ဌာန်ပရိုၚ်ဗၠးၜးမန် – ညးဍုၚ်ကွာန်ဂမၠိုၚ် ဟိုတ်နူသ္ၚောဲခြာဒၟံၚ်ကဵု ပေဲါရုဲမာဲ ပွိုၚ် (၂၀) သၞာံဂှ်ရ ပ္ဍဲပေဲါရုဲမာဲဏံ ဂွံစုတ်မာဲလေပ် ရန်တၟံတုဲ ဗော်ဒဳမဝ်ကရေဇြဳ အလုံရးမန်တအ် ကဵုဒၟံၚ်ဘာတန်ဗ္တောန် နဲကဲစုတ်မာဲရ။
“ယဝ်ရပိုဲဟွံကဵုပညာ နဲကဲစုတ်မာဲတှေ် ညးဍုၚ်ကွာန်မန်ပိုဲ စုတ်မာဲကဵု ဗော်မန်ဇကုလေဝ် ဗီုလဵုဂွံစုတ်ဂှ် ဟွံတီတုဲ မမာဲတအ်ဂှ် အုဲအာသၟးရ ဒှ်ဂၠိုၚ်၊ ဟိုတ်ဂှ်ရ ပိုဲဒးကဵုဘာ နဲကဲကဵုမာဲဏံရောၚ်” သာ်ဏံ ကမ္မတဳဗဟဵု ကဵုဘာတန်ဗ္တောန် နဲကဲစုတ်မာဲမွဲတၠ ဟီုထ္ၜးရ။
ပေဲါရုဲမာဲဝွံ ၜိုန်ရညောန်ကြပ်ကၠုၚ် အခိၚ်သှေ် ဟွံလအ်ကီုလေဝ် နဲကဲဗီုပြၚ်လဵု ဂွံစုတ်မာဲဂှ် နူကဵုကမ္မယှေန် ပေဲါရုဲမာဲကၟိန်ဍုၚ် ဟွံကဵုပညာ နဲကဲစုတ်မာဲ ကုညးဍုၚ်ကွာန်တအ်ဏီရ။
အကြာအခိၚ် မကြေပ်ဂြတ်ဂှ် ဗော်ပရေၚ်ဍုၚ်ကွာန်ဂမၠိုၚ်တအ် ဒးရုန်ဂစာန်ဒၟံၚ် သွက်ဂွံစှေ်ပရေၚ်စန္ဒက်ကီု၊ ပရေၚ်ကဵုပညာ နဲကဲဂွံစုတ်မာဲကီုရ။
“နူကဵုပိုဲတအ် ဆိၚ်ရန်လဝ်ဂှ်တှေ် စပ်ကဵုပရေၚ်ကဵုပညာ နဲကဲဂွံစုတ်မာဲဂှ် တၟံတၟံပွိုၚ်ဍုၚ် ဖျေံလဝ်ဗီုရ၊ ဆဂးတှေ် ခက်မံၚ်ကဵု ပရေၚ်ခရိတ်ဘဏ္ဍာညိတုဲ ပ္ဍဲပွိုၚ်ဍုၚ်လ္ၚဵု လဇုဲညိ” သာ်ဏံ အစာဘာ ကဵုတန်ဗ္တောန် နဲကဲစုတ်မွဲတၠ ဟီုရ။
ပ္ဍဲပေဲါရုဲမာဲ သၞာံ (၂၀၁၀) ဏံ အတိုၚ်ဗော်ဒဳမဝ်ကရေဇြဳ အလုံရးမန် ပတိုန်လဝ် တဆိပ်ဗော် အလာံၜိုပ်ဂှ် ကဝ်မရှေန် ပေဲါရုဲမာဲလေဝ် ဖျေံကဵုလဝ်တုဲ တဆိပ်ၜိုပ်ဂှ် မတ်ဍုက်ကဵု ကောန်ဂကူမန်တံဂၠိုၚ်ဂှ်ရ ဒှ်တၚ်ခိုဟ်မွဲရောၚ် ဗော်ဏံ ပတှေ်ကေတ်လဝ်ရ။
“ညးဍုၚ်ကွာန်မန် ရဲကၠုၚ်စုတ်မာဲတအ်ဂှ် ဆဵုဒးၜိုပ်ဗက် တီကၠးအာ အခါရ ဗော်မန်ဇကုတှေ် ပိုဲဟွံဒးသောၚ်ကလးဂၠိုၚ် သက်သာအာ တၟာဂလိုၚ်” ညးဟီု သာ်ဏံရ။
ပ္ဍဲတၞးမာဲ ပေဲါရုဲမာဲအလန်ဏံဝွံ ညးဍုၚ်ကွာန်တအ် ဒးရုဲစှ် စၠတ်ထဝ်ပိဗၠိုၚ် မတွံဂး စၠတ်ထဝ်ညးဍုၚ်ကွာန်၊ စၠတ်ထဝ်ကောန်ဂကူ၊ စၠတ်ထဝ် တွဵုရး ဟွံသေၚ် စၠတ်ထဝ်ရး ရ။
အပ္ဍဲညးဍုၚ်ကွာန်တအ်ဂှ် လ္ၚဵုစိုတ်လုပ်စကဵု ပရေၚ်ပေဲါရုဲမာဲလေဝ် နွံတုဲ လ္ၚဵုတံဂှ် ဟွံစှေ်စိုတ် လ္တူဂၠံၚ်တရဴ သၞောဝ်ဥပဒေကီု၊ သၞောဝ်ပေဲါရုဲမာဲကီုရ။ ရဲညးစိုတ်မလုပ်စကဵု ပရေၚ်ပေဲါရုဲမာဲဂှ်မ္ဂး တိုန်လ္ၚတ် တန်ဗ္တောန် နဲကဲသွက်ဂွံစုတ်မာဲ ပ္ဍဲဗော် ဒဳမဝ်ကရေဇြဳ အလုံရးမန် နွံရ။
“ယဝ်ဟွံဂွံဆဵုလဝ် ပ္ဍဲဘာ ကဵုပညာ နဲကဲစုတ်မာဲဂှ်တှေ် ဗီုလဵုဂွံစုတ်မာဲဂှ် မုလေဝ် ဟွံတီပုဟ်၊ လၟုဟ် ရဲဗော်တအ် ထ္ၜးကဵုတုဲမှ ဂွံကၠးတိုန်၊ အပ္ဍဲကွးဘာပိုဲလေဝ် ပ္ဍဲဘာဂှ် ပိုဲစုတ်စမ်ရံၚ်မာဲ မၞိဟ် (၁၅) တၠ၊ ဂွံ (၆) မာဲဓဝ်၊ မာဲလီုအာ (၉) မာဲရ” သာ်ဏံ ကွးဘာတိုန်လ္ၚတ်လဝ် နဲကဲကဵုမာဲမွဲတၠ ဟီုထ္ၜးရ။
သအာၚ်နူဗော်ဒဳမဝ်ကရေဇြဳ အလုံရးမန်တုဲ ဗော်ခိုၚ်ကၠိုက်ဖောအ်ဗြေဝ်တအ်လေဝ် နနဲတိုန်မွဲသ္ၚိ စှေ်မွဲသ္ၚိ သ္ပပေဲါသောၚ်ကလးတုဲ စှေ်ပရေၚ်စန္ဒက် သီုနဲကဲစုတ်မာဲရ။
0 Comments