နာဲမာန် – ပ္ဍဲကဵုဆေၚ်ဖျာဂမၠိုၚ် စၞစသုၚ်နာနာ တြးသွံမံၚ်ဂှ် နူကဵုဌာန မဆေၚ်စပ်တအ် ပါ်ဓါတ်တုဲ ပ္ဍဲကဵုစၞစသုၚ်လ္ၚဵု ဓါတ်ဂျိ ပါမံၚ်တုဲ စသုၚ်ဒးလအ်လအ်မ္ဂး ဒှ်ဘဲအန္တရာဲမာန်မံၚ်ရောၚ် နူကဵုဌာန်ပရိုၚ် အလဵုအသဳချူဓမံက်လဝ် နွံရ။
စၞစသုၚ်ဂမၠိုၚ်ဂှ် မပ္တံကဵု ကၠေၚ်မြေက် တဆိပ် (ရေႊပျံလႊား)၊ ယှေဝ်မြေက်ခၟိက် တဆိပ် (ကောၚ်းမှကောၚ်း)၊ ကၠေၚ်မြေက် ဗ္ကေတ် ကဵု သာ်ခၞော်မၚ်ဂုတ် တဆိပ်(စိန်ဟသာၚ်္)၊ ကၠေၚ်မြေက် တဆိပ် (စိန်သရဖူ)၊ ကၠေၚ်မြေက်ကသိုန်ဗ္တာၚ် ဗ္ကေတ်ကဵု သာ်ခၞော်မၚ်ဂုတ် တဆိပ် (သရဖီပန်း)၊ ကၠေၚ်မြေက်ကသိုန်ဗ္တာၚ် တဆိပ် (သန်းကြွယ်)၊ ကၠေၚ်မြေက် ဗ္ကေတ်ကဵု သာ်ခၞော်မၚ်ဂုတ် တဆိပ် (ရေႊလၚ်းယုန်)၊ ကၠေၚ်မြေက် သာ်ခၞော်မၚ်ဂၠန် တဆိပ် (မြားနတ်မောၚ်)၊ ကၠေၚ်မြေက်မၚ်ဂၠန် တဆိပ် (ယုဇန)၊ မြေက်ခၟိက်စိန်န် တဆိပ် (မၚ်းသူကျော်)၊ ခရံက်ခၟုက် (နတ်သုဒ္ဓါ) ကဵု ဂျေဝ်လဳ တဆိပ် (Well) တံ မဒှ်အိုတ်ရ။
“ကပေါတ်စၞစ ဟလိုၚ်ဂှ် ပ္ဍဲကၟိန်ဍုၚ်ပိုဲဏံ စၞစလဵုလေဝ် ဂွံပါ်လဝ်ဓါတ် ချိုတ်တ်ပၠိုတ် ဟွံမွဲပုဟ်၊ ဆေၚ်ကဵုမြေက်ခၟိက်စိန်န်ဏံဂှ် ကၠာတေံ ပိုဲလေဝ် ကေၚ်ကၠောန်သွံလဝ်ရ၊ ယၟုတဆိပ်ဂှ် စုတ်ကေတ်ရ၊ ပ္ဍဲကဵု မြေက်ဂှ်တှေ် ၝမြေက်သွံစ ဟွံဂွိုအ် သှေ်နူဖျာ ခၟိက်မြေက်တအ်ဂှ် တုဲတှေ် နှဴကဵုတိဗ္ကေတ် အရံၚ်ဂွံခိုဟ်၊ တုဲတှေ် နှဴစုတ်ထောံ မြေက်ခၞေက် ဍေံဂွံရိၚ် ကၠောန်မံၚ်ဗီုဂှ် ညးမွဲလေဝ် ဟွံတီပုဟ်၊ သွံမံၚ်အတိုၚ်ဂှ် ဌာနမဆေၚ်စပ်လဵုလေဝ် သက်ဂွံဒးစၟဳစၟတ် ဟွံမွဲပုဟ်” သာ်ဏံ ညးကေၚ်ကၠောန်လဝ် မြေက်ခၟိက် လ္တူဍုၚ်မတ်မလီု အရာပ်ကုန်တခဳ (စာရေးကြီးကုန်း) မွဲတၠ လဴကဵုရ။
စၞစသုၚ် ဟွံထေက်ဂမၠိုၚ်တအ်ဂှ် ညးဍုၚ်ကွာန်တအ် ဟိုတ်နူဟွံဗှ်လိက်ပရိုၚ်တုဲ ညးမွဲလေဝ် ဟွံစွံဂရု ရပ်စပ်သုၚ်စောဲဒၟံၚ် အတိုၚ်တြေံဖိုဟ်ရ။ ဗွဲမဂၠိုၚ် ဒေသရးတအ်ဂှ် ဟွံပဲါဂၠာဲတုဲ ဗဟုသုတလေဝ် အောန်ရ၊ ရဲသၟာမၠောန်ဂမၠိုၚ်တအ် စပ္တံနူကဵု မြေက်ခၟိက်၊ ခရံက်ခၟုက် ကၠေၚ်မြေက်တအ် စသုၚ်ရပ်စပ်ဂၠိုၚ်ရ။
စၞစသုၚ်အလဵုအသဳ ဓမံက်ထ္ၜးလဝ် သီုတဆိပ်ဂမၠိုၚ်ဂှ် ယဝ်ရစၟဳစၟတ် ဆဵုဒးသွံဒၟံၚ် ပ္ဍဲဆေၚ်ဖျာမ္ဂး ကေတ်အရေဝ် နကဵုဥပဒေ ကောန်ဂကူ စၞစသုၚ် ၝောံပိုဒ် -၂၈ (က) ရောၚ်ဂှ်လေဝ် ပ္ဍဲလိက်ပရိုၚ် အလဵုအသဳဂှ် ချူဓမံက်လဝ်ကီုရ။
