မာံအဲ – ဗော်ဍုၚ်မန်တၟိဝွံ မဒှ်ဗော်ဟွံလုပ်ကဵုသၞောဝ်ရရောၚ် နူအလဵုအသဳတံ ဟွံလလောၚ်တြး ချိူတ်ချိူတ်ပၠိုတ်ပၠိုတ်ဏီလေဝ် ရုၚ်ဗော်ဍုၚ်မန်တၟိလ္တူဍုၚ်လ္ၚဵုတံ ဒးဒုၚ်ပလှ်လိက်ဂတဵုယၟူရုၚ်ရ။
ကြဴနူညးတာလျိုၚ်ဗော်ဍုၚ်မန်တၟိ ကလေၚ်စဴကၠုၚ်ဒၞာဲအိုတ်တုဲ ရုၚ်ဗော်ဍုၚ်မန်တၟိလတူဍုၚ်လဂုၚ်၊ မတ်မလီု၊ ဇြပ်ဗု၊ ရေဝ်တံဂှ် နူကဵုဂကောံအလဵုတအ် ထ္ၜးဟိုတ် ဗီုပြၚ်ဗော်ဟွံလုပ်သၞောဝ်တုဲ သတ္တဟတုဲကၠုၚ်ဂှ် ဗလးမၞိဟ် စကာကဵုဖျေံထောံဂတဵုလိက်ဗါန်စွံလဝ် ပ္ဍဲရုၚ်အိုတ်ရ။
“နူညးတာလျိုၚ်ရုၚ်ပိုဲဟွံမွဲတုဲဂှ် သှေ်မံၚ်ဆမၞိဟ်မၚ်ရုၚ်မွဲဟေၚ်ရ ရုၚ်သီုဖအိုတ်ဂှ် ဒးမံၚ်ဗီုပြၚ်သ္ၚိညးကွာန်ဓမ္မတာမွဲ ဍေံတအ် ထ္ၜးဟိုတ်ဗော်လုပ်သၞောဝ်တုဲ ဆိုၚ်ပုဒ်ဗစူလဝ်တအ်ဂှ်လေဝ် နူစရဖတံ ကၠုၚ်ဟီု ညံၚ်ကဵုဂွံဖျေံထောံရ။ ပရေၚ်ချဳဒရာၚ်ကမၠောန်ရုၚ်တအ်ဂှ် မုလေဝ်ဟွံမွဲ ဗီုလတေံရ” သာ်ဏအ် ကောန်ဗော်မွဲတၠဟီုရ။
အကာဲအရာအလဵုအသဳပၞာန်ကဵု ဗော်ဍုၚ်မန်တၟိ လောန်ကၠုၚ် နူဂိတုသေပ်တေမ်ပါ (၁) တေံ ဒဵုကဵုတ္ၚဲဏအ် အတိုၚ်တြေံဖိုဟ်ရ၊ ပရေၚ်ဗော်ဟွံလုပ်ကဵုသၞောဝ်၊ ဒေံါပန်ပှော်လီုအာညးသကအ် ချိူတ်ချိူတ်ပၠိုတ်ပၠိုတ်ဂှ် နူကဵုအလဵုအသဳတအ်ဟွံဂွံ လလောၚ်တြးပတိတ်လဝ်လိက်ဏီရ။
“လၟုဟ် ဗော်ပိုဲကဵု အလဵုအသဳဂှ် ပရေၚ်ပဋိပက္ခ မုလေဝ်ဟွံမွဲဏီပုဟ် ဍေံတအ်ထ္ၜးဟိုတ်ကဵု ဗော်ဟွံလုပ်သၞောဝ်တုဲ ဍေံကဵုဖျေံတှေ် ဗီုပြၚ်ဍေံဂှ်တှေ် စပ်မံၚ် ညံၚ်ကဵု ပလီုဒေါံပန်ပှော်ကီုရရောၚ် အဓိကဂှ် ကၠောန်သ္ပဗီုဏအ်တှေ် ချိူတ်ချိူတ်ပၠိုတ်ပၠိုတ် လလောၚ်တြးလဝ်တုဲမှ ကၠောန်ဂွံရောၚ်။” သာ်ဏအ် ကမ္မတီခရိုၚ်မွဲတၠဟီုရ။
အတိုၚ်ညးလ္ၚတ် ပရေၚ်ဍုၚ်ကွာန်မွဲတၠဟီုဂှ်မ္ဂး “ဟိုတ်နူဗော်ဍုၚ်မန်တၟိ ပတိတ်လိက်လလောၚ်တြး စပ်ကဵုပေဲါရုဲမာဲ ဟွံပၠုပ်အရီု၊ ဟွံသ္ပသမ္တီကဵုပေဲါရုဲမာဲ ၂၀၁၀၊ ဟွံဒုၚ်တဲသၞောတ်ဝ် ဒက်ပတန် ကၟိန်ဍေံတုဲ အလဵုအသဳတအ် ကလေၚ်ကရေပ်ဓရတ် ကဵုပတိတ်ထောံ ဂတဵုလိက်ယၟုရုၚ် ဒှ်မာန်ရောၚ်” သာ်ဏအ် သၟာပရေၚ်ဍုၚ်ကွာန်မွဲ ဟီုထ္ၜးနကဵုညာတ်ညးရ။
နူဂိတုအေဗရာ (၂၂) တေံလေဝ် ဗော်ဍုၚ်မန်တၟိ ကယျာန်တးပဲါလဝ် ကိစ္စစပ်ကဵု ဒပ်မၚ်ပယျဵုတုဲ ပ္ဍဲဂိတုအဝ်ဂါတ် (၂၃) ဂှ် သကိုပ်ပၞာန်တိတ်နာၚ်ဝေန် ဆဵုဂဗကဵု ညးတာလျိုၚ် ဗော်ဍုၚ်မန်တၟိ ပ္ဍဲဌာန်ဂအုပ်ပၞာန် ရးဒိုဟ်အဂၞဲတုဲ ပ္ဍဲစၟတ်တ္ၚဲ (၁) ဂိတုသေပ်တေန်ဗာဂှ် ဓရောပ်ဓရတ် ကဵုဗော်ဍုၚ်မန်တၟိ အပ်လွဟ်နွံကၠုၚ်ရ။
ရံၚ်ကဵုအကာဲအရာလၟုဟ်လေဝ် ဟိုတ်နူဗော်ဍုၚ်မန်တၟိ ပတိတ်လိက်လလောၚ်တြး ဒစဵုဒစး ပေဲါရုဲမာဲ ဟွံသ္ပစၟတ်သမ္တီကဵုပေဲါရုဲမာဲဍေံတအ်ရဒှ်မာန် သာ်ဏအ် ညးဆက်ဟီုရ။
0 Comments