ကောန်ကွးဘာတအ် အဃောနွံပ္ဍဲအခန်မတောန်လိက်
စၠန်ထဝ်- ဟိုတ်နူအသိၚ်ပေဲါဗတိုက် ပ္ဍဲပယျဵုသေံ–ဗၟာ လ္တူဍုၚ်ကျာ်ပိ ကတဵုဒှ်ကၠုၚ်မံၚ်ဂှ်ကီု၊ ပရိုၚ်ကောလာဟလ တိတ်မံၚ် ပေဲါဗတိုက် သွက်ဂွံကလေၚ်ဒှ် နွံမံၚ်ကီုတုဲ မိမကွးဘာ လတူဍုၚ်ကျာ်ပိ ကေုာံ ပွဳပွူလတူဍုၚ်ကျာ်ပိတံ ဟွံကဵုကောန်ညးတံ တိုန်ဘာအိုတ်ရ။
“ကောန်ညးကဵုညး ထိၚ်ဒက်လဝ် ပ္ဍဲသ္ၚိညးဖအိုတ်” သာ်ဝွံ ကောန်ကွာန်ပလိုၚ်ဂျပန်မွဲတၠ ဟီုရ။
ညံၚ်ဂွံကၠုၚ်တိုန်ဘာဂှ် အ္စာ/အ္စာၝောံဘာတန်တံ ကော်ဟီုကဵု ကွးဘာ၊ မိမကွးဘာတံကီုလေဝ် ဂွိၚ်ဖေက် ဒှ်ပေဲါဗတိုက်တုဲ မိမကွးဘာတံ ဟွံကဵုတိုန်ဘာ ကုကောန်ဇာတ်ညးတံရောၚ် ရဲလ္တူဍုၚ်ကျာ်ပိမွဲတၠ ဟီုရ။
“ကောန်ၚာ်လ္ၚဵု အာတိုန်မံၚ်ဘာ နွံညိညကီု၊ လ္တူဂၠံၚ်ဂှ်တှေ် ဒပ်ပၞာန်ဗၟာတံ ဖျေံလဝ်ဂီုကၠီု တေၚ်မံၚ်ဟဂှ်တှေ် မိမကွးဘာတံ ဂွိၚ်တုဲ ဟွံကဵုကောန်ညးတံ တိုန်ဘာအိုတ်ပုဟ်” သာ်ဏံ ညးဟီုရ။
ကောန်ပၞာန်ကရေၚ် ဒဳကေဗဳအေတံ သွက်ဂွံကလေၚ်ဗတိုက် ဍုၚ်ကျာ်ပိ နွံမံၚ်ရောၚ် ပရိုၚ်ကောလာဟလ တိတ်မံၚ်တုဲ ဒပ်ပၞာန်ဗၟာတံ ဖျေံပတေၚ်လဝ်ဂီုကၠီု လတူဍုၚ်ကျာ်ပိရ။
“ပေဲါဗတိုက် ဒှ်ဟာ ဟွံဒှ်ဟာ ကေတ်ဟွံဒးပုဟ်၊ ဆးဂး ဒးမံၚ်ဒၟံၚ်ကဵုသတိရ၊ မၞိဟ်လ္ၚဵုတံဂှ်တှေ် အာကၠုၚ်မံၚ် ဗီုဓမ္မတာရ” သာ်ဏံ ရဲလ္တူဍုၚ်ကျာ်ပိ မွဲတၠပၠန်ဂှ် ဟီုရ။
ပေဲါရုဲမာဲ အလဵုအသဳပၞာန် တုဲဗက် ပ္ဍဲဂိတုနဝ်ဝေမ်ပါ (၈) ဂှ် ဒပ်ပၞာန်ကရေၚ် ဒဳကေဗဳအေ ကဵု ဒပ်ပၞာန်အလဵုအသဳဗၟာတံ ကတဵုဒှ်ပေဲါဗတိုက် (၂) တ္ၚဲ ဆက်ဆက် လတူဍုၚ်ကျာ်ပိရ။
ဒပ်ပၞာန်ကရေၚ် ဒဳကေဗဳအေဂှ် နူသၞာံ (၁၉၉၅) တေံ ပါ်တိတ်ကၠုၚ် နူဒပ်ပၞာန်ကရေၚ် ကေအေန်ယူတုဲ ကေတ်တၚ်တုပ်စိုတ် ဒေံါပန်ပှော်ကဵု အလဵုအသဳပၞာန်ဗၟာတံရ။ ဟိုတ်နူဟွံစှေ်စိုတ်ကဵု ကိစ္စဒပ်ပၞာန်မၚ်ပယျဵု အလဵုအသဳပၞာန်တုဲ က္ဍိုပ်ဒဳကေဗဳအေလ္ၚဵုတံ ပတိုက်ကၠုၚ်ကဵု ဒပ်ပၞာန်အလဵုအသဳပၞာန်ဗၟာရ။
I. Love. Mon