သ္ကုတ်ဂၠံင်ကွဳစက် အၜေတ်-ပုလိင်-တဂေါန်ဒေင်၊ ပွိုင်ဍုင်လှာဒကှ်၊ တွဵုရးကရေင်ဂှ် တတ်ကၠောံအာကၠုင်မာန်ဣရရောင် အတိုင်ညးဒေသကဵု ညးဒဳကွဳစက်တံ ဟီုဂးလဝ်ဂှ် ဂွံတီကေတ်ရ။
ဂိတုအံက်တဝ်ဗာ စၟတ်တ္ၚဲ (၂၀) ၊ အခိင်နူဂယးဂှ် ခၟဳသင်ဂမၠိုင်ကဵု ညးတာလျိုင်အပ္ဍဲဒေသတံ ဆဵုဂဗပ္ညဳပ္ညပ်တုဲ အခိင်သဝ်တ္ၚဲ ၜိုတ် (၃) နာဍဳဂှ် စပံက်အာလဝ်ဂၠံင်ဂှ်ရောင် ညးဒေသမွဲတၠ ဟီုရ။
“ဆေင်စပ်ကဵု ကတဵုဒှ်ပေဲါဗ္တိုက် လ္ပာ်ဒေသပုလိင်ဂှ်တုဲ စွံဓဝ်ဆာန်ဍူကဵု ပရေင်ခက်ခုဲညးဍုင်ကွာန်တံ ဂးတုဲ ခၟဳသင်တံကီု သီုညးတာလျိုင်အပ္ဍဲဒေသတံ ပ္ညဳပ္ညပ်ညးသ္ကံရ။ တုဲတှ်ေ အခိင်သဝ်တ္ၚဲဂှ် ဒပ်တံ ဆုတ်တိတ်အာတုဲ က္လေင်ပံက်ကဵုဂၠံင်ရ” သာ်ဝွံ ညးဒေသဂှ် ဟီုရ။
ၜိုန်ဂှ်ကီုလေဝ် ပ္ဍဲသ္ကုတ်ဂၠံင် တဂေါန်ဒေင်-ပုလိင်-အၜေတ်ဂှ် ဟိုတ်နူဟွံဂီုကၠီု ဍိုက်ဍိုက်ပေင်ပေင်ဏီဂှ်ရ ကွဳစက်ဂမၠိုင် တတ်ကၠောံအာကၠုင်အောန်မံင်ဏီရောင် ဂးရ။
အခိင်လၟုဟ်ဏံဝွံ သၟာင်နူကွဳစက်အာတရဴ မဂြိပ်ဒၟံင် ကျာ်ပိ-မုဟ်ဍုင်ဂှ်တုဲ ညးဒေသတံ တတ်ကၠောံအာကၠုင်ဒၟံင် သ္ကုတ်ဂၠံင်တဂေါန်ဒေင်-ကျာ်မသုန်-တၟံဗြဴ-ဆုကၠ ကေုာံ သာမယာ-ၜါသွာင်-ဆုကၠဟေင် ဂၠိုင်ဒၟံင်ရောင် ညးဒေသဒဳကွဳစက်မွဲတၠဂှ် ဟီုရ။
“ကောန်ပၞာန်ဗၟာဂှ်တှ်ေ ဟွံဆဵုရပုဟ်။ လ္ပာ်အၜေတ်ကီု၊ တဂေါန်ဒေင်-တၟံဗြဴကီု ပံက်လဝ်ရ။ လ္ပာ်ပုလိင် ကၟာတ်ဒၞာလဝ်ကဵုတၞံဆုဂှ်လေဝ် က္လေင်သီထောံယျ။ ဆဂး ၜိုတ်မူစိတ္ၚဲဂွံမာန်ရောဂှ်တှ်ေ ဟွံတီပုဟ်” သာ်ဝွံ ညးဒဳကွဳစက်ဂှ် ဟီုရ။
ၜိုန်ရက္လေင်ပံက်လဝ်သ္ကုတ်ဂၠံင်ဂှ်ကီုလေဝ် ဟိုတ်နူပေဲါဗ္တိုက်တုဲ ညးဒေသဂြိပ်ပဲါဒဴဒၟံင် ဒၞာဲဗၠးဘဲလ္ၚဵုတံဟေင် က္လေင်စဴကၠုင်မံင်ရောင် ဂးရ။
အကြာကရောင်ပၞာန်ကမ္မယှေန်ပၞာန် သွက်ဂွံလုပ်စိုပ်ဗပေင်ဇြဟတ် ပ္ဍဲဗဒိုပ်ပၞာန် (ဇီးဖြူကုန်း) ၊ ဂကောံကွာန်တဂေါန်ဒေင်ဂှ်ကဵု ဒပ်ပံင်ကောံပၠန်ဂတး မန်၊ ကရေင်တံ ပ္ဍဲဂိတုအံက်တဝ်ဗာ စၟတ်တ္ၚဲ (၁၂) တုဲကၠုင်ဏံဂှ် ကတဵုဒှ်အာပေဲါဗ္တိုက်ဗွဲမသ္ကာတ်မြဟ် ကြပ်ကွာန်ပုလိင်ရ။
ဟိုတ်နူပေဲါဗ္တိုက်ဂှ်ရ ဂကောံၜါလ္ပာ်တံ ကၟာတ်ဒၞာထောံ သ္ကုတ်ဂၠံင်တဂေါန်ဒေင်-ပုလိင်-အၜေတ်တုဲ လုပ်စိုပ်ဖျေံလဝ်ဒပ်အပ္ဍဲကွာန်ဂှ်ရ ညးဒေသလၟိဟ်ကဵုကၠံတံ ဒးဂြိပ်ပဲါဒဴအာ ဒၞာဲဗၠးဘဲတေံရောင် ဂွံတီကေတ်ရ။