ဌာန်ပရိုၚ်ဗၠးၜးမန် – အကြာအကာဲအရာဗော်ဍုၚ်မန်တၟိကဵု အလဵုအသဳပၞာန် ဒှ်မံၚ်ပရေၚ်ကလိုက်ကၟဵု ပရေၚ်ပၞာန်ဂှ် ကမ္မတဳခရိုၚ်မတ်မလီုတအ် ချဳဓရာၚ် ပံက်ပ္တိုန်ဂကောံမှာဇန် ကော် “ဂကောံဂူယာမန်” မွဲဂကောံပၠန်ရ။
ဂကောံဂူယာမန်ဂှ် သ္ပသ္ဇိုၚ်ကဵု ရဲသၟာကၠအ်ဂူယာဂမၠိုၚ်တုဲ ပံက်လဝ်ရ။ အကြာဒှ်မံၚ်အကာဲအရာရုသံၚ်မံၚ်ကဵု အလဵု အသဳပၞာန်ဂှ် သာ်လဵုဂွံပံက်ဂကောံဂူယာမန်ဏံရော သၟာန်လဝ်ကမ္မတဳခရိုၚ်မတ်မလီုမွဲတၠဂှ်-
“ဂွံပံက်ဂကောံဂူယာမန်ဏံဂှ် ရဲသၟာကၠအ်ဂူယာတအ်လေဝ် ညးတအ်ကဵုညးတအ် ဂွံဒှ်ပရေၚ်ပံၚ်တောဲညးကအ် တုဲတှေ် ပိုန်ဒြပ်တိတ်နူကၠအ်သွဝ်ညးတအ် ကာလပလံၚ်ဏာ ဗွဝ်ဖျာတေံတှေ် ညံၚ်ဂွံတီကၠိုဟ်လဝ် အကာဲအရာပ ရေၚ်ဗွဝ်ဖျာကီုတုဲ ညံၚ်ဟွံဂွံဒးဒုၚ်ကၟာတ်မတ် တုဲတှေ် ကၠအ်ဂူညးတအ် ညံၚ်ညးတၞဟ်ဟွံပလီုပလာ် ၜက်ၜေတ် ဒး ကဵုပညာတုဲ ဒးဘိုၚ်စဵုဒၞာကဵုညးတအ်ကီု ဒးဟီုတှေ် ဂကောံဒှ်တိုန်တှေ် ဂုဏ်ဖဵုရဲသၟာကၠအ်ဂူယာမန်ပိုဲ အောန်ကဵုဂၠိုၚ် ဂွံဒုၚ်စသိုၚ်တွဵု ပိုဲညာတ်ကေတ်ဗီုဂှ်လေဝ်” သာ်ဏံ ကမ္မတဳခရိုၚ်ဂှ် လဴထ္ၜးကဵုရ။
ဂကောံမှာဇန်သၟဝ်တဲ ဗော်ဍုၚ်မန်တၟိ ပံက်လဝ်နွံမံၚ် (၅) ဂကောံရ။ ဂကောံတအ်ဂှ် ဂကောံရေၚ်တၠုၚ်ဖဵုဗော်၊ ဂကောံ ပရေၚ်ပညာ၊ ဂကောံထတ်ယိုတ်၊ ဂကောံသၟတ် ကေုာံ ဂကောံညးဗြဴ ပါလုပ်ရ။ လၟုဟ်ပံက်ဗပဵုပ္တိုန် ဂကောံဂူယာမန် မွဲဂကောံပၠန်မ္ဂး ဂကောံမှာဇန်မန် သၟဝ်တဲဗော်ဍုၚ်မန်တၟိ ဒှ်အာ (၆) ဂကောံရ။
ဂကောံဂူယာဏံဂှ် ပံက်ၜိုတ်ဆပ္ဍဲခရိုၚ်မတ်မလီုမွဲဓဝ်ဟွံသေၚ်ရ ဒေသခရိုၚ်တၞဟ်ဟ် ဒၞာဲတိဍာ်ဗော်ဍစိုပ်ဂှ် ထပ်ပံက် အာဖအိုတ်ရောၚ်ဂှ်လေဝ် ကမ္မတဳခရိုၚ်ဂှ် ထပ်လဴကဵုပၠန်ရ။
တိဍာ်ရးဍုၚ်မန်ဂှ် သ္ပသ္ဇိုၚ်ကဵု ပရေၚ်ကၠအ်ဂူယာ ဝါဗ္ၚဂၠိုၚ်ရ။ ဗော်ဍုၚ်မန်တၟိ ပံက်ကဵုဂကောံဂူယာဏံဂှ် အဓိကလမျီု ဂကောံဂွံလုပ်ဂှ် ကိစ္စဇၞော်မံၚ်ရောၚ် ပံက်လဝ်ဂကောံတုဲ ယဝ်ပရေၚ်ချဳဓရာၚ်ဂကောံဟွံမွဲ လမျီုဂကောံဟွံလုပ်မ္ဂး ဂကောံဂှ် အာဍာ်ဇမၠိၚ်ဟွံမာန်ပုဟ်ဂှ် ညးလုပ်လဝ်ဂကောံဂူယာ ဒေသပွိုၚ်ဍုၚ်ဇြပ်ဗုမွဲတၠ ပါ်ပဲါရ။
