ဂျူရဳဆာဲ – တမ်ဒပ် ခလရ (၃၂) မဖျေံလဝ်သဇိုၚ် ပ္ဍဲပယျဵုသေံကဵုဗၟာ တလူဍုၚ်ကျာ်ပိဂှ် ပ္ဍဲဂိတုအံက်တဝ်ဘာ ၃ ဂှ် ရပ်တံၚ်ဏာပဝ်တာ ကောန်ကွာန်ရ။
ဒပ် ခလရ (၃၂) ဝွံ သွက်ဂွံပြံၚ်လှာဲ ဒပ်ကဵု တမ်ဒပ် ခလရ (၂၈၃) တုဲ အဃောကလေၚ်စဴအာ အကြာဂၠံၚ်ဂှ် မကော်တံၚ်ဏာ ကောန်ကွာန်တံရောၚ် ဂွံတီကေတ်ရ။
ညးဒဒုၚ်ရပ်တံဂှ် မဒှ်ကောန်ကွာန် မၞုံဒၟံၚ် ပွဳဗွူကျာ်ပိ ကွာန်မၞုံလ္ပာ်သၟဝ်ကွာန်ကြုၚ်ထဝ်တံရ။ ကောန်ကွာန် ၆ တၠ ဒးဒုၚ်ရပ်ဏာရောၚ် ညးမလုပ်ဂကောံ ဗော်ဍုၚ်မန်တၟိမွဲတၠ ဟီုရ။
“ဍေံရပ်ဏာ ၜိုတ်အခိၚ်သဝ်တ္ၚဲလေဝ် ဒဵုကဵုအခိၚ်လၟုဟ် ဟွံကလေၚ်ဗၠးကၠုၚ်ဏီပုဟ်” ဂှ် ညးဟီုရ။
ဆဏံသၟးဟွံက မွဲဒမြိပ်ဂၠံၚ်တရဴ ဒပ်ပၞာန်ဗၟာတံဏံအာဂှ်တှေ် ကောန်ကွာန်တံ သွက်ဂွံဒးဒုၚ်ရပ်အာ နွံမံၚ်ဏီဂှ်လေဝ် ညးဆက်ဟီုရ။
အပ္ဍဲမၞိဟ်ဒးဒုၚ်ရပ် ၆ တၠဂှ် ဥက္ကဌကွာန်မိပြၚ်တြေံ နာဲကျဝ်ယေန်လေဝ်ပါအာကီုရ။ ဍေံတံတံၚ်ကော်ဏာ နူဂြိပ်မွဲမွဲဒၞာဲဒှ်မာန်ရောၚ် ဂကောံရပ်စပ်ဂဥုဲၜူမာဲ နူဗော်ဍုၚ်မန်တၟိ ဟီုရ။
“ညးဒးဒုၚ်ရပ်လဝ်ဖအိုတ်ဂှ် ရဲကွာန်မိပြၚ်ဖအိုတ် မိၚ်မံၚ်ဟဂှ်လေဝ် ဆဂး ချိုတ်ပၠိုတ်ဂှ်ဟွံတီဏီပုဟ် ဂၠိုက်ဂၠာဲဒၟံၚ်ဖိုဟ်ရ” ဂှ် ညးဟီုရ။
အခိၚ်ကၠာတေံမ္ဂး ဒပ်မဖျေံသဇိုၚ် လတူဍုၚ်ကျာ်ပိတံ ယဝ်ပြံၚ်လှာဲဒပ်ပၞာန်ဏောၚ်ဒှ်မ္ဂး သွက်ဒပ်ညးတံဂှ်ဒးကေတ်ကောန်ပဝ်တာဂှ် စၞောန်ကဵု မယကတုဲ ကဵုဂၠာဲလိၚ်ရ။ စရိတ်ၚုဟ်လိၚ်အိုတ်သီုဂှ် နူမယကတံ ဒးဒုၚ်ကဵုဖအိုတ်ရ။ ဆဂးဂှ် ဒပ်ပၞာန်ပြံၚ်လှာဲအလန်ဏံဂှ် နူတမ်ဒပ် ခလရ (၃၂) တံ မွဲသာ်လေဝ် ဟွံဟီုရ။
ပ္ဋဲဂိတုဂျူလာၚ်တေံလေဝ် ဒုသ္ကိုပ်တမ်ဒပ် ဗိုလ်ဇၞော် ကျဝ်သိုဝ်လောန် က္ဋိုက်က္ဋိုပ်တုဲ ရပ်တံၚ်ဏာပဝ်တာ ဂကောံဒပ်အရန် ဗော်ဍုၚ်မန်တၟိ ပိတၠရ။
အလဵုအသဳကဵု ဗော်ဍုၚ်မန်တၟိတံ အခိၚ်ဒေံါကၠုၚ်လဝ်ပန်ပှော်တေံဂှ် ကေတ်ကၠုၚ်လဝ် ဓဝ်ပလိုဟ်ညးသကအ် ဂကောံလဵုမှလေဝ် ဟွံဂွံရပ်ပဝ်တာပုဟ်ဂှ် တုပ်လဝ်စိုတ်နွံရ။
