ပ္ဍဲတွဵုရးဍုင်မန်ဝွံ ၚုဟ်ကၠေင်စက်တိုန်ဒၟံင် ဇၟာပ်ဂိတုတုဲ ပရေင်ရာန်ဂှ်လေဝ် ဗၞတ်ဗ္ၜတ်လဝ်အခေါင်ရောင် အတိုင်ညးရာန်စကာတံ ဟီုဂးလဝ်ဂှ် ဂွံတီကေတ်ရ။
အတိုင်ၚုဟ်မးကၠေင်စက် လလောင်ပ္တိတ်လဝ်တၟိ နူကမ္မတဳကောပ်ကာဲ ကမၠောန်ပၠောပ်ခြိုင်တြးကၠေင်စက် ပ္ဍဲဂိတုအံက်တဝ်ဗာ စၟတ်တ္ၚဲ (၂၀) ဏံမ္ဂး ပ္ဍဲတွဵုရးဍုင်မန်ဂှ် 95 မွဲလဳတာ (၅၁၁၅) ဒကေဝ်၊ 92 မွဲလဳတာ (၄၉၆၅) ဒကေဝ် ၚုဟ်ပံက်ဒၟံင်နွံရ။
ၚုဟ်မးကၠေင်စက်ဂမၠိုင်ဂှ်ဝွံ ယဝ်ပတောံၜတ်ကဵု ၚုဟ်မး အပ္ဍဲဂိတုသေပ်တေမ်ဗာတုဲကၠုင်ဏံမ္ဂး နကဵုလၟေင်ဂကူ ဆက်သၠုင်တိုန်ဒၟံင် စဵုကဵု (၃၀၀) ဒကေဝ်ပြင်ရ။
“ၚုဟ်ကၠေင်စက်ဂှ်တှ်ေ မွဲလှေ်လေဝ် ဟွံစှ်ေပုဟ်။ ၜိုတ်နွံပၟိက်လေဝ် ဟွံဂွံပုဟ်။ လ္ပာ်မုဟ်ဍုင်ကၟာဝက်တှ်ေ ဒးမင်ရေင်မံင်ဖိုဟ်” သာ်ဝွံ ညးဒေသမုဟ်ဍုင်မွဲတၠ ဟီုရ။
အတိုင်ၚုဟ်မးတၟိစၞောန်လဝ်ဂှ်မ္ဂး ကၠေင်ဓာတ် ကေုာံ ဒဳဇြာ တွဵုရးဍုင်မန်ဝွံ ၚုဟ်သၠုင်နူကဵု လ္ဂုင်၊ ဘာအင်၊ ဗ္ဂေါ၊ ထဝဲါ ကေုာံ ရးတၞဟ်/တွဵုရးတၞဟ်တံဏီရ။
ပ္ဍဲဆေင်သွံကၠေင်စက်ဂမၠိုင်ဝွံ ကၠေင်ပါ်ပရအ်အရင် ကလိဂွံလဝ်ဂမၠိုင်ဂှ် ဒၟာနူကဵုဖျုန်သွံဒၟံင် ပ္ဍဲဗွဝ်ဖျာဒမၠုက်ဂှ်ရ ညးဍုင်ကွာန်တံ ဒးရာန်ကေတ်ဒၟံင် နကဵုၚုဟ်မးက္ဍင်က္ဍင်ရောင် ညးရာန်စကာတံ ဟီုရ။
တုဲပၠန် ဆေင်သွံကၠေင်စက် ပ္ဍဲဒေသ (နေဝ်) ဂမၠိုင်ဂှ် ကလိဂွံကၠေင်ပါ်ပရအ်အရင် အောန်ဂှ်ရ သၟာဗ္ၚ ဒးစကာမံင် ကၠေင်စက်အဓိကတံကဵု သၟာကၠအ်ဂူတံ ဒးရာန်ကေတ်ဒၟံင် လ္တူနူၚုဟ်မး မစၞောန် (စၟတ်) လဝ်ဂှ်ရ။
“လ္တူပ္တိုန်ထ္ၜးလၟိဟ် QR Code မာန်ဂှ် ပါ်ပရအ်အရင်ဏောင်တှ်ေ လ္ပာ်နေဝ်ဂှ် ဍိုက်မံင်ကွဳလိုန်ဓာတ်လာင်ဇြေန်ဟၟဲသၟး၊ ဇှ်ရတှ်ေ ကာလပါ်ပရအ်တှ်ေ ဆေင်လ္ပာ်နေဝ်တံ ဂွံကၠေင်စက်အောန်ရ။ ဒးက္လေင်ရာန်ကေတ်ကၠေင် နူကဵုဆေင်ဂွံပါ်ပရအ်အရင်ဂၠိုင်မွဲကဆံင်ရ။ ဟိုတ်ဂှ်ရ ဆေင်လ္ပာ်နေဝ်တံတှ်ေ ၚုဟ်ကၠေင်ပဵုသၠုင်ရ” သာ်ဝွံ တၠဆေင်ကၠေင်စက် နူပွိုင်ဍုင်ရေဝ်မွဲတၠ ဟီုရ။
ကၠေင်စက်တွဵုရးဍုင်မန်ဂှ် နူသၞေဟ် Puma International Port Terminal ပ္ဍဲကွာန်ဂဒုင်ၜဝ်၊ ပွိုင်ဍုင်မုဟ်ဍုင်ဂှ်မွဲတဆံင် သွံတြးဒၟံင်တုဲ ကမ္ပဏဳ Myanmar Energy King ကဵု Ya Zar Min Industry တံ ဂွံလဝ်အခေါင်ကၠောန်ရ။
Importer မပၠောပ်မံင်ကၠေင်စက် သွက်တွဵုရးဍုင်မန်ဂှ် ဟိုတ်နူဟွံသွံကဵုဒဝ်လာ ဗီု Importer မပၠောပ်မံင်ကၠေင်စက် သၞေဟ်တဳလဝါလ္ဂုင်ဂှ်ရ နကဵုသြန်ဒဝ်လာဇကု မဒးပၠောပ်မံင်ကၠေင်စက်တုဲ ၚုဟ်ဒဝ်လာဂှ်လေဝ် ရာန်ကေတ်နကဵုၚုဟ်မး ကၟိန်ဍုင်စၟတ်လဝ်ဟွံဂွံဂှ်ရ ဒးရာန်ဒၟံင်ကဵုၚုဟ်မးမ္ၚးရ။
ဟိုတ်ဂှ်ရ ၚုဟ်မးကၠေင်စက် နူလ္ဂုင်စၟတ်လဝ်ကဵု တွဵုရးဍုင်မန် စၟတ်လဝ်ဂှ် တၞဟ်ခြာမံင်နွံတုဲ နူကဵုဂကောံအလဵုအသဳ ကေုာံ ကၠတ်ထဝ်ကမ္မယှေန်ပၞာန်တံ ပသောင်ကဵုမွဲမွဲသာ် ဟွံမာန်ဏီရောင် ဂွံတီကေတ်ရ။