ဌာန်ပရိုၚ်ဗၠးၜးမန် – အလဵုအသဳပၞာန်ဟီုလလောၚ်လဝ် ကြဴနူဂိတုသေတ်တေန်ဗါဂှ် ယဝ်ဟွံဒုၚ်တဲဒပ်မၚ်ပယျဵု ကဵု ဒပ်မၚ်ကွာန်ဂှ်တုဲ စွံ စိုတ်ဗီုအကာဲအရာကၠာအခိၚ်ဟွံဒေံါပရေၚ်ပန်ပှော်တေံရောၚ်ဟီုဂးလဝ်ကၠာလေဝ် ဒဵုကဵုအကာဲအရာတ္ၚဲဏံ ပရေၚ် ဆက်ဆောံကီု ပရေၚ်ရဲဂကောံဗော်ဍုၚ်မန်တၟိတအ်အာကၠုၚ်ကီု မုအခက်အခုဲဟွံမွဲ မွဲသာ် ပဵုတုဲ ညးတာလျိုၚ်ဒပ်ဗၟာ တအ် ကဵုမံၚ်ဇြဟတ်ဓရိုဟ်ညံၚ်ဂွံအာကၠုၚ် ဆက်ဆောံအတိုၚ်တြေံတေံပၠန်ဂှ် ညးတာလျိုၚ်သၞေဟ်ကၚ်ဒပ်ဗၟာတအ် ဟီုမံၚ်ကဵုပိုဲရောၚ် သာ်ဏံ ညးတာလျိုၚ်ဗဒိုပ်ဝါဇြေန်မွဲတၠ လဴကဵုရ။
“ညးတာလျိုၚ်ပိုဲဂှ် ဟွံအာကၠုၚ်ပုဟ် ဆဂး ကောန်ပၞာန်ပိုဲ ညးတာလျိုၚ်ကဆံၚ်ပွိုၚ်ဍုၚ်ပိုဲ အာကၠုၚ်ပြေပြံၚ်မံၚ် ညး တာလျိုၚ်ဍေံလေဝ် ဟီုမံၚ်ကဵုပိုဲ ဆက်ဆောံအတိုၚ်ဗီုတြေံ၊ အာကၠုၚ်လ္ပဒှ်ဓဝိၚ်ညိ ပရေၚ်ခက်ခုဲမုဟွံမွဲပုဟ် ကောန် ပၞာန်ပိုဲလေဝ် အာကၠုၚ်မံၚ်အရိုဟ်တ္ၚဲရ မုလေဝ်အခက်အခုဲဟွံမွဲ မွဲသာ်ပုဟ်”သာ်ဏံ ညးတာလျိုၚ်ဗဒိုပ်ဝါဇြေန်ဂှ် ဟီုထ္ၜးကဵုရ။
ဆက်တုဲညးတာလျိုၚ်တၞဟ်မွဲတၠလဴကဵုပၠန်ဂှ် “ ပိုဲအာကၠုၚ်တတ်ဒဒန်ဗု(ရေဝ်)ဂှ်တှေ် ဍေံသၟာန်လွဟ်ပါဟာ ဟွံပါ တှေ်တုဲ ဍေံကဵုအခေါၚ်အာၜိုဟ်ဟ်သြိုဟ်ဟ်ရဏေါၚ် မုလေဝ်အခက်အခုဲဟွံမွဲ မွဲသာ်”သာ်ဏံ ညးတာလျိုၚ်တၞဟ် မွဲတၠဂှ်ဆက်လဴကဵုပၠန်ရ။
အကာဲအရာဗော်ဍုၚ်မန်တၟိကဵု အလဵုအသဳပၞာန်ဂှ် ပ္ဍဲအကြာကာလကၠာပေဲါရုဲမာဲတုဲကၠုၚ်တေံ သၟာအခါတ်အကာဲဂ မၠိုၚ်တအ် ထေၚ်ခယျလဝ် ရမျှာၚ်လွဟ်ဗြုရောၚ်ကီုလေဝ် ကြဴဒဵုကဵုပေဲါရုဲမာဲတုဲ အကြာကာလအလဵုအသဳတိုန်တၟိ ဏံလေဝ် အယောၚ်အလာရမျှာၚ်လွဟ်ဗြုရောၚ်ဂှ် ဟွံဆဵုဏီရ။
ပ္ဍဲကဵုတ္ၚဲပေဲါရုဲမာဲနဝ်ဝေန်ဗါ(၇)ကာလ ဒပ်ပၞာန်ကရေၚ်ဗုဒ္ဓဘာသာ(DKBA)ကဵု ဒပ်ပၞာန်အလဵုအသဳပယျဵု ဗြဝတဳကီု ဍုၚ်ကျာ်ပိ ပဋိပက္ခပေဲါဗ္တိုက်လွဟ်ဒှ်ကၠုၚ်ဂှ် ပ္ဍဲဒေသပွဳပွူဒပ်ပၞာန်ဗော်ဍုၚ်မန်တၟိဂှ် လ္ပာ်ဒပ်ပၞာန်အလဵုအသဳဗၟာကီု ဒပ်လ္ပာ်ဗော်ဍုၚ်မန်တၟိကီု မုလေဝ်ပရေၚ်ချဳဒရာၚ်တၟေၚ်ဟွံမွဲ မွဲသာ်ရ။
“ကဵုရဲဗော်ဍုၚ်မန်တၟိဂှ် မုလေဝ်ဍေံဟွံကဵုကၠုၚ်ဇြဟတ်ဓရိုဟ်မွဲသာ်၊ ဍေံတအ်စွံစိုတ် ဇြဟတ်ဇကုဍောတ်မံၚ်တုဲ ဍေံ စွံလဝ်စိုတ်ၜိုဟ်ဟ်ရဟာ ဟွံသေၚ်တှေ် ယဝ်ရမျှာၚ်လွဟ်ဗြုကဵုဗော်ဍုၚ်မန်တၟိတှေ် ဍေံဂွိုၚ်ဖေက်ထၞာန်အာသီုပ္ဍဲဍုၚ် ဟာ ပိုဲလေဝ်ေတော်မံၚ်ဟွံဒး၊ ဍေံဟွံကရေပ်ဓရတ်ဗော်ပိုဲဂှ် တၟေၚ်ဂှ်တၟေၚ်မံၚ်ကွေံ”သာ်ဏံ ကမ္မတဳဗဟဵုဗော်ဍုၚ်မန် တၟိမွဲတၠ ဟီုရ။
ဟိုတ်နူပရေၚ်ဆက်ဆောံကဵုဂကောံဗော်ဍုၚ်မန်တၟိ ကဵု အလဵုအသဳပၞာန်ဗၟာဂှ် မုပရေၚ်အခက်အခုဲဟွံဒှ်ကၠုၚ်မွဲသာ် တုဲ သၟာအတရဴကၠောံဍုၚ် ၜက်ပယျဵုတအ် ဍိုက်ဇက်ကၠုၚ် လ္ပာ်ဂၠံၚ်ဗဒိုပ်ဝါဇြေန် ကဵု ပယျဵုဗလးဒုန်ဖါ်ဂှ် မွဲမွဲတ္ၚဲလၟိဟ် မၞိဟ်လုပ်ကဵုကၠံရောၚ် ညးတာလျိုၚ်သၞေဟ်ကၚ်ဗော်ဍုၚ်မန်တၟိတအ် ဟီုထ္ၜးရ။
