ပ္ဍဲလ္ပာ်ကွာန်မေအ်ဖထဝ်၊ မၞုံဒေသကျာ်ပိ၊ ပွိုၚ်ဍုၚ်လှာဒကှ်၊ တွဵုရးကရေၚ်ဂှ်ဝွံ ကမ္မယှေန်ပၞာန်တံ ပန်ဗ္တိုက်ထောံဖျေံဗမ်ကဵု စက်ဗရုသာဲတုဲ မၞိဟ်ဒးဘဲချိုတ်ဂျိုၚ်နွံရောၚ် ဂွံတီကေတ် နူတမ်ရိုဟ်ပရိုၚ်အပ္ဍဲဒေသရ။

ဂိတုမာတ် (၃၁)၊ နူတနေံဏံ အခိၚ်ဗဂါပ်ဂယး ၜိုတ် (၁၁) နာဍဳဝွံ ပ္ဍဲကွာန်မေအ်ဖထဝ်၊ မၞုံဗဒဲါဂအာၚ်ကၠောန်မာၚ်ဖကောဝ်ဂှ် ကမ္မယှေန်ပၞာန်တံ ပန်ဗ္တိုက်ထောံဖျေံဗမ်ကဵု စက်ဗရုသာဲ (၂) မရ။

ဟိုတ်နူဒးဒုၚ်ပန်ဗ္တိုက်ထောံဖျေံဗမ်ကဵု စက်ဗရုသာဲဂှ်ရ ညးဗြဴမွဲတၠကဵု ညးတြုံမွဲတၠ ဒးဘဲချိုတ်အာတုဲ စမြိုၚ်လ္ၚဵုတံလေဝ် လီုလာ်အာနွံရောၚ် ညးဒေသတံ ဟီုရ။

“ပ္ဍဲကဵုသ္ကဲဂၠံၚ်အာဒၞာဲဂအာၚ်မာၚ် နူမက္ကသာ ကွာန်လ္ပာ်တေံ (မေအ်ဖထဝ်) ဂှ် ဍေံတံ ကၠုၚ်ထောံဖျေံဗမ်ရ။ ကဵုၜၚ်ကျာဂှ် ဟွံသေၚ်ပုဟ်။ နကဵုဒရုၚ် ကၠုၚ်ထောံဖျေံဗမ်ၜါမရ။ ဒးအာၜါတၠရ။ ညးမွဲဂှ်တှေ် ညးတြုံ ဒးအာဘဲ ဟွံသာရ။ တုဲတှေ် ညးဒးဘဲဝပ်ထပ်နွံ/ဟၟဲဂှ် ပိုဲတံ ဟွံတီဏီပုဟ်” သာ်ဝွံ ညးဗြဴ နူဒေသမက္ကသာမွဲတၠ ဟီုကဵုဌာန်ပရိုၚ်ဗၠးၜးမန်ရ။

ကွာန်မေအ်ဖထဝ်ဝွံ နွံတန်တဴဒၟံၚ် ပ္ဍဲဒေသတိဍာ် ခရိုၚ်ဒူပလာယာ၊ ဗော်သွးကရေၚ် ကေအေန်ယူတုဲ သၟာကမၠောန်ၜံက်ခဲါမာၚ်ဖကောဝ် မံၚ်တန်တဴဂၠိုၚ်အိုတ်ရောၚ် ဂးရ။

ပ္ဍဲကဵုပွဳဗွိုၚ်ဗဒဲါဂအာၚ်ကၠောန်မာၚ်ဖကောဝ် မၞုံဒေသဂှ်ဝွံ ကောန်ဂကောံ ဒပ်ဗၠးၜးကရေၚ် KNLA ဒၟံၚ်တန်တဴအာကၠုၚ်မံၚ်နွံဂှ်ရ လ္ပာ်ဒပ်ကမ္မယှေန်ပၞာန်တံ ကၠုၚ်စိုပ်ပန်ဗ္တိုက်မံၚ်ကဵု က္ၜၚ်ကျာ၊ လွဟ်ဇၞော်၊ စက်ဗရုသာဲ မွဲနှေံမွဲနှေံရဂှ် ညးဒေသကျာ်ပိမွဲတၠ ဟီုရ။

“ပ္ဍဲပွဳဗွိုၚ်မက္ကသာဂှ်တှေ် လ္ပာ်ကမ္မယှေန်ပၞာန်တံ ကၠုၚ်ထောံဖျေံမံၚ်ဗမ် မွဲနှေံမွဲနှေံရ။ ဆဠတှေ် မၞိဟ်ဒးဘဲဝပ်လေဝ်နွံရ။ ဆဠတှေ်လေဝ် ဟွံဒးပုဟ်။ ဨလ္ပာ်ဂှ်လေဝ် ကေအေန်ယူ၊ ဂကောံပၠန်ဂတးတံ နွံမံၚ်ပၠန်ရ။ ညအ်ဂှ်တှေ် သွက်ကမ္မယှေန်ပၞာန်တံ ဒှ်မံၚ်အလောန်မွဲရ။ မွဲနှေံထောံ၊ မွဲနှေံဒေံါ” သာ်ဝွံ ညးဒေသကျာ်ပိဂှ် ဟီုရ။

ဒၞာဲဂအာၚ်ကၠောန်မာၚ်ဖကောဝ် မၞုံဗဒဲါဒေသကျာ်ပိ၊ တိဍာ်ဗော်သွးကရေၚ် (ကေအေန်ယူ) ထိၚ်ဒဝ်ဂှ်ဝွံ နူတမ်ဒပ်ကမ္မယှေန်ပၞာန် ဖျေံသဇိုၚ်လှာဒကှ်တံ ပန်မံၚ်ကဵု လွဟ်ဇၞော်၊ က္ၜၚ်ကျာ၊ စက်ဗရုသာဲ ကေုာံ ဂေတ်ပဝ်မံၚ်ကၚ် မွဲနှေံမွဲနှေံနွံရောၚ် ဂွံတီကေတ်ရ။