သူရိန်၊ ဂျူရဳဆာဲ – ဇရေၚ်ကွာန်အပလုၚ် ပ္ဍဲပွိုၚ်ဍုၚ်ကျာ်ပိ တွဵုရးကရေၚ်ဂှ် ပ္ဍဲဂိတုဂျာန္နဝါရဳ ၂၇ ဒပ်ပၞာန်အလဵုအသဳကဵု ဒပ်ကေအေန်ယူတအ် ဒှ်ပေါဲဗတိုက်တုဲ တၠကွဳစက် ချိုတ်အာ ၂ တၠရောၚ် ညမးကြပ်ကဵု ဂကောံအလဵုအသဳမွဲတၠ ဟီုရ။
ကောန်ပၞာန်ဗၟာ ကေုာံ လွဟ်ဇၞော်
ညးချိုတ်အာၜါတၠဂှ် ဒးဒုၚ်တံၚ်ကော်နၚ်ဆဝ် ကွဳစက်တုဲ ဟိုတ်နူတမ်ဒပ် ခမရ ၅၆၆ ကဵု ကေအေန်ယူ တမ်ဒပ် (၁၆) ဒပ်ပါ် (၂) တအ် ဒှ်ပေါဲဗတိုက် ဇရေၚ်ကွာန်အပလုၚ် သ္ၚောဲခြာနူဍုၚ်ကျာ်ပိ လပါ်ပလိုတ် ၜိုတ် ၂၀ တိုၚ်ဂှ်ရ ဒးလွဟ်တုဲ မဒးချိုတ်အာရောၚ် ညးဟီုရ။
တၠကွဳစက်ၜါတၠတအ် ချိုတ်အာတုဲ သွက်ဂွံထပ်လိၚ် တၠကွဳစက်ပၠန်ဂှ် ဒပ်ပၞာန်အလဵုအသဳ တမ်ဒပ် ခမရ ၄၀၂ ကဵု ခမရ ၄၀၆ တအ်ဂှ် ဗက်ကံက်ကေတ်ဒၟံၚ်သြန် ပ္ဍဲကဵုကွာန်ကြုၚ်ထဝ် ပ္ဍဲသ္ၚိကွဳစက်နွံ မွဲသ္ၚိ သြန်သေံ ၅၀၀ ၝာတ်ကဵု သ္ၚိသၟေဟ် မွဲသ္ၚိ ၅၀ ၝာတ်ရောၚ် လၟုဟ် ကံက်ဂွံလဝ်သြန် ၜိုတ် ၁၂၅၀၀ ၝာတ်နွံရောၚ် ရဲကွာန်ကြုၚ်ထဝ်မွဲတၠ ဟီုရ။
အပ္ဍဲကဵု ကွာန်ကြုၚ်ထဝ်ဂှ် သ္ၚိမၞုံ ၜိုတ် ၁၆၀ မတုဲ သ္ၚိကွဳစက်နွံဂှ် မၞုံၜိုတ် ၁၀ မရ။
တမ်ဒပ် ခမရ ၄၀၂ ကဵု တမ်ဒပ် ခမရ ၄၀၆ တအ်ဂှ် မနွံသၟဝ်တဲ စကခ ၈ ဌာန်ဂအုပ်ပၞာန် ရးပြၚ်ၜဳရ။
ပ္ဍဲဂိတုဂျာန္နဝါရဳ ၂၇ အခိၚ်နူဂယးဂှ်လေဝ် အကြာကွာန်မိပြၚ်ကဵု ကွာန်ဒဵုကျာ် ပွိုၚ်ဍုၚ်ကျာ်ပိဂှ် တမ်ဒပ် ခမရ ၄၀၆ ကဵု ဒဳကေဘဳအေ တမ်ဒပ် ၉၀၆ ဒု-သ္ကိုပ်ဗိုလ်ဇၞော် သဝ်အေဝါန် က္ဍိုက်က္ဍိုပ်တအ် ဒှ်လဝ်ပေါဲဗတိုက်ကီုရ။
ဟိုတ်နူပေါဲဗတိုက်ဂှ်တုဲ ကောန်ကွာန်ဗွဲမဂၠိုၚ် မၞုံပ္ဍဲကွာန်ဒဵုကျာ် သ္ၚိမၞုံ ၜိုတ် (၆၀) မတအ်ဂှ် စနူ ဂိတုဂျာန္နဝါရဳ ၂၉ ဂှ် ပြံၚ်ဆုဲအာ လပါ်ကွာန်ကြုၚ်ထဝ်ကဵု ဍုၚ်ကျာ်ပိတအ်အိုတ်ယျရောၚ် ရဲကွာန်ကြုၚ်ထဝ်မွဲတၠ ဟီုရ။
ပ္ဍဲဂိတုဂျာန္နဝါရဳ ၂၄ ဂှ် သွက်သ္ဂောံဖ္ဍိုက်ဇွောံမ လွဟ်လနက်မကမ်တုဲ တမ်ဒပ် ခလရ ၂၈၃ ဂှ် ဗက်တံၚ်ကေတ် ဆဝ်ကွဳစက် ပ္ဍဲဒေသကျာ်ပိရ။ ဟိုတ်နူဂှ်တုဲ တၠကွဳစက် ဟွံမိက်ဒုၚ်တံၚ်ဆဝ်တံဂှ် ဂြိပ်ပဲါဒလေတ်မံၚ်ဂှ်ရ ကော်ပကောံတၠကွဳစက်ဂမၠိုၚ်တုဲ သွက်သ္ဂောံလိၚ် ကွဳစက်သၠာစှ် ၂ မဂှ် ဗက်ကံၚ်ကေတ်သြန် ပ္ဍဲတၠကာ မွဲတၠ ၂၂၀၀ ၝာတ်ရောၚ် တၠကွဳစက်မွဲတၠ ဟီုရ။
ညးချိုတ်အာၜါတၠတအ်ဂှ် ဟွံဂွံၚုဟ်လေဲဏီရောၚ်ဂှ် ဂကောံတၠကွဳစက်တအ် ဟီုအိုတ်ရ။
