ပ္ဍဲကဵုဇရေင်တၠကမၠောန်ကၠအ် မၞုံမွဲဒမြိပ်ဍုင်ကလိင်အံင် နူကွာန်ဌာန်ဇၞူ၊ ပွိုင်ဍုင်ဍာ်ဗု၊ ရးတၞင်သဳတံဂှ် စပ္တံနူဂိတုမာတ်သတ္တဟတတိယတုဲကၠုင်ဏံ နူဂကောံသၟဝ်တဲ ဗော်သွးကရေင် ကေအေန်ယူ တံ ကံက်မံင်အခေါန် ဆေင်စပ်ကဵုကမၠောန်နွံရောင် ညးဒေသတံ ဟီုရ။

ကောန်ဂကောံ နူတမ်ဒပ် (၉၊ ၁၀၊ ၁၂)၊ သၟဝ်မဟာဒပ် (၄) ကေုာံ တမ်ဒပ် (၂၇) သၟဝ်မဟာဒပ် (၆) ဗော်သွးကရေင် ကေအေန်ယူ တံ ကၠုင်စိုပ်ကံက်ဒမံင်အခေါန်ရ။

ကောန်ဂကောံနူတမ်ဒပ်ဂမၠိုင်ဂှ်ဝွံ သၟာင်နူကံက်ကေတ်အခေါန် ပ္ဍဲဇရေင်ညးကၠောန် ကမၠောန်သတ်ကဵု ထ္ၜိုတ်တံ ငုဟ်တိမွဲဨက (၂) ဠက်တုဲ ကုညးကၠောန်မံင်ကမၠောန် ပရေင်သွံရာန်တံဂှ်လေဝ် ကၠုင်စိုပ်ကံက်ကေတ်ဒမံင် အကြာ (၅ – ၁၀) ကိုဋ်ကီုရောင် ညးဒေသဍာ်ဗုမွဲတၠ ဟီုရ။

“ဇၟာပ်ကွာန် နွံမံင်လ္တူဂၠိုင်ဇၞော် စၟတ် (၈) ဂှ် ဒးကဵုအခေါန်ဗီုဂှ်ရ။ စနူကၞောတ်ဂိတုမာတ်အိုတ်ဂှ် ကံက်မံင်ရ။ မုပကံက်ရောဂှ် ကောန်ကွာန်တံသၟာန်လေဝ် ဟွံဂွံပုဟ်။ ကံက်လၟုဟ်တှ်ေ ကဵုလၟုဟ်။ အဆင့်လ္တူဂှ်တှ်ေ ပသောင်ကေတ်ဏောင် ဂးမံင်ရ” သာ်ဝွံ ညးဒေသဍာ်ဗုဂှ် ဟီုရ။

နူဂကောံ ကေအေန်ယူ တံ ကၠာဟွံကံက်အခေါန်ဂှ်မ္ဂး ဒစးဒုင်ကဵုပရိုင် ကုဂကောံအုပ်ဓုပ်အရာပ်/ကွာန် မဆေင်စပ်တံနွံကီုလေဝ် ဗွဲမဂၠိုင်ဂှ်မ္ဂး သၟာင်နူဒစးဒုင်ဟွံကဵုပရိုင်တုဲ ကုတၠကမၠောန်ဂမၠိုင်ဂှ်လေဝ် ဟွံဟီုဂးသောင်ကလး ကိစ္စကံက်အခေါန်ဂှ်ရ။

တုပ်သာ်ဝွံကီု နူဗော်သွးကရေင် ကေအေန်ယူ တံလေဝ် ပ္ညဳပ္ညပ်သဳကၠဳလဝ်ကဵု ဂကောံဒပ်ပၠန်ဂတးအပ္ဍဲဒေသတံ ဟွံမွဲဏီရောင် ညးတမ်ရိုဟ်ပရိုင်ပၠန်ဂတးမွဲတၠ ဟီုရ။

“အစဳဇန်ဏံဂှ်တှ်ေ ပ္ညဳပ္ညပ်သဳကၠဳလဝ်ကဵု ဂကောံ PDF တံကဵု ဂကောံပၠန်ဂတးမန် အပ္ဍဲဒေသဂှ် ဟွံမွဲဏီပုဟ်။ ကၠောန်သ္ပမံင်ဗီုဏံဏောင်တှ်ေ အကြာဂကောံပၠန်ဂတးမွဲစွံတံ ပရေင်ညဳသၟဟ်လီုလာ်အာမာန်ဏောင်” သာ်ဝွံ ညးတမ်ရိုဟ်ပရိုင်ပၠန်ဂတးဂှ် ဟီုရ။

ညးအုပ်ကာ ခရိုင်ဗိက်-ထဝဲါ ဗော်သွးကရေင် ကေအေန်ယူ ပဒိုဝ်သဝ်အေဝ်ဏာ ဝွံ ဆေင်စပ်ကဵု ပရူဒဒှ်ဏံတုဲ ဟွံဂွံတီကေတ်လဝ် ချိုတ်ချိုတ်ပၠိုတ်ပၠိုတ်ဏီရဂှ်လေဝ် ဟီုကဵုဌာန်ပရိုင်ဗၠးၜးမန် IMNA ရ။

“ပြဟ်ပြဟ်ဏံ အဲ မုဟွံမိင်ကေတ်ဏီပုဟ်။ ဒးက္လေင်သၟာန် မၞိဟ်ပ္ဍဲဗလးတိတံ မွဲတဲဏောင်” သာ်ဝွံ ညးဟီုရ။

မွဲဒမြိပ်ဍုင်ကလိင်အံင် နူဌာန်ဇၞူ မၞုံသ္ကုတ်ဂၠိုင်ဇၞော် စၟတ် (၈)၊ ရေဝ်-ထဝဲါဂှ်ဝွံ ဒပ်ပၠန်ဂတး မန်၊ ဒပ်ဗၠးၜးကရေင် KNLA ကေုာံ ဒပ်စဵုဒၞာညးဍုင်ကွာန်ဂမၠိုင်တံ ဖျေံသဇိုင် ဖျေံလဝ်ဒပ်တုဲ ပိုင်ကောံထိင်ဒဝ် (ထိင်ဒက်) လဝ်ရောင် ဂွံတီကေတ်ရ။

ပ္ဍဲကဵုမွဲဒမြိပ်သ္ကုတ်ဂၠိုင်ဂှ်ဝွံ ကွာန်မန်နွံဒမံင် ဟွံအောန်နူ (၂၀) ကွာန်တုဲ ဗွဲမဂၠိုင်င်တံဂှ် အဓိက ကၠောန်မံင်ကမၠောန်တဵုလွဳရောင် ဂွံတီကေတ်ရ။