မယံင် (ဍုင်မန်)
အခိင်သမ္မယလၟုဟ်ဏံမ္ဂး ပ္ဍဲဍုင်မန်ဂှ် ပရေင်ပိုန်ဒြပ်ဗွဝ်ဖျာထၜိုတ်ဂှ် ဒှ်ဗွဝ်ဖျာဇၞော်သၠဲလးအိုတ်မွဲတုဲ နကဵုဗွဝ်ဖျာပရေင်ပိုန်ဒြပ်ထၜိုတ်ဂှ် ဂကူညးတၞဟ်သအာင်တအ် ဗွဲမဂၠိုင် ကၠုင်ဓလိုက်တမ်ရိုဟ် ကၠောန်ကၠုင်ပရေင်ပိုန်ဒြပ် ပ္ဍဲဍုင်မန် ဇၞော်သၠဲလးကၠုင်ဒၟံင် အရိုဟ်တ္ၚဲရ။
ဆဂးဂှ် ရံင်အာကဵု ၚုဟ်မးထၜိုတ်ပ္ဍဲဍုင်တ္ၚဲဏံမ္ဂး ထၜိုတ်တိတ်ဂၠိုင်အိုတ် ပ္ဍဲဒေသဍုင်မန်ဂှ် မုဟိုတ်ဂွံၚုဟ်မးအောန်နူဒေသတၞဟ်တၞဟ်ဏီရော နကဵုတင်သၟာန်ဏံ ထေက်ကဵုဒးပ္တိတ်ပုစ္ဆာထေက်ရ။
အလုံမွဲကၟိန်ဍုင်ဗၟာမ္ဂး ပရေင်ပိုန်ဒြပ်ထၜိုတ်ဂှ် ဍုင်မန်ကဵု ဍုင်ကရေင် အဓိကတိတ်ဂၠိုင်အိုတ်တုဲ စပ်ကဵုဗွဝ်ဖျာလေဝ် ၚုဟ်ဂွံသဝ်နူကဵုရးတၞဟ်တၞဟ် ဟွံမွဲကၠုင်မွဲလှ်ေဏီရ။
သၞာံတုဲကၠုင်တေံမ္ဂး ဗွဝ်ဖျာပရေင်ပိုန်ဒြပ်ထၜိုတ် ဍုင်မန်ကဵု ဍုင်ကရေင်ဂှ် ၚုဟ်မးသၠုင်အိုတ်ရ။ ပရေင်ကူသာန်သွံရာန်ထၜိုတ်လေဝ် သၠဲလးအိုတ်ရ။ မပ္တံကဵု ထၜိုတ်ဂတှေ်တီုတီု / ကြဳကြဳ၊ အိက်ခေါ်၊ အိက်ဇုက် စတမ် ဒှ်ပၞော်ပရေင်ပိုန်ဒြပ် ဗွဲမသၠဲလးမွဲတုဲ သၟာကူသာန်သွံထၜိုတ်ဂမၠိုင်လေဝ် ဒှ်ပရေင်ပိုန်ဒြပ် နကဵုဗွဝ်ဖျာထၜိုတ်သၠဲသၠဲမွဲရ။
အတိုင်နူတၠကမၠောန်ရုင်စက်ဗုတ်ထၜိုတ်တအ် ရာန်ပံက်ဒၟံင်ၚုဟ်ထၜိုတ်လၟုဟ်မ္ဂး ထၜိုတ်ကဆံင်သၠုင်အိုတ် RSS 1 မွဲပံင် အကြာ (၄၂၀၀) ဒကေဝ်၊ RSS 3 မွဲပံင်ဂှ် ၚုဟ်နွံဒၟံင် အကြာ (၃၉၅၀) ဒကေဝ်၊ ထၜိုတ်တီုတီုဂှ် ၚုဟ်နွံဒၟံင် အကြာ (၃၂၀၀) ဒကေဝ်တုဲ ထၜိုတ်တီုတီု ဟွံဒးဗုတ်စက်ဂှ် မွဲပံင် အကြာ (၁၉၀၀) ဒကေဝ် ရာန်မံင်နွံရ။
ၜတ်ကၞာတ်စမ်ရံင် ၚုဟ်ထၜိုတ် နူကဵုဆေင်ရာန်ထၜိုတ် ရးဗ္ဂောမွဲဆေင်မ္ဂး ထၜိုတ်ကဆံင်သၠုင်အိုတ် RSS 1 (မှိုင်းသတ်) မွဲပံင် (၄၅၀၀) ဒကေဝ်၊ USS 3 ထၜိုတ်ဂတှေ်စဲတ္ၚဲ (သ္ၚးဇ္ၚး) မွဲပံင် (၄၁၀၀) ဒကေဝ်၊ USS 5 ထၜိုတ်ဂတှေ်စဲတ္ၚဲ (အရံင်မိတ်) ဂှ် မွဲပံင် အကြာ (၃၃၅၀) ကဵု (၃၆၇၀) ဒကေဝ်နွံရောင် စၟတ်တ္ၚဲ အံက်တိုဝ်ဗာ (၂၁) ဂှ် နူကဵုဆေင်ရာန်ထၜိုတ် (ရေႊကျင်ရေႊပင် ရာဘာအဝယ်ဒိုင်) ဍုင်ယှိုကျေန် ရးဗ္ဂော ဂှ် ချူပတိုန်လဝ်လတူမုက်လိက် (facebook Page) ရ။
ရံင်ကေတ်ၚုဟ်ထၜိုတ်ဍုင်မန်ကဵု ရးဗ္ဂောလတူဂှ်မ္ဂး ဗွဝ်ဖျာထၜိုတ်ဍုင်မန်ဂှ် ၚုဟ်မး သဝ်နူကဵု ရးဗ္ဂောရာန်မံင် မွဲပံင် အကြာ (၃၀၀) ဒကေဝ်ကဵု (၅၀၀) ဒကေဝ်ဒှ်မံင်ရ။
မုဟိုတ်ၚုဟ်ထၜိုတ်ဍုင်မန် ဂွံၚုဟ်သဝ်နူကဵု ရးဗ္ဂောဂှ်ဏီရော? ဒယှ်လဝ်တေံ ဍုင်မန်ဂှ် ထၜိုတ်တိတ်ဂၠိုင်အိုတ်၊ ၚုဟ်မးခိုဟ်အိုတ်၊ ဗွဝ်ဖျာကူသာန်သွံရာန်သၠဲအိုတ်တုဲ ပရေင်ပိုန်ဒြပ်ထၜိုတ်ဂှ် ဒှ်ဒၟံင်ကမၠောန်ပရေင်ပိုန်ဒြပ်ဇၞော်ဇၞော်မွဲရောင် အလုံဍုင်မွဲ ကြီုလဝ်ရ။ ဂကူကောန်ဍုင်အရင်တၞဟ်တၞဟ်တအ်လေဝ် ဟီုဒုင်ဂိုင်ကေတ်လဝ် သာ်ဂှ်ရ။ ဟိုတ်နူဒယှ်မြဟ်ဒၟံင်သာ်ဂှ်တုဲ ဂကူတၞဟ်တၞဟ်တအ် ကောန်ဍုင်တၞဟ်ဟ်တအ် လုပ်ဓလိုက်တမ်ရိုဟ် ပံက်ရုင်စက်၊ ရုင်ကမၠောန်တုဲ ကၠောန်ပရေင်ပိုန်ဒြပ်ထၜိုတ် ပ္ဍဲဍုင်မန် ဂၠိုင်တိုန်ကၠုင်ရ။
လၟုဟ်မ္ဂး ဍာ်ထၜိုတ်ဂှ် မွဲပံင်မ္ဂး ၚုဟ်မးနွံဒၟံင် အကြာ (၃၉၀၀) ဒကေဝ်ကဵု (၄၀၀၀) ဒကေဝ်ရာန်မံင်အိုတ်ရ။ ဍာ်ထၜိုတ်ဂှ် ဗုတ်ပတိတ်ထၜိုတ်ကဆံင်သၠုင်တုဲ ကှ်တုဲမ္ဂး ဍုင်မန်ဂှ် ၚုဟ်နွံမံင်မွဲပံင် အကြာ (၄၂၀၀) ကဵု (၄၃၀၀) ဟီုလဝ်သာ်ဂှ်၊ ဆဂး နူကဵု ဆေင်သွံရာန်ထၜိုတ် ရးဗ္ဂောတအ် ပံက်လဝ်ဂှ် မွဲပံင် (၄၅၀၀) ဒကေဝ်ရ။
ဍုင်မန်ဂှ် ဍုင်ထၜိုတ်တိတ်ဂၠိုင်အိုတ် ဗွဝ်ဖျာလေဝ်သၠဲလးအိုတ် ၚုဟ်မးလေဝ် ခိုဟ်အိုတ်ရောင် မြဟ်တမ်ညဝ်ဒၟံင်သာ်ဂှ်ကီုလေဝ် ကွေံကွေံဂှ် ၚုဟ်သဝ်နူရးဗ္ဂောဏီဂှ် သဘာဝဟွံစှ်ေလးလးရ။
ဗီုကဵုအလုံမွဲကၟိန်ဍုင်ဗၟာဂှ် ဗွဝ်ဖျာပရေင်ပိုန်ဒြပ်ထၜိုတ် ကဆံင်ဂွံသၠုင်ကီု၊ ပရေင်ကူသာန်သွံရာန်ပရေင်ပိုန်ထၜိုတ် ဂွံဇၞော်မောဝ်တဴတက်တိုန်ကီုတုဲ ဒက်ပ္တန်လဝ် ဂကောံတၠကမၠောန်ထၜိုတ်အလုံဍုင် ကော်ဗတ်ဗၟာ (မြန်မာနိုင်ၚံရော်ဘာ စိုက်ပျိုးထုတ်လုပ်သူများအသင်း – MRPPA) နွံရ။
တုပ်သာ်ဗီုဂှ်ကီု ပ္ဍဲဍုင်မန်လေဝ် သွက်ဂွံသၠုင်ပတိုန်ကဵု ပရေင်ဗွဝ်ဖျာ ပရေင်ပိုန်ဒြပ်ထၜိုတ်တုဲ သ္ပစၞးကဵု တၠကမၠောန် ကေုာံ တၠကၠအ်ထၜိုတ်ဗွဲမဍာံပြတုဲ ဂကောံဖန်ဇန်ကဵု ၚုဟ်ဗွဝ်ဖျာပရေင်ပိုန်ဒြပ်ထၜိုတ်ဍုင်မန်မွဲဂကောံ ထေက်ကဵုဒးနွံရ။
ဗီုဒှ်ဒၟံင်လၟုဟ်မ္ဂး ဂကောံတၠတမ်ရိုဟ်ကမၠောန်ထၜိုတ်တအ်တ္ၚဲဏံဂှ် သွက်ဂွံဒှ်ဂုန်ဖဵုကဵု သွက်ကမၠောန်ဇကု၊ သွက်ပိုန်ဒြပ်ဇကုဟေင်တုဲ ဒက်ပ္တန်လဝ်ဂှ် ဒှ်အာအရာ သွက်ဂွံဍဵုဓလိုက်ဖျေံၚုဟ်ဗွဝ်ဖျာ လ္တူတၠကမၠောန်ထၜိုတ်၊ လ္တူတၠကၠအ်ထၜိုတ်တအ် ဗီုဏံ ဒှ်ဟွံထေက်ရ။
ဗွဝ်ဖျာပရေင်ပိုန်ဒြပ်ထၜိုတ်ဍုင်မန်တ္ၚဲဏံမ္ဂး ရုင်စက်တၠကမၠောန်မန်ဂှ် နွံအောန်ကွေံကွေံတုဲ ရုင်စက်ရုင်ကမၠောန်နူဂကူညးတၞဟ်ဗွဲမဂၠိုင်ဟေင် ပ္တန်လဝ်နွံဂၠိုင်ရ။ ရံင်ကဵုမတ်ပရေင်ပိုန်ဒြပ်ထၜိုတ်ဍုင်မန်မ္ဂး ဒှ်ပၞော်ပရေင်ပိုန်ဒြပ်ဇၞော်ဇၞော်မွဲတုဲ သွက်ဂွံဇၞော်သၠဲပ္တိတ် ပၞော်ပရေင်ပိုန်ဒြပ်ထၜိုတ်၊ သွက်ဂွံသၠုင်ပတိုန်ကဆံင်ဍာ်ဒကေဝ်ထၜိုတ်တုဲ ၚုဟ်မးထၜိုတ်ညံင်ဂွံသၠုင်တိုန်အာ နူကဵု ရးတၞဟ်တၞဟ်တအ်မာန်ဂှ် ဂကောံတၠကမၠောန်တအ် ထေက်ကဵုဒးဂစာန်ရ။
နူကဵုကပေါတ်အပြောံဂှ် ပ္တိတ်ကပေါတ်(ကုန်ချော)ဟွံမာန်ကဵုဒှ်ကၠာရ ထၜိုတ်ဍုင်မန်ဇကု ဍာ်ဒကေဝ်ညံင်ဂွံသၠုင်တုဲ ညံင်ဂွံဂွံၚုဟ်မးသၠုင်သၠုင်၊ တၠကမၠောန်ကၠအ်ထၜိုတ်တအ် ဂွံဂွံၚုဟ်ခိုဟ်မာန်၊ ပရေင်ပိုန်ဒြပ်ထၜိုတ်ဍုင်မန် ညံင်ဂွံသၠုင် ဇၞော်မောဝ်တဴတက်ဂှ် တၠကမၠောန်ထၜိုတ်တအ် ပံင်ကောံ သ္ဒးဒက်ပ္တန် ပကောံမသ္ပစၞးမွဲတုဲ ပၞော်ဗွဝ်ဖျာပရေင်ပိုန်ဒြပ် ထၜိုတ်ဍုင်မန် ဂွံဇၞော်မောဝ်ဂှ် ဒးဖန်ပ္တိုန်ထေက်ရ။
လၟုဟ်မ္ဂး ဗွဝ်ဖျာပရေင်ပိုန်ဒြပ်ထၜိုတ်ဂှ် အဓိကဍုင်ကြုက်တအ် ရာန်မံင် (၇၅) က္ဍိုပ်ကၠံပြင်ပြင်နွံတုဲ သၟေဟ်နူဂှ်မ္ဂး ဍုင်မလေယှာဂှ် မရနုက်ကဵုဒုတိယ ရာန်မံင်နွံရ။ သၟေဟ်နူဂှ်ပၠန် ဍုင်ဗဳယေက်နာန်၊ ဍုင်အိန္ဒိယ၊ ဍုင်သေံ၊ ဍုင်သေင်္ဂပေါဝ်ကဵု ဍုင်ဂျပါန်တအ်လေဝ် ရာန်မံင်ဆဗၞတ်နွံကီုရ။
အလုံမွဲကၟိန်ဍုင်ဗၟာဂှ် ကၠအ်ထၜိုတ်နွံ လၟိဟ် (၁,၆၀၀,၀၀၀) ဨကပြင်ပြင်နွံတုဲ အပ္ဍဲဂှ်မ္ဂး ဍုင်မန် ပွိုင်ဍုင်မုဟ်ဍုင်ကဵု ပွိုင်ဍုင်ဇြပ်ဗုသၟးဂှ် ၅ လက်ဨကပြင်တဵုလဝ်ရောင် နူကဵု (မြန်မာနိုင်ၚံရော်ဘာစိုက်ပျိုးထုတ်လုပ်သူများအသင်း – MRPPA) တအ် ပ္တိတ်လဝ်တင်ဂၞေင်နွံရ။