တၠကမၠောန်ၜဵု မၞုံအပ္ဍဲပွိုင်ဍုင်ပံၚ်၊ ဇြပ်ဗု၊ ရေဝ် တွဵုရးဍုင်မန်တအ်ဂမၠိုင် သွက်ဂွံစကမၠောန်ပ္တိတ်ၜဵုမာန် အဃောပလေဝ်ပလေတ်ဒၟံၚ်ခံက်ၜဵုအိုတ်ရောင် ဂွံတီကေတ်ရ။
ဒၞါဲမကၠောန်ပ္တိတ်မံင်ၜဵု ပ္ဍဲတွဵုရးဍုၚ်မန်ဂှ် ကွာန်ဝါကပိုဟ်၊ ကျာ်ခမဳ၊ စက်စာဲ၊ ပ္ၚ၊ ကြုက်ပိ၊ ဝါဂၠံၚ်၊ အင်ခေဝ်၊ ကွာန်ပြဳ၊ သၞေဟ်ခြေင်၊ ပလိုင်ကဳ စတမ်တအ်နွံရ။

“လၟုဟ်ဏံ ပလေဝ်ပလေတ်လဝ် ဂွံဗ္ဒါဲ (၅၀) က္ဍိုပ်ကၠံယျ၊ ယဝ်ရ ဗြဲဟွံပလီုထောံပုဟ်တှ်ေ ၜိုတ်လဒေါဝ်ဂိတုဒဳဇြေမ်ဗာဏံတှ်ေ ညာတ်မုက်ၜဵုညိဏောၚ်” သာ်ဝွံ တၠကမၠောန်ၜဵု နာဲဟုတ် နူကွာန်ပ္ရ ဟီုရ။
ပြဟ်ဟ်ဏံ ၜဵုတၟိဂှ် ဟွံဂွံတိတ်ဏီ သှ်ေဒၟံၚ်ဆၜဵုတြေံညိညတုဲ ပ္ဍဲကာလလၟုဟ် ၚုဟ်ၜဵု မွဲပသာ နွံမံင်အကြာ (၅၅၀) ဒကေဝ်ရောၚ် ဂးရ။
ၚုဟ်ၜဵုသၞာံတုဲကၠုၚ်တေံဂှ် မွဲပသာ စဵုကဵု (၈၅၀) ဒကေဝ် ဂွံကၠုင်နွံတုဲ ၜဵုတိတ်တၟိသၞာံဏအ် ၚုဟ်ၜိုတ်လဵုနွံမာန်ပၠန်ဂှ် တော်ဆဟွံဒးကီု တန်တဴကဵုဥတုရာသဳဗြဲတုဲ စိုပ်လဒေါဝ်က္ညၚ်ဏံမှ ချိၚ်တော်ဆဒးရောၚ် ဂးရ။
ဟိုတ်နူၚုဟ်ကၠေၚ်စက်က္ဍင်တိုန်ကီု ဟိုတ်နူကေတ်ကၠေၚ်ဝါတ်ကီုနွံတုဲ သွက်တၠကမၠောန်ၜဵုတအ် ဒှ်မံင်ခက်ခုဲလေဝ်နွံရ။
အခိၚ်ဥတုရာသဳ ကၠောန်ပ္တိတ်ၜဵုဂှ် စနူဂိတုနဝ်ဝေမ်ဗာ စဵုစိုပ်ဂိတုမေတုဲ မွဲသၞာံ ဂွံအခိင်ကၠောန်ပ္တိတ်ၜဵု ပွိုၚ် (၆) ဂိတု ကၠောန်ဂွံၜဵု ဗၞတ် (၁၂) ဝါနွံရောၚ် ဂးရ။
ၜဵုတိတ်နူတွဵုရးဍုၚ်မန်ဂှ် အဓိက ပလံၚ်ဗစိုပ်ကဵုဒၟံၚ် ဂၠုၚ်ရပ်ကဂၠိုၚ်တုဲ ဍုၚ်ဇိုၚ်ဝုတ်ဒိုဟ် ဍုၚ်သေံ၊ ဍုၚ်ကြုက်တအ်လေဝ် ပလံၚ်ဗစိုပ်ဒၟံၚ်နွံကီုရောၚ် ညးသွံရာန်ၜဵုမွဲတၠ ဟီုရ။
အလုံတွဵုရးဍုၚ်မန်ဂှ် လၟိဟ်ဨကကၠောန်ပ္တိတ်ၜဵု နွံမံင်အကြာ (၄၇၀၀) ဧကတုဲ ပွိုၚ်မွဲသၞာံ လျိုၚ်ၜဵုတိတ်မံင် အကြာ (၄၅၀၀၀) တာန်ပြၚ်နွံရောၚ် ဂွံတီကေတ်ရ။
