အပ္ဍဲပွိုင်ဍုင်ရေဝ်၊ တွဵုရးဍုင်မန်ဂှ် ဒှ်ကၠုင်ပေဲါဗ္တိုက်မာန်ရောင် ဂကောံလကိုဟ်ရေဝ် လလောင်ပ္တိတ်လဝ်ဂှ်ရ ဒးအာကၠုင်မံင်ကဵုသတိရောင် ညးဒေသလ္ၚဵုတံ ဟီုရ။
ပ္ဍဲဍုင်လၟိုင်၊ ဍုင်ရေဝ် ကေုာံ ဍုင်ခေါဇာဂှ် ဇၟာပ်ဒၞာဲ ဒှ်ကၠုင်ပေဲါဗ္တိုက်မာန်တုဲ ထံင်ကတောဝ်မင်ကလင်ဒၟံင်ညိဂှ်လေဝ် ပ္ဍဲဂိတုနဝ်ဝေမ်ဗာ စၟတ်တ္ၚဲ (၁၅) တုဲကၠုင်ဏံ ဂကောံလကိုဟ်ရေဝ်တံ ချူလလောင်ပ္တိတ်လဝ် ပ္ဍဲမုက်လိက်ပရေင်မၞိဟ်ညးတံမွဲတဆံင်ရ။

ပြဟ်ပြဟ်ဏံဂှ်လေဝ် ပ္ဍဲကဵုမွဲဒမြိပ်သ္ကုတ်ဂၠံင်ရေဝ်-တၟအ်ကၞေင်ဂှ် ဂကောံကမ္မယှေန်ပၞာန်တံ တိတ်ဂၠံင်စၟဳစၟတ်မံင်တုဲ မွဲလ္ပာ်ဂှ်လေဝ် ဂကောံဒပ်ပၠန်ဂတးဂမၠိုင် အာကၠုင်ချဳဓရာင်မံင်ဂှ်ရ ညးဒေသတံ ဒှ်ဂဝိင်ကဵု ပရေင်ဒှ်ပေဲါဗ္တိုက်ရ။
ညးဒေသတၟံကၞေင်မွဲတၠဂှ် “ဗီုကဵုဂကောံပၠန်ဂတးတံ ချဳဓရာင်မံင်နွံရ။ တမ်ဒပ် (၅၈၈) တံ ဗီုကဵု (၃) ဂကောံ တိတ်ကၠုင်လ္ပာ်သ္ကုတ်ဂၠံင်ရေဝ်-တၟံကၞေင်နွံရ။ ယဝ်ရဒှ်အာတှ်ေ ညးအာကၠအ်/ဂူ၊ ညးအာတရဴတံ ဗီုကဵုတၟာတ်ဆိုအ်အာ။ ညံင်ဟွံဂွံဒးဘဲဇီုကပိုက်ဂှ် ဍေတံ ကဵုလဝ်သတိ ဒှ်ဏောင်။ ဆဂး ညးဍုင်ကွာန်တံဂှ် နကဵုအကာဲအရာကမၠောန်တှ်ေ ကၠာဟွံဒှ်ဂှ် ဒးအာကၠုင် ကၠောန်ကလောန်ဟေင်ရ” သာ်ဝွံ ညးဟီုရ။
နကဵုညးဒေသဂမၠိုင်တံ ၜိုန်ဒှ်ဂဝိင်ကီုလေဝ် သွက်ဗုင်ဂၞဴမ္ဂး ဒးအာကၠအ်၊ ဒးအာကမၠောန်တုဲ အခိင်ပြဟ်ပြဟ်ဏံ ဟွံတၟေင်တၟဟ်မွဲသာ်ဏီရောင် ဂးရ။
“လ္ပာ်ဍေံတံ ကဵုလဝ်သတိကီုလေဝ် မုလေဝ်ဟွံဒှ်ဏီတှ်ေ အာကၠုင်ဂှ်တှ်ေ အတိုင်ပကတိရ။ ပရေင်ဒှ်ဂဝိင်ဂှ် နွံမံင်ရ” သာ်ဝွံ ညးဒေသဍုင်လၟိုင်မွဲတၠ ဟီုရ။
ဂိတုနဝ်ဝေမ်ဗာ စၟတ်တ္ၚဲ (၉) တုဲကၠုင်ဏံလေဝ် အကြာကရောင်ပၞာန်ကမ္မယှေန်ပၞာန် ထ္ပက်ကၠုင်ကရောင်ပၞာန် အတိုင်ဂၠံင်ဇၞော် စၟတ် (၈) ဂှ်ကဵု ဂကောံလကိုဟ်ရေဝ်တံ ကတဵုဒှ်လဝ်ပေဲါဗ္တိုက် ကြပ်တမ်ဒပ်အမၠံက် စၟတ် (၃၁၆) ဂှ်နွံကီု ဂွံတီကေတ်ရ။
