ဆေင်စပ်ကဵု ညးတြုံမွဲတၠချိုတ်အာလဝ် နကဵုဘဲဝပ်လွဟ်၊ အပ္ဍဲကၠအ်ထ္ၜိုတ်၊ ကြပ်ကွာန်ကျာ်ရဲ၊ ပွိုင်ဍုင်မုဟ်ဍုင်၊ တွဵုရးဍုင်မန်ဂှ်တုဲ ညးထေင်ခယျ လုတ်လောန်ဒုဟ်တံဂှ် ရပ်ဂွံလဝ်ရောင် ဂွံတီကေတ် နူညးစုက်လုက်ကဵု ဂကောံဒပ်ဗၠာဲသၟိင်တံရ။
ညးချိုတ်အာလဝ် နကဵုဘဲဝပ်လွဟ်ဂှ်ဝွံ မၞုံယၟု ကိုဝ်အံင်နာင်ဝေန်၊ ဒၟံင်တန်တဴကွာန်ၝောံလၟိုင်၊ ပွိုင်ဍုင်ရေဝ်တုဲ ဆေင်စပ်ကဵု ပရူဒဒှ်ချိုတ်အာဂှ်မ္ဂး ဂကောံသၟိကၟိန်တံ ပ္တိုန်စုတ်အမှု ကုမျဵုမေန်အေ (ကော်) “ဝတုတ်” မဒမၠေံလဝ်သြန်ညးဂှ်တုဲ ကော်စၟဳစၟတ်ဂှ်ရ ပရူဒဒှ်မံက်တိတ်ကၠုင်ရ။
အတိုင်မျဵုမေန်အေ (ကော်) “ဝတုတ်” ဟီုဓမံက်လဝ်ဂှ်မ္ဂး ဂိတုအံက်တဝ်ဗာ စၟတ်တ္ၚဲ (၂၇) တုဲကၠုင်တေံ အခိင်သဝ်တ္ၚဲဂှ် သွက်သ္ဂောံက္လေင်ကဵုသြန်ဂၠေံလဝ် ဇရေင်ကိုဝ်အံင်နာင်ဝေန် မၞုံပ္ဍဲဇြပ်ဗုဂှ် ကော်ဏာဖုင်ရ။
ဗွဲကြဴဂှ်မ္ဂး မျဵုမေန်အေကဵု တဳဟ ကၠုင်ကော်ကိုဝ်အံင်နာင်ဝေန် နကဵုကွဳစက်မွဲဖ္ဍိုက်ကီု၊ ကိုဝ်အံင်နာင်ဝေန်လေဝ် နကဵုကွဳစက်ညး ဗက်အာလက္ကရဴကွဳစက် မျဵုမေန်အေ (ကော်) “ဝတုတ်” အာလ္ပာ်မုဟ်ဍုင်တေံရ။
ကာလစိုပ်ကွာန်လှာ၊ ပွိုင်ဍုင်မုဟ်ဍုင်ဂှ် ထပ်ကော် “သနေထောန်” တုဲ သနေထောန်ကဵု တဳဟ ပြံင်ဍိုက်ကွဳစက် ကိုဝ်အံင်နာင်ဝေန်၊ ဆက်ဒဳအာ လ္ပာ်မုဟ်ဍုင်တေံတုဲ ကာလၜက်ဍုင်ကၟာဝက်ဂှ် သနေထောန်ကဵု တဳဟတံ ဗျာံလွဟ်ကဵု ကိုဝ်အံင်နာင်ဝေန် ဒက်ဇုက်တုဲ ကော်ဏာ လ္ပာ်ကၠအ်ထ္ၜိုတ် ကြပ်ကွာန်ကျာ်ရဲရ။
တုဲပၠန် အခိင်ဗ္တံ ၜိုတ် (၇း၃၀) နာဍဳဂှ် သနေထောန် ပန်စုတ်ကဵု ကိုဝ်အံင်နာင်ဝေန်တုဲ ကၠအ်ထောံလဝ်ဇွ ပ္ဍဲအရာပ်ခြုံရဂှ် ဟီုဓမံက်ပ္တိတ်လဝ်ရောင် ညးစုက်လုက်ကဵု ဂကောံဒပ်ဗၠာဲသၟိင်တံ ဟီုရ။
မျဵုမေန်အေ (ကော်) “ဝတုတ်” ဂှ် ဟွံမိက်လဴခတှ်ကဵု ကိုဝ်အံင်နာင်ဝေန် (၅၀၀) ကိုဋ်ပြင်ဂှ်ရ နကဵုအဆက်စၠောံ တဳဟဂှ် လိင်ကေတ် သနေထောန်တုဲ သွက်ဂွံဂစိုတ် ကိုဝ်အံင်နာင်ဝေန်ဂှ် စကာလဝ်ရ။
သနေထောန်ဂှ် ဒှ်ညးဗၠာဲသၟိင်တံ မနွံပၟိက်မွဲတၠတုဲ ပဲါဓလေတ်ဒၟံင် လ္ပာ်ကွာန်ခလေဝ်တဂေါန်ဒေင်ရဂှ်လေဝ် ဂွံတီကေတ် နူဂကောံဒပ်ဗၠာဲသၟိင်တံရ။
ညးလုတ်လောန်ဒုဟ် တဳဟဂှ် တုဲကၠုင်ဂိတုအံက်တဝ်ဗာ (၃၁) တေံ ရပ်ဂွံလ္ပာ်ကွာန်မယာန်ကီု၊ သနေထောန်ဂှ်လေဝ် ပ္ဍဲဂိတုနဝ်ဝေမ်ဗာ စၟတ်တ္ၚဲ (၂) တုဲကၠုင်ဏံ ရပ်ဂွံပ္ဍဲဇိုင်ဒဵုထပှ်ကဝးမုဟ်ဍုင်ကီုတုဲ လွဟ်ဂစိုတ်လဝ် ကိုဝ်အံင်နာင်ဝေန်ကဵု ကွဳစက်ညးဂှ် ဂၠိုက်ဂၠာဲရပ်ဂွံ ပ္ဍဲကၠအ်ထ္ၜိုတ်၊ သ္ကဲဂၠံင်ကျာ်မြဟ် ဂးရ။
ဆေင်စပ်ကဵုပရူဒဒှ်ဂှ်မ္ဂး ပံက်လဝ်အမှုကဵု မျဵုမေန်အေ (ကော်) “ဝတုတ်”၊ တဳဟ၊ သနေထောန်တံ ပ္ဍဲဗဒိုပ်ဗၠာဲသၟိင် ၝောံဍုင်မုဟ်ဍုင်တုဲ သွက်သ္ဂောံကေတ်အရေဝ်မာန်ဂှ် ဆက်စၟဳစၟတ်ဂၠိုက်ဂၠာဲဒၟံင်ရောင် ဂွံတီကေတ် နူဂကောံဒပ်ဗၠာဲသၟိင်တံရ။