အပ္ဍဲတွဵုရးဍုင်မန်ဝွံ သၟာဗ္ၚတံ ရာန်ကၠေင်စက်ဟွံဂွံဂှ်ရ သွက်ဂွံရတ်သြောံဂှ် ဒှ်မံင်ခက်ခုဲရောင် သၟာဗ္ၚတံ ဟီုရ။
အခိင်အကြာတဏံလေဝ် ဟိုတ်နူဗြဲဂူဒၟံင်ဂှ်ရ သၟာဗ္ၚတံ သွက်ဂွံရတ်သြောံဂှ် ပလေဝ်ပလေတ်ဒၟံင်ကီုလေဝ် ရာန်ကၠေင်စက်ဟွံဂွံတုဲ ဒှ်မံင်ခက်ခုဲကီု၊ ကၠေင်စက်ဂမၠိုင်ဂှ် ဒးရာန်မံင် နကဵုၚုဟ်က္ဍင်က္ဍင် ပ္ဍဲကဵုဗွဝ်ဖျာမ္ၚးကီု ဂးရ။

“ၜိုတ် (၄) တ္ၚဲ ကၠေင်ပိုတ်မံင်၊ ရာန်ဟွံဂွံ ဒှ်မံင်ရ။ သွံကဵုဗွဲမဂတာပ်အခိင်ဏောင် ဂးတုဲ ဇေတ်ဇေတ်ဂှ် အလဵုအသဳတွဵုရး ပ္တိတ်ကဵုဟွံမာန် ဒှ်မံင်။ သၟာဗ္ၚတံလေဝ် ဆေင်ကၠေင်တံ ဟွံသွံကဵုတှ်ေ ဒေါသတိတ်ရ။ ကြပ်ဇၟာပ်ကွာန်ဂှ် ဒှ်မံင်ပြဿနာကၠေင်ရ။ ဗြဲဂှ်လေဝ် ၜိုတ်ၜါတ္ၚဲမွဲဝါ ဂူမံင်တှ်ေ စိုတ်ထုဲကြာန်ရ။ ပြဟ်ပြဟ်ဏံ ဒးရာန်မံင်ကဵု ၚုဟ်မ္ၚး (၇၀၀၀) ရ” သာ်ဝွံ သၟာဗ္ၚနူပွိုင်ဍုင်ပံင်မွဲတၠ ဟီုရ။
အလဵုအသဳပၞာန်တွဵုရးတံဝွံ သွက်ဂွံရတ်သြောံကသီုဂးတုဲ ပ္ဍဲကဵုဆေင်သွံကၠေင်စက် (၁၁၉) ဆေင်တံဂှ် ဂိတုအံက်တဝ်ဗာ (၂၃) တုဲကၠုင်တေံ ပါ်ပရအ်ကဵုလဝ်ကၠေင်စက်အလန်ပထမ (၃၆၀၀၀၀) ဂါလာန်ပြင်တုဲ ဝါဗ္ၚမွဲဨကမ္ဂး ကဵုလဝ်အခေါင်ရာန် ဗၞတ် (၃) ဂါလာန်ရောင် ဂွံတီကေတ်ရ။
သွက်သၟာဗ္ၚဂမၠိုင်တံဂှ် ပ္တိတ်ကဵုကၠေင်စက်ပါ်ပရအ်အရင် ဗွဲမဂတာပ်အခိင်ရောင် အလဵုအသဳပၞာန်တွဵုရးတံ ဟီုဂးလဝ်ကီုလေဝ် နတဲဂှ် ဟိုတ်နူဟွံဂွံကၠေင်စက်ပါ်ပရအ်အရင်ဂှ်ရ သွံကၠေင်စက်ကဵုသၟာဗ္ၚတံ ဟွံမာန်ရောင် တၠဆေင်သွံကၠေင်စက်တံ ဟီုရ။
“သွက်သၟာဗ္ၚတံဂှ် ကၠေင်ဟွံစိုပ်ဏီပုဟ်။ သွက်အလန်ဒုတိယဂှ် ဟွံဂွံကၠေင်ဏီပုဟ်။ ကၠုင်ဂှ် ကၠုင်ဏောင်လေဝ်။ အရင်အလန်ပထမဂှ် ဖျေံကဵုလဝ် (၂၀) တၟံကၠံရ။ အိုတ်ယျလေဝ်၊ ပ္ဍဲသၞေဟ်ဂှ် ကၠေင်ဟွံမွဲပုဟ်” သာ်ဝွံ ညးတာလျိုင်ဆေင်သွံကၠေင်စက် အပ္ဍဲပွိုင်ဍုင်ၜါသွာင်မွဲတၠ ဟီုရ။
ၚုဟ်မးကၠေင်စက်စၟတ်လဝ် သွက်သၟာဗ္ၚဂမၠိုင်တံဂှ်လေဝ် ဒးကဵုဂၠိုင်နူၚုဟ်လၟေင်ဍာံ (၃၀၀) ဒကေဝ်တုဲ ကၠေင်ဂှ်လေဝ် ၜိုတ်နွံပၟိက် ရာန်ကေတ်ဗွဲမလောဲသွာ ဟွံဂွံရောင် သၟာဗ္ၚတံ ဟီုရ။
တုဲပၠန် ကၠေင်စက်ဂှ် ညးမၞုံ (ပုံစံ ရ) ဟေင် ရာန်မာန်ဂှ်ရ သွက်ညး (ပုံစံ ရ) ဟွံမွဲတံ သာတုဲဒးဆဵုဂဗခက်ခုဲရဂှ်လေဝ် သၟာဗ္ၚ နူကွာန်ထုင်မင်၊ ပွိုင်ဍုင်မုဟ်ဍုင်မွဲတၠဂှ် ဟီုရ။
“ဗြဲဂှ်လေဝ် ဗီုကဵုဂူ သြောံဂှ်လေဝ် သွက်ဂွံရတ်နွံရ။ (ပုံစံ ရ) နွံတှ်ေ ပ္တိတ်ကဵုဖအိုတ်။ သၟာဗ္ၚဟီုတှ်ေ ဟွံကဵု ဟွံဂွံ ဟီုလဝ်ရ။ အာတ်ၚုဟ်ဂၠိုင်ဟာဂှ်လေဝ် (ရပ်ကျေး) တံ ဗက်သၟာန်ရ။ ဆဂး ဗီုကဵုပိုဲ (ပုံစံ ရ) ဟွံမွဲတှ်ေ စက်ရတ်သြောံဂှ် ကော်နင်နူပွိုင်ဍုင်တၞဟ်တှ်ေ စက်ဂှ် အခေါင်ဖ္ဍိုက်ဏာကၠေင် မွဲဒၞာဲကဵုမွဲဒၞာဲဟွံမွဲတှ်ေ ခက်ရ။ ကၠေင်မွဲပေပါဂှ် (၂၈) ကိုဋ် ဂးရ” သာ်ဝွံ ညးဟီုရ။
ကမၠောန်မၞုံပၟိက်ကဵု ကၠေင်စက်ဂမၠိုင်ဂှ်ဝွံ နကဵုတင်နင်သက်သဳ ပ္တိုန်ထ္ၜးကဵု အလဵုအသဳပၞာန်တွဵုရးမ္ဂး နူကဵုဌာနမဆေင်စပ်တံ သွံကဵုဒၟံင် လၟိဟ်ဗ္ၜတ်ကၠေင်စက်မၞုံပၟိက်ဍာံဍာံ အတိုင်လၟေင်ဂကူကမၠောန်ဂှ်နွံရောင် ဝန်ဇၞော်အစောံဇြဟတ် ကေုာံ ဓာတ်လလဳ အလဵုအသဳပၞာန်တွဵုရး ဟီုသွဟ်လဝ် ပ္ဍဲကၠတ်ထဝ်ကီုလေဝ် ပ္ဍဲကဵုဗလးတိဇေတ်ဇေတ်ဏံ သွက်ဂွံရာန်ကၠေင်စက်ဂှ် ခက်ခုဲမံင်ဖိုဟ်ရ။
အတိုင်ၚုဟ်စၞောန်ကၠေင်စက် ပ္ဍဲဂိတုနဝ်ဝေမ်ဗာ စၟတ်တ္ၚဲ (၁၇) တုဲကၠုင်ဏံမ္ဂး ပ္ဍဲတွဵုရးဍုင်မန်ဂှ် ဒဳဇြာမွဲလဳတာ (၅၀၆၅) ဒကေဝ်၊ ပရဳမဳယာမ်မွဲလဳတာ (၅၅၉၅) ဒကေဝ်၊ (၉၂) မွဲလဳတာ (၄၅၁၅) ဒကေဝ်၊ (၉၅) မွဲလဳတာ (၄၅၄၅) ဒကေဝ်ရ။
