ညးမၞုံအခေါၚ်ဟီုဂး ဗော်ဍုၚ်မန်တၟိ နာဲဟံသာဗိုန်ခိုၚ်
အာကာ – လတူအလဵုအသဳပၞာန်တံ ကဵုလဝ်စၞောန် ကုဗော်ဍုၚ်မန်တၟိ ညံၚ်သ္ဂောံအပ်လွဟ်ဂှ် ဗော်ဍုၚ်မန်တၟိ ဟွံဒုၚ်တဲရောၚ် ကလေၚ်ဏာလဝ်ပရိုၚ်တုဲ ရုၚ်လတူဍုၚ်တံဂှ်လေဝ် ကၟာတ်ထောံအိုတ်ရ။
“နူဂိတုအေဗရာ (၂၂) တေံ ပိုဲကယျာန်တးပဲါလဝ် ကိစ္စဏံ ပိုတ်ပိုတ်သကုတ်သကုတ်တုဲယျ၊ ကိစ္စပြံၚ်လှာဲ အယောၚ်အလာဒပ်၊ ကိစ္စအပ်လွဟ်ဏံဂှ် ဗော်ပိုဲ ဒုၚ်တဲ ဟွံမာန်ပုဟ်၊ ပိုဲပလံၚ်လဝ်လိက်ကဵုဍေံတုဲယျ” သာ်ဝွံ လျိုၚ်ဌာန ဆက်ဆောံ ဍုၚ်သအာၚ် ညးမၞုံအခေါၚ်ဟီုဂး ဗော်ဍုၚ်မန်တၟိ နာဲဟံသာဗိုန်ခိုၚ် ဟီုရ။
ပ္ဍဲလိက်ပလံၚ်ဗစိုပ်လဝ်ကဵု ဌာန်ဂအုပ်ပၞာန် ရးဒိုဟ်အဂၞဲ ပ္ဍဲစၟတ်တ္ၚဲ သေပ်တေမ်ပါ (၁) ဂှ်မ္ဂး “သွက်သ္ဂောံဒက်ပတန် ကၟိန်ဍုၚ်ပံၚ်ကောံဇေတ်ဇေတ် ဆဵုဂဗတက်ကျာ ပရေၚ်ဍုၚ်ကွာန် ဟွံတုဲဒှ်ဏီမ္ဂး ပရေၚ်ပြံၚ်လှာဲအယောၚ်အလာဒပ်၊ ပရေၚ်အပ်လွဟ်တံဂှ် ဗော်ဍုၚ်မန်တၟိ ဟွံဒုၚ်တဲရောၚ်” ပါလုပ်ရ။
ပ္ဍဲဂိတုအဝ်ဂါတ် (၂၃) ဂှ် သကိုပ်ပၞာန်တိတ်နာၚ်ဝေန် ဆဵုဂဗကဵု ညးတာလျိုၚ် ဗော်ဍုၚ်မန်တၟိ ပ္ဍဲဌာန်ဂအုပ်ပၞာန် ရးဒိုဟ်အဂၞဲတုဲ ဂိတုသေပ်တေမ်ပါ (၁) လက္ကရဴအိုတ် ဒးအပ်လွဟ်ရောၚ်၊ ယဝ်ဟွံအပ်လွဟ်မ္ဂး စွံစိုတ်ဂကောံလွဟ်ရပ် ပလီုပလာ် အတိုၚ်ကိုပ်ကၠာတေံတုဲ ဟွံဆက်ဆောံ ဗဗွဲသၞောဝ်ရရောၚ်ဂှ် ဟီုစၞောန်လဝ်ကဵု ဗော်ဍုၚ်မန်တၟိရ။
ဟိုတ်နူအကာဲအရာဂှ်တုဲ ကောန်ဗော် မၞုံပ္ဍဲရုၚ်လတူဍုၚ်တံဂှ် ကၠာဟွံစိုပ်ဂိတုသေပ်တေမ်ပါ (၁) ကလေၚ်စဴကၠုၚ် ခရိုၚ်မစုက်လုက်ကဵုဇကုညိဂှ် ဗော်ဍုၚ်မန်တၟိ ကလေၚ်ကော်ကေတ်လဝ်အိုတ်ရ။
“လၟုဟ် ကောန်ဗော် မၞုံပ္ဍဲဍုၚ် သီုဖအိုတ်ဂှ် ကလေၚ်စိုပ်မံၚ် တိဍာ်ဗော်အိုတ်ရ” သာ်ဝွံ နာဲဟံသာဗိုန်ခိုၚ် ဟီုရ။
ဟိုတ်နူအကာဲအရာ ပရေၚ်ဆက်ဆောံ ဟွံပြေပြံၚ်ဂှ်ရ ပ္ဍဲအကြာဇြပ်ဗု ကဵု မုဟ်ဍုၚ်ဂှ်ကီု၊ ပ္ဍဲဂၠံၚ်ဇြပ်ဗု ကျာ်ပိ ဗဒဲါကွာန်ယျေဝ်တဂေါန်ဂှ်ကီု အလဵုအသဳပၞာန်တံ ပရးလဝ်ဒပ်တုဲ ဗော်ဍုၚ်မန်တၟိလေဝ် မ္ၚုဟ်လဝ်ဒပ်ရ။
တုပ်တဴသာ်ဂှ်ကီု လောန်ကၠုၚ် ပ္ဍဲဂိတုအေဗရာ (၂၂) ဂှ်လေဝ် ဗော်ဍုၚ်မန်တၟိ ဒုၚ်တဲဒပ်ပၞာန်မၚ်ပယျဵု (ဟွံ) ဒပ်ပၞာန်စဵုဒၞာကွာန် ဟွံမာန်ရောၚ် ကလေၚ်လဝ်လိက်ကဵု အလဵုအသဳပၞာန်တုဲ ဗွဲကြဴဂှ် ဗော်ဍုၚ်မန်တၟိ ကၟာတ်ထောံရုၚ် မၞုံလတူဍုၚ် သီုဖအိုတ်တုဲ စိုပ်ကၠုၚ်အကာဲအရာ ပလေဝ်ပလေတ်စပၞာန်ရ။
ပြံၚ်လှာဲ အယောၚ်အလာ ဒပ်ပၞာန်ဂှ် ဒုၚ်တဲဟွံမာန်ရောၚ် ဗော်ဍုၚ်မန်တၟိ ကလေၚ်လဝ်လိက်ကဵု ဌာန်ဂအုပ်ပၞာန် ရးဒိုဟ်အဂၞဲ ပ္ဍဲဂိတုအေဗရာ (၂၂)၊ အေဗရာ (၂၅)၊ အဝ်ဂါတ် (၃၀) ပ္ဍဲသၞာံဏံ ပိဝါတုဲရ။
တုပ်တဴသာ်ဂှ်ကီု ပ္ဍဲတ္ၚဲပၠန်ဂတးမန် မရနုက်ကဵု (၆၂) ဝါ ဂိတုအဝ်ဂါတ် (၅) သၞာံတုဲကၠုၚ်တေံဂှ်လေဝ် ဒုၚ်တဲဒပ်ပၞာန်မၚ်ကွာန် ဟွံမာန်ရောၚ်ဂှ် ဗော်ဍုၚ်မန်တၟိ ကယျာန်တးပဲါကၠုၚ်လဝ်ရ။
ကြဴနူဒေံါပန်ပှော် သၞာံ (၁၉၉၅) တေံဂှ် အတိုၚ်တၚ်တုပ်စိုတ် ဗော်ဍုၚ်မန်တၟိကဵု အလဵုအသဳပၞာန် ပံက်ကၠုၚ်လဝ် ရုၚ်ဆက်ဆောံ ဗော်ဍုၚ်မန်တၟိ ပ္ဍဲဍုၚ်မတ်မလီု၊ ဇြပ်ဗု၊ ရေဝ် ကေုာံ ဍုၚ်ကျာ်ပိတံရ။
