စၠန်ထဝ် – ကောန်ကွာန်အၜဝ် ပလိုတ်ဍုၚ်ရေဝ် ကဵု ကောန်ကွာန်ကအ်လှိုၚ် ရေဝ်သၠုၚ်ကျာ (၃) တၠတံဂှ် က္ဍိုပ်ပါ်တိတ် နူဗော်ဍုၚ်မန်တၟိ နာဲဆာန်ဍုၚ်တံ ကော်တံၚ်ဏာရောၚ် ဂွံတီကေတ်ရ။

ပ္ဍဲဂိတု အံက်တဝ်ပါ (၃၁) ၜိုတ်အခိၚ်ဗ္တံ ၁၀ နာဍဳဂှ် ကောန်ကွာန်အၜအ် ၁ တၠ၊ ကောန်ကွာန်ကအ်လှိုၚ် ၂ တၠ အဃောကၠောန်မံၚ် အပ္ဍဲဝါဗ္ၚ ဝါကအ် (ကအ်ဟမုဲ) ဂှ် က္ဍိုပ်ဆာန်ဍုၚ်တံ တံၚ်ရပ်ဏာတုဲ အာတ်လဝ်သြန် ညးမွဲ (၄) ကိုဋ်ရောၚ် ဒေံ ညးဒးဒုၚ်ရပ်ဏာ ကောန်ကွာန်အၜဝ်မွဲတၠ ဟီုရ။

“ဍေံတံဗလးနၚ်မၞိဟ် ကၠုၚ်ဟီု ပ္ဍဲသ္ၚိ၊ ကောအဲဂှ် အာတ်ဒုၚ်ဂုဏ်တုဲ ဒးကဵု မွဲကိုဋ်ဘာ်၊ သှေ်မံၚ် ရဲကွာန်ကအ်လှိုၚ်ၜါတၠဂှ် ဒးကဵုမူစိ အဲလေဝ် ဟွံတီပုဟ်” သာ်ဏံ ညးဆက်ဟီုရ။

မၞိဟ်ဒးဒုၚ်တံၚ်ရပ်ဏာတံ ကဵုလှုဲတုဲဗက်ဂှ် က္ဍိုပ်နာဲဆာန်ဍုၚ်တံ ကလေၚ်ဗလးကဵု သီုဖအိုတ်တုဲ ပ္ဍဲဂိတုနဝ်ဝေမ်ပါ (၂) ဂှ် ကလေၚ်စိုပ်ကၠုၚ်သ္ၚိအိုတ်ရောၚ် ဂွံတီကေတ်ရ။

မၞိဟ်ဒးဒုၚ်တံၚ်ရပ်ဏာတံဂှ် ဝါတ်ဒိုက်မံၚ်တုဲ ဒှ်ကောန်လိၚ် လိၚ်ကၠောန်စမံၚ်ဝါဗ္ၚရ။ သွက်ဂွံကဵုသြန်ကဵု က္ဍိုပ်နာဲဆာန်ဍုၚ်တံဂှ် ဒးဗကန်ကေတ်သြန် ပ္ဍဲမသကောဒေံ ကၠောန်စမံၚ် ပ္ဍဲဍုၚ်သေံတံရောၚ် ဂွံတီကေတ်ရ။

“ဍေံတံဟီုဂှ် ဍေံတံ ကၠောန်မံၚ် သွက်ကောန်ဂကူမန်၊ ယဝ်ရကၠောန်သွက်ဂကူမန်ရ ဟီုတှေ် ဟွံဒးတံၚ်ရပ်ဏာ ကောန်ကွာန် ဗီုဏံပုဟ်၊ ကၠောန်ဗီုဗီုဏံဂှ် ကၠောန်ကေတ်လှုဲဏောဝ်၊ ကၠောန်သွက်မန် ဟွံသေၚ်ပုဟ်” သာ်ဏံ ဒေံညးဒးဒုၚ်ရပ်ဂှ် ဆက်ဟီုရ။

ဒပ်ပါ်တိတ် နာဲဆာန်ဍုၚ် က္ဍိုပ်က်ဝွံ ပ္ဍဲသၞာံ (၁၉၉၇) ဂှ် စပါ်တိတ်ကၠုၚ် နူဗော်ဍုၚ်မန်တၟိတုဲ ချဳဒရာၚ်မံၚ် ပ္ဍဲသကုတ် ပွိုၚ်ဍုၚ်ဍာ်ဗု ရးတၞၚ်သဳ ကဵု သကုတ် ရေဝ်သၠုၚ်ကျာတံရ။ တံၚ်ရပ်ကောန်ကွာန်မန် အာတ်မံၚ်သြန် ညးဍုၚ်ကွာန် မွဲနှေံမွဲနှေံတုဲ လဆောဝ်မ္ဂး သီုၜုၚ်တက်ပျဲပျာံမံၚ်ရောၚ်ဂှ် ဂွံတီကေတ် နူရဲဒေသတံ ဟီုရ။