မာံအဲ – အကြာတ္ၚဲဏအ်ဂှ် မွဲဒမြိပ် ဂၠံၚ်ကွဳစက်ဇၞော် နူပွိုၚ်ဍုၚ်ဇြပ်ဗု စဵုကဵုစိုပ် ပွိုၚ်ဍုၚ်ရေဝ် ဆဵုညာတ်ဒၟံၚ် ဒပ်ပၞာန်ဗၟာတအ် ထုဲခၠန်မံၚ်တုဲ ညးဍုၚ်ကွာန်တအ် ဖေက်ဂၟံက်မံၚ် ဂွိၚ်ဖေက် ဒှ်ပေဲါဗတိုက်ရ။
နူကဵုဒပ်ပၞာန်ဗၟာ ဒပ်လွဟ်ဇၞော် (၃၁၈) တအ် ချဳဒရာၚ် ဂေတ်မံၚ် ပွူဳပွိုၚ်ဍုၚ်ဇြပ်ဗုတုဲ ဗက်တံၚ်ကေတ်မံၚ်ချဝ် ကွဳစက်ကီု၊ ကောန်ပၞာန်ဗၟာတအ် ဇက်စှေ်မံၚ် လ္ပာ်ရေဝ်တေံ နကဵုကွဳစက် ကြပ်အရိုဟ်တ္ၚဲကီုတုဲ ညးတအ် ဖေက်ဂၟံက်သာ်ဂှ်ရောၚ် ကောန်ဍုၚ်ဇြပ်ဗု အရာပ် (ကြာကန်) မွဲတၠ ဟီုရ။
“ပေဲါဗတိုက် ဒေသပယျဵုတေံ ဟွံတုဲဒှ် ခိုဟ်ဟ်ဏီ၊ လတူဍုၚ်ကအ်ကြိက် ဆက်ဒှ်ပေဲါဗတိုက်ပၠန်ဂှ်ရ ညးဍုၚ်ကွာန်တံ ဖေက်ဂတဝ်မံၚ် ဟွံသာပုဟ်” သာ်ဝွံ ကောန်ဍုၚ်ဇြပ်ဗုဂှ် ဟီုရ။
ပ္ဍဲစၟတ်တ္ၚဲ (၁၇) ဂိတုနဝ်ဝေမ်ပါဏံဂှ် ကတဵုဒှ် ပေဲါဗတိုက် ပ္ဍဲဍုၚ်ကအ်ကြိက်ရ။
ပ္ဍဲဒေသဍုၚ်ရေဝ်ဂှ်လေဝ် ဒပ်ပၞာန်ဗၟာတအ် ပလေဝ်စဒၟံၚ် သွက်ဂွံဗတိုက် ဒပ်ပၠန်ဂတး ကောန်ဍုၚ်အရၚ်တံတုဲ ပြးဇးဒၟံၚ် အကြာကၠအ် အကြာဂူရောၚ် ကောန်ကွာန်ကြုၚ်လံၚ် ပွိုၚ်ဍုၚ်ရေဝ် မွဲတၠ ဟီုရ။
“ဖေက်မံၚ် ကောန်ပၞာန်ဗၟာတံတုဲ ကၠအ်လေဝ် ဟွံဂံၚ်အာ” သာ်ဝွံ ကောန်ကွာန်ကြုၚ်လံၚ်ဂှ် ဟီုရ။
စနူစၟတ်တ္ၚဲ (၈) ဂိတုနဝ်ဝေမ်ပါဂှ် ဒပ်ပၞာန်ဗၟာ ကဵု ဒပ်ပၞာန်ကရေၚ် ဒဳကေဗဳအေ ကတဵုဒှ် ပေဲါဗတိုက် လတူဍုၚ် ဗြဝတဳ ကေုာံ လတူဍုၚ်ကျာ်ပိ ပွိုၚ်မွဲၜါတ္ၚဲတုဲ ပ္ဍဲစၟတ်တ္ၚဲ (၁၅) အခိၚ်သဝ်တ္ၚဲဂှ် ဒပ်ပၞာန်ဗၟာ ခလရ (၂၈၄) ကဵု ဒပ်ပၞာန် ကရေၚ်ကေအေန်ယူတအ် ကလေၚ်ဒှ်ပေဲါဗတိုက် ပ္ဍဲကွာန်ကြုၚ်ထဝ်ပၠန်ရောၚ်။
ပ္ဍဲပေဲါဗတိုက် ဒှ်တုဲဂှ်ဝွံ ဒပ်ပၞာန်ဗၟာတအ် ရပ်တံၚ်ဏာပဝ်တာ ကောန်ကွာန်တအ်ပၠန်ရောၚ် ကောန်ကွာန်တံ ဟီုရ။
