နူတနေံဏအ် ဂိတုနဝ်ဝေမ်ဗာ စၟတ်တ္ၚဲ (၅) ၊ အခိၚ်ဗ္တမ် (၁၀) နာဍဳဂှ်ဝွံ ပ္ဍဲသၚ်္ခဠၜုရဳ (ဝၚ်က) ပၞာန်မၚ်ဂီုကၠီုသေံ သၞေဟ်ကၚ်တၞံပကုက်တအ် ထပ်ရပ်ဂွံ ကောန်ဍုၚ်ဗၟာ ညးကၠတ်လုပ်ဍုၚ်သေံ လၟိဟ် (၁၄) တၠနွံရောၚ် ဂွံတီကေတ်ရ။
အပ္ဍဲကဵုရပ်ဂွံလဝ် ကောန်ဍုၚ်ဗၟာ ညးကၠတ်လုပ်ဍုၚ် (၁၄) တၠဂှ်မ္ဂး မၞိဟ်တြုံ (၇) တၠ၊ မၞိဟ်ဗြဴ (၇) တၠ ပါလုပ်မံၚ်တုဲ အဃောကၠတ်လုပ် မၚ်ဒၟံၚ်ကြပ်ကဵုဂြိုပ်ဒဵုမွဲဒၞါဲဂှ် ပၞာန်သေံတအ် ရပ်ဂွံဏာရ။
ပြဟ်ဟ်ဏအ်ဝွံ ကောန်ဍုၚ်ဗၟာ ညးကၠတ်လုပ်ဍုၚ်သေံ (၁၄) တၠဂှ် ရပ်ထိၚ်လဝ် ပ္ဍဲကဵုရုၚ်ဗၠာဲသၟိၚ်သေံ သၚ်္ခဠၜုရဳ (ဝၚ်က) တုဲ ဆက်စၟဳစၟတ် ကေတ်မံၚ်အရေဝ်နွံရ။
ပယျဵုသေံ-ဗၟာ ဒေသကျာ်ပိဏအ်ဝွံ ပ္ဍဲမွဲဒမြိပ်ဂၠံၚ်လုပ်ဍုၚ်သေံ လ္ပါ်ဝၚ်က၊ ထံက်ခၞောန်၊ ကမ္မရဳဂှ်မ္ဂး ဒှ်ပၠော်ဂၠံၚ်အဓိကမွဲတုဲ ကောန်ဍုၚ်ဗၟာတအ် သွက်သ္ဂောံလုပ်စိုပ် အာကၠောန်ကမၠောန်ပ္ဍဲဍုၚ်သေံဂှ် နူကဵုဒေသပယျဵုသေံ-ဗၟာ ကျာ်ပိဂှ်မွဲတဆံၚ် အဃောကၠတ်လုပ်ဂှ် ဗၠာဲသၟိၚ်သေံ၊ ဒပ်မၚ်ဂီုကၠီုသေံတအ် ရပ်စပ်ဂွံမံၚ် ညးကၠတ်လုပ်ဍုၚ်တအ်အဆက်က်ရ။
အပ္ဍဲပယျဵုသေံ-ဗၟာ လ္ပါ်ဒေသပယျဵုကျာ်ပိဝွံ ပ္ဍဲဂိတုနဝ်ဝေမ်ဗာမံက်ဏအ် ပရေၚ်ဒးဒုၚ်ရပ် အောန်သိၚ်စှေ်မံၚ်ကီုလေဝ် တုဲကၠုၚ်ဂိတုအံၚ်တဝ်ဗာတေံသၟးဂှ် ဗၠာဲသၟိၚ်သေံ၊ ဒပ်ပၞာန်မၚ်ဂီုကၠီု ဒေသပယျဵုတအ် ရပ်စပ်ဂွံလဝ် ကောန်ဍုၚ်မန်ဗၟာ ညးကၠတ်လုပ်ဍုၚ်သေံတအ်အဆက်က်တုဲ သရောပ်မ္ဂး လၟိဟ် (၆၀) တၠပြၚ်ဣရဂှ် ဂွံတီကေတ်ရ။
