ဂိတုအံက်တဝ်ဗာ စၟတ်တ္ၚဲ (၂) နူတနေံဏအ်ဝွံ ပ္ဍဲပယျဵုသေံ-ဗၟာ ဒေသကျာ်ပိ သၟတ်ကွးဘာတက္ကလိုလ်ကောန်ဍုၚ်ဂျပါန် (၂) တၠ၊ ဒးဒုၚ်လီဠာန်ဏာလဝ် လ္ပါ်ကၟိန်ဍုၚ်ဗၟာဂှ် ဗၠာဲသၟိၚ်ပွိုၚ်ဍုၚ်သၚ်္ခဠၜုရဳကဵု ရုၚ်ကလုတ်ဂျပါန်တအ် ဆဵုဂ္ဗသဳကၠဳပံၚ်တောဲတုဲ အာစိုပ်နုက်ပတိတ်လဝ်နွံရောၚ် အတိုၚ်တမ်ရိုဟ်ပရိုၚ်သေံ ကမ္မရဳ/သၚ်္ခဠၜုရဳတအ် ပတိုန်ထ္ၜးလဝ်ဂှ် ဂွံဆဵုကေတ်ရ။
အတိုၚ်ညးတာလျိုၚ်သေံတအ် စၟဳစၟတ်သၟာန်သၟုက်ဂှ်မ္ဂး သၟတ်ကောန်ဍုၚ်ဂျပါန် မၞုံအာယုက် (၂၀) သၞာံမွဲတၠ ကဵု (၂၁) သၞာံမွဲတၠဂှ် နူကဵုဂကောံဂိုဏ်ကူသာန်သွံမၞိဟ်တအ် လီဠာန်ကော်ဏာ သွက်သ္ဂောံကဵုကမၠောန် နကဵုဩန်ဂိတုခိုဟ်ဟ်ဂးတုဲ နူသၚ်္ခဠၜုရဳဂှ် ကော်ဏာ လ္ပါ်ကၟိန်ဍုၚ်ဗၟာ ဒေသပယျဵုကျာ်ပိဂှ်မွဲဒၞါဲရ။
ဂကောံဂိုဏ်လီဠာန်ကူသာန်သွံမၞိဟ်တအ်ဝွံ ရပ်ကော်ဏာ ကောန်ဍုၚ်ဂျပါန်ၜါတၠဏအ် ပ္ဍဲခဒမ်လီဠာန်ဩန်အန်လာၚ် မၞုံဒေသဍုၚ်ကျာ်ပိမွဲဒၞါဲတုဲ သွက်ကောန်ကမၠောန်တအ်ဂှ် ဗွဲမကြာန်ဓဇန် ရပ်စကာကဵုကၠောန်မံၚ်ကမၠောန်ကီု ပ္ဍဲကဵုခဒမ်လီဠာန်ဩန်အန်လာၚ်ဂှ်မ္ဂး ကောန်ဍုၚ်ဂျပါန်တအ် နွံမံၚ်ဗွဲမဂၠိုၚ်ရောၚ် ဂးရ။
မွဲကရောံဂှ်ဝွံ သၟတ်ကောန်ဍုၚ်ဂျပါန်ၜါတၠဏအ် ကၠတ်ကေတ်အဆက်နကဵုဖုၚ် ပလံၚ်ဏာ (Location) ဒၞါဲဇကုနွံဂှ်တုဲ ကေတ်အရီုဗၚ် ကဵုပရိုၚ်ကုရုၚ်ကလုတ်ဂျပါန် ကေုာံ ဂကောံသ္ၚိကၟိန်တအ်အိုတ်ရ။
နူကဵုဗၠာဲသၟိၚ်ပွိုၚ်ဍုၚ်သၚ်္ခဠၜုရဳကဵု ရုၚ်ကလုတ်ဂျပါန်တအ် ဂွံပရိုၚ် ဆဵုဂ္ဗသဳကၠဳပံၚ်တောဲ ညးသ္ကအ်တုဲ အာစိုပ်ပ္ဍဲပယျဵုသေံ-ဗၟာ ဒေသကျာ်ပိဂှ် နုက်ပတိတ်နၚ်သၟတ်ကောန်ဍုၚ်ဂျပါန် နူသၟဝ်တဲ ဂကောံဂိုဏ်ညးကူသာန်သွံမၞိဟ်တအ်ဂှ်မာန်ရ။
သၟတ်ကောန်ဍုၚ်ဂျပါန်ၜါတၠဏအ်ဝွံ တုဲကၠုၚ်ဂိတုသေတ်တေမ်ဗာ စၟတ်တ္ၚဲ (၁၀) ဂှ် ဒးဒုၚ်လီဠာန်ကော်ဏာလဝ် နူကဵုသၞေဟ်သုဝဏ္ဏဘူမိ ဍုၚ်ဇၞော်ၜၚ်ကံက်တေံမွဲတဆံၚ် လုပ်ကၠုၚ်ဍုၚ်သေံတုဲ နူကဵုဂှ်ပၠန် လီကော်ဏာ လ္ပါ်ဒေသကမ္မရဳ ပွိုၚ်ဍုၚ်သၚ်္ခဠၜုရဳတုဲ ပွိုၚ် (၂၀) တ္ၚဲ လီဠာန်ကော်လဝ် သၟတ်ကောန်ဍုၚ်ဂျပါန်ၜါတၠဏအ်ရ။
ဗၠာဲသၟိၚ်ပွိုၚ်ဍုၚ်သၚ်္ခဠၜုရဳ၊ ကမ္မရဳတအ်ဝွံ နူကဵုပရူဒဒှ်ကူသာန်သွံမၞိဟ်မံက်တိတ်ကၠုၚ်တုဲ အဆက်ဖဵုလက်ကြဴ ဂကောံဂိုဏ်လီဠာန်ကူသာန်သွံမၞိဟ်တအ်ဂှ် ပတေၚ်ပရေၚ်ဂီုကၠီု စၟဳစၟတ်အာ ဗွဲမတေၚ်ဂြတ်တုဲ ပရူဒဒှ်ဍာံ ရပ်ကော်ကောန်ဍုၚ်ဂျပါန်ၜါတၠဂှ် ကလေၚ်ဂၠိုက်ဂၠာဲ ကေတ်အာအရေဝ် ကုဂကောံဂိုဏ် ညးကူသာန်သွံမၞိဟ်တအ်ဂှ်ရောၚ် ဂွံတီကေတ်ရ။