် (၆) တိုၚ်ရ။
အတိုၚ်ဂကောံရီုဗၚ်မၚ်မွဲ မွဲဒမြိပ်ပယျဵုသေံ–ဗၟာ TBBC ပတိတ်လဝ် လိက်ဒုၚ်စဳရေၚ် ပ္ဍဲသၞာံ (၂၀၀၈) ဂှ်မ္ဂး ပ္ဍဲဗဒိုပ်ၜါန်တန်ယျၚ်ဂှ် လၟိဟ်မၞိဟ်မၞုံ (၄၃၆၂) တၠတုဲ ကောန်ဂကူကရေၚ်ဗွဲမဂၠိုၚ် ကေုာံ ကောန်ဂကူဗၟာ၊ မန်၊ ထဝဲါဗွဲမအောန်တံ တန်တဴအိုတ်ရ။