ရုင်က္ဍိုက်က္ဍိုပ်ပရေင်စဵုဒၞာဒပ်ပၞာန် ကေုာံ ရုင်သမ္မတကၟိန်ဍုင် သၟဝ်တဲကမ္မယှေန်ပၞာန် ထပ်ဗပဵုလဝ်အခိင် အမိင်အုပ်ဓုပ်ပၞာန် (၅၅) ပွိုင်ဍုင်ဂှ် ပွိုင်ဍုင်ကအ်ကြိက်ကဵု လှာဒကှ် ပါလုပ်တုဲ ထပ်ဗပဵုလဝ်အခိင် ပွိုင် (၉၀) တ္ၚဲပၠန်ရောင် လလောင်ပ္တိတ်လဝ်ဂှ် ဂွံတီကေတ်ရ။
ပၞောဝ်ကဵုပွိုင်ဍုင် လလောင်ပ္တိတ်လဝ်အမိင် ပရေင်အုပ်ဓုပ်ပၞာန်ကၠာတေံဂှ်ဝွံ သၟာင်နူပွိုင်ဍုင် (၃) ပွိုင်ဍုင် က္လေင်ဂွံလဝ် သၞောဝ်ဥပဒေအုပ်လဒံဂှ်မ္ဂး သှ်ေ (၅၅) ပွိုင်ဍုင်ဂှ် ဆက်တန်ကြန်ဒၟံင်ရောင် လလောင်ပ္တိတ်လဝ် ပ္ဍဲဂိတုအံက်တဝ်ဗာ စၟတ်တ္ၚဲ (၁၈) ဏံရ။
ပ္ဍဲကဵုပွိုင်ဍုင်ဆက်သ္ပဒတန်လဝ် အမိင်ပရေင်အုပ်ဓုပ်ပၞာန်ဂှ်ဝွံ တာလျိုင် ကေုာံ အခေါင်ကၠောန် ဆေင်စပ်ကဵု ပရေင်စဳရေင်သၞောဝ် ကေုာံ ပရေင်အုပ်ဓုပ်ဂှ် ပအပ်ကဵုရုင်က္ဍိုက်က္ဍိုပ်စဵုဒၞာဒပ်ပၞာန်တုဲ တာလျိုင် ကေုာံ အခေါင်ကၠောန်ဂမၠိုင်ဂှ် ကဵုလဝ်အခေါင်ရေင်တၠုင် ကုညးတာလျိုင်လ္ပာ်ပၞာန်မွဲမွဲတၠ (ဝါ) နအလဵုဇကုညးက္ဍိုက်က္ဍိုပ်ပရေင်စဵုဒၞာရ။
နူကဵုဒပ်ပၞာန်တံ ကၠောန်သ္ပရေင်တၠုင် အခေါင်ကၠောန်ဂမၠိုင် ဗွဲမဗၠးၜးမာန်ဂှ်ရ ဇၟာပ်တ္ၚဲ ဒးဆဵုဂဗမံင်ကဵု ပရေင်သၞောတ်ဗ္ၜတ်ချဳဓရာင်အာကၠုင်၊ ပရေင်စၟဳစၟတ်ဟွံမွဲကဵုဗဗွဲဓဝ် ကေုာံ ပရေင်ဂီုကၠီုဟွံမွဲဂှ်တုဲ ပရေင်ပိုန်ဒြပ်ဘဝမၞိဟ်ဂမၠိုင်တံလေဝ် ယောင်ယာဟုတ်ယုတ်စှ်ေကၠုင်မံင်ရောင် ဂကောံမင်ရံင်လ္ၚတ်အခေါင်အရာမၞိဟ်တံ ဟီုရ။
အမိင်ဒေသန္တရ ကေုာံ အမိင်ပရေင်အုပ်ဓုပ်ပၞာန်ဂှ် ပတေင်ဓရတ်လဝ်ကီုလေဝ် ကဵုလဝ်အခေါင်ကၠောန်ပေဲါသဘင်ဂမၠိုင်တုဲ သွက်ဂွံပကောံပကေဝ်သ္ဂံင်တၟိဂှ်မ္ဂး စွံပွန်ကဵုသၟတ်တံတုဲ ဗီုဒးဂၞပ်စိုတ် ကၠောန်သ္ပရပ်စပ်မံင်ရ။
ဟိုတ်နူဗ္တိုက်ကဵုက္ၜင်ကျာ၊ ပန်ပှော်ကဵုလွဟ်ဇၞော်၊ ရပ်စပ်ဟွံမွဲကဵုဗဗွဲဓဝ်၊ ပကောံပကေဝ်သ္ဂံင်တၟိဗွဲအဓမ္မ ကေုာံ လုပ်စိုပ်ထ္ပက်ကရောင်ပၞာန်အပ္ဍဲကွာန်တုဲ ဘဝလၟေင်တ္ၚဲ ကောန်ညးဍုင်ကွာန်၊ ပရေင်ဂယိုင်လမျီု ကေုာံ အခေါင်အာကၠုင်ဗၠးၜးဂမၠိုင်ဂှ် ဒးဇီုကပိုက်ကၠုင်မံင်ရောင် နူဇာနှိက်ဓဝ်ဗ္စာရဏာမၞိဟ် သ္ကုတ်သၠုင်ကျာကၟိန်ဍုင်ဗၟာတံ ဂးရ။
ပ္ဍဲကဵုပွိုင်ဍုင် (၅၅) ပွိုင်ဍုင် ဆက်လလောင်ပ္တိတ်လဝ် အမိင်ပရေင်အုပ်ဓုပ်ပၞာန် လၟုဟ်ဏံဂှ်ဝွံ သၟာင်နူတွဵုရး ရခေင်၊ သေံ၊ ချေင်၊ ကချေင်၊ ကရေင် ကေုာံ တွဵုရးကယျာတုဲ ပွိုင်ဍုင်ရးဒေသဇၞော်သေတ်ဂိုင်တံလေဝ် ပါလုပ်ကီုရ။