သ္ကုတ်ဂၠံင်ကွဳစက်ဗိက်-ထဝဲါ စၟတ် (၈) မတၟာတ်လဝ်ပွိုင်မွဲဂိတုပြင်ဂှ်ဝွံ စပ္တံနူဂိတုမာတ် စၟတ်တ္ၚဲ (၂၇) ဏံတုဲ က္လေင်ကဵုအခေါင်အာကၠုင်ဣရဂှ် ဂွံတီကေတ် နူတမ်ရိုဟ်ပရိုင် အပ္ဍဲဒေသရ။

မွဲဒမြိပ်သ္ကုတ်ဂၠံင်ဇၞော်ဗိက်-ထဝဲါ စၟတ် (၈) ဂှ်ဝွံ သၟိုင်နူကတဵုဒှ်ပေဲါဗ္တိုက်တုဲ လ္ပာ်ဒပ်ကမ္မယှေန်ပၞာန်တံ ပန်ကဵုလွဟ်ဇၞော်၊ ထောံဖျေံဗမ်ကဵုက္ၜင်ကျာဂှ်ရ နကဵုအကာဲအရာဂီုကၠီုတုဲ စပ္တံနူဂိတုဖေဖဝ်ဝါရဳ (၁၀) ဂှ် လ္ပာ်ဒပ်ပၠန်ဂတးတံ တၟာတ်ထောံအခေါင်အာကၠုင်ရ။

အတိုင်ညးဒေသတံ ဟီုလဝ်ဂှ် မ္ဂး သ္ကုတ်ဂၠံင်ဗိက်-ထဝဲါ မတၟာတ်လဝ်ဂှ်ဝွံ စပ္တံနူဂိတုမာတ် (၂၇) အခိင်လဒေါဝ်တ္ၚဲဂှ်တုဲ က္လေင်အာကၠုင်မံင်ရောင် ဂးရ။

“ပံက်ဂၠံင်ယျဏောင် ဂးရ။ ညးဂှ် ဂကောံလဵု ကဵုအာဂှ် ဟွံတီပုဟ်။ ညးဂမိုင်တံ အာကၠုင်မံင်တုဲ နူဂိတုမာတ် (၂၇) စဵုကဵုတ္ၚဲဏံ အာကၠုင်မံင်ရ။ တ္ၚဲဂတဂတဏံ ဆက်ပံက်ဟာ၊ က္လေင်ကၟာတ်ဟာဂှ် ဟွံတီဏီပုဟ်။ လၟုဟ် ပိုဲတံလေဝ် စိုပ်မံင်ပုဠဝ်ရ။ သွက်ဂွံအာဗိက်ဂှ် ဍိုက်မံင်ကာဖိုဟ်” သာ်ဝွံ ညးဗြဴနူဒေသဂှ် မွဲ တၠ ဟီုရ။

ဆေင်စပ်ကဵု က္လေင်ပံက်သ္ကုတ်ဂၠံင်ဗိက်-ထဝဲါဂှ်တုဲ လ္ပာ်ဒပ်ပိုင်ကောံပၠန်ဂတးတံ ဟွံလလောင်ပ္တိတ်မွဲသာ်ဏီရ။

လ္ပာ်ဒပ်ပိုင်ကောံပၠန်ဂတးတံ ဟွံလလောင်ပ္တိတ်ဗဗွဲဓဝ်မွဲသာ်ဏီဂှ်ရ ကွဳစက်လ္ၚဵုတံ ဟွံဂံင်အာကၠုင်ဏီတုဲ မင်ရိုင်ဒမံင် အကာဲအရာဖိုဟ်ရောင် ညးတြုံနူဒေသဂှ် မွဲ တၠ ဟီုရ။

“ပံက်ဂၠံင်ဂှ် ဟွံဂွံလလောင်ဗဗွဲဓဝ်ဏီတှ်ေ အကာဲအရာပြိုင်လှာဲဗီုလဵုနွံဂှ် ဟွံတီဏီပုဟ်။ ကွဳစက် tၟာတ်ဆိုအ်မံင်ဗွဲမဂၠိုင်တံဂှ် တိုန်စှ်ေမံင်အိုတ်ရ။ ဒးဟီုတှ်ေ ဂံင်ကေတ်တုဲ အာကၠုင်မံင်ရ။ အကာဲအရာဂှ် ဟွံညိင်ဝတ်ဏီပုဟ်။ ဂၠံင်ဂှ်လေဝ် အခိင်ဟွံရုဲ က္လေင်ကၟာတ်အာမာန်ရ။ လ္ၚဵုတံဂှ် ဟွံဂံင်အာကၠုင်ဏီပုဟ်။ ကိစ္စဟွံဇၞော်တှ်ေ လပအာဂှ်ခိုဟ်ရ။ အကာဲအရာဂှ်တှ်ေ မင်ရိုင်ဒမံင်ဖိုဟ်ရ” သာ်ဝွံ ညးတြုံနူဒေသဂှ် ဟီုရ။

ဆေင်စပ်ကဵု ကိစ္စက္လေင်ပံက်သ္ကုတ်ဂၠံင်ဗိက်-ထဝဲါတုဲ သွက်ဂွံတီသောဲသောဲဗြောဲဗြောဲ မာန်ဂှ် မ္ဂး နူဌာန်ပရိုင်ဗၠးၜးမန် ကေတ်အဆက်ကဵု ညးတာလျိုင်ဂကောံဒပ်ပၠန်ဂတးတံ ကီုလေဝ် စဵုကဵုအခိင်လၟုဟ် ဟွံက္လေင်သွဟ်ကဵုဏီရ။

အခိင်မတၟာတ်လဝ်သ္ကုတ်ဂၠံင်ဂှ်ဝွံ အကြာပရေင်ပန်ပှော်ပေဲါဗ္တိုက်ၜါလ္ပာ်ဂှ် မ္ဂး ညးဒဳကွဳစက်ကဵု ညးအာတရဴလ္ၚဵုတံ ဒးဘဲဝပ်ကီု၊ ပရေင်မၞိဟ်ကၠေံကီု ကတဵုဒှ်မံင်ဂှ်ရ မင်ကလင်ပရိုင် လ္ပာ်ဂကောံဒပ်ပၠန်ဂတးတံ လလောင်ပ္တိတ်တုဲ အာကၠုင်ညိဂှ် ဂကောံဒပ်ပၠန်ဂတးတံ ဟီုဂးဖတိုက်ဖအောဝ်လဝ်ရ။

ဗဒိုပ်ဒပ်ဝေန်ဝ မၞုံလ္တူဂၠံင်ဇၞော် စၟတ် (၈) ၊ ဗိက်-ထဝဲါဂှ်ဝွံ နူဒပ်ပိုင်ကောံပၠန်ဂတးကဵု KNLA တံ သီဂွံ ပ္ဍဲဂိတုမာတ် စၟတ်တ္ၚဲ (၁၁) တုဲကၠုင်ဏံတုဲ ပ္ဍဲကဵုမွဲဒမြိပ်ဂၠံင်ဂှ် မ္ဂး ဒပ်ကမ္မယှေန်ပၞာန်တံ ကၠောန်သ္ပသောင်သအးမံင်တိဍာ်ဂှ်ရ ပေဲါဗ္တိုက်သ္ကာတ်မြဟ်ကၠုင်ရ။