ကြဴနူပၞာန်ကရေၚ်တံ စံၚ်ရုၚ်မာဲပ္ဍဲဍုၚ်ကျာ်ပိတုဲ
ဥက္ကဌမယက ဟီုလဝ်ကဵု မၞိဟ်ဇၞော်အရာပ်တံတုဲ နူမၞိဟ်ဇၞော်အရာပ်တံ မွဲကဆံၚ် နူတနေံ ၜိုတ်အခိၚ်သဝ်တ္ၚဲ (၄) နာဍဳကဝါ်ဂှ် ကလေၚ်လလောၚ်တြးကဵု ညးဍုၚ်ကွာန်တံရောၚ် ရဲလ္တူဍုၚ်ကျာ်ပိမွဲတၠ ဟီုရ။
အခိၚ်ဗ္တံမ္ဂး ဒပ်ပၞာန်ဗၟာ လၟိဟ်ၜိုတ် (၄၀၀) တၠတံလေဝ် နကဵုကယျိုၚ်ပၞာန်ပေၚ်ၚ် ဖျေံလဝ်ကၚ် အကြာဍုၚ်ကျာ်ပိရောၚ် ကောန်ဍုၚ်ကျာ်ပိဂှ် ဟီုရ။
“ရံၚ်ကေတ်ဍေံတံတှေ် သွက်ဂွံပန်ဂှ် ဒှ်မံၚ်ဒတုဲတုဲဏောၚ်” သာ်ဝွံ ညးဟီုရ။
ဂွိၚ်ဖေက်ကတဵုဒှ်ပၞာန်တုဲ ကောန်ဍုၚ်ကျာ်ပိလ္ၚဵုတံဂှ် ပြံၚ်ဆုဲအာ တိဍာ်ဗော်ဍုၚ်မန်တၟိ ကွာန်ဂူၜဴ၊ ကွာန်ပလိုၚ်ဂျပါန် ကေုာံ ကွာန်တဒုၚ်တေံလေဝ် နွံမံၚ်ရောၚ် ဂွံတီကေတ်ရ။
သအာၚ်နူဂှ်ပၠန် လၟိဟ်မၞိဟ် ၜိုတ် (၃၀၀၀) တၠ မၞုံပ္ဍဲအရာပ် (တောၚ်ဝိုၚ်း) မသ္ၚောဲခြာမံၚ်ကဵု လဒေါဝ်ဍုၚ်ဂှ်လေဝ် ဥက္ကဌမယက စၞောန်လဝ် သွက်ဂွံ ပြံၚ်ဆုဲလုပ်ကၠုၚ် လ္ပါ်လ္ဒောဝ်ဍုၚ်ရောၚ် ကောန်အရာပ်ဂှ် မွဲတၠ ဟီုရ။
“အရာပ်ဂှ်ဂှ် ကြပ်မံၚ်ကဵု ဒဵုမာကသဏောၚ်၊ အခိၚ်ဒှ်ပေဲါဗတိုက်တှေ် ဍေံတံ ကေတ်လျိုၚ်ဟွံမာန်တုဲ ဍေံကဵုပြံၚ်ဆုဲလုပ် အပ္ဍဲဍုၚ်၊ ပ္ဍဲအရာပ်ဂှ်တှေ် ကရေၚ် ဂၠိုၚ်မံၚ်၊ မန်၊ ဗၟာကဵု ဟလာ နွံညိညကီု” သာ်ဝွံ ညးဟီုရ။
ဂွိၚ်ဖေက်ပလာပ်ပထုဲ ပေဲါရုဲမာဲတုဲ ကၠာပေဲါရုဲမာဲ ဟွံဒှ်ဏီ ၜိုတ်မွဲသတ္တဟဂှ်လေဝ် အလဵုအသဳဍုၚ်ကျာ်ပိတံ ပတိတ်ကၠုၚ်အမိၚ် ဟွံကဵုတိတ်မ္ၚး အခိၚ်ဗ္တံရ။ လၟုဟ်ဝွံ ဟိုတ်နူအကာဲအရာ ကတဵုဒှ်ပေဲါဗတိုက် နွံတုဲ ထပ်ကလေၚ်ပတိတ်အမိၚ်ပၠန်ရ။
