မိစၠန်ထဝ် – သွက်ဇွောံမ ဒပ်ပၞာန်ရောၚ် ဟီုတုဲ အပ္ဍဲတွဵုရးမန် ဇၟာပ်ဇၟာပ်ပွိုၚ်ဍုၚ်ဂှ် ဗက်ကံက်ကေတ်မံၚ် သြောံ သြန် နူသၟာဗ္ၚတံအိုတ်ရောၚ် ဂွံတီကေတ် နူသၟာဗ္ၚတံရ။
အပ္ဍဲဍုၚ်မန်မွဲဒၞာဲ သၟာဗ္ၚတံ ဃောခရဳမံၚ်သြောံ ( ဗီု - ဌာန်ပရိုၚ်ဗၠးၜးမန် )
ပ္ဍဲပွိုၚ်ဍုၚ်ရေဝ်၊ ဇြပ်ဗု ကေုာံ ကွာန်မၞုံအပ္ဍဲပွိုၚ်ဍုၚ်မုဟ်ဍုၚ်လ္ၚဵုတံဂှ် မွဲဨက သြောံမွဲန၊ ပ္ဍဲပွိုၚ်ဍုၚ်ၜါသွာၚ် ကေုာံ ကွာန်မၞုံအပ္ဍဲပွိုၚ်ဍုၚ်မုဟ်ဍုၚ်လ္ၚဵုတံဂှ် မွဲဨက ၁၀၀၀ ဒကေဝ် ဥက္ကဌကွာန်တံ ဗက်ကေတ်မံၚ် နူဂိတုဂျာန္နဝါရဳအိုတ် ဂိတုဖေဖဝ်ဝါရဳဏံမံက်ရ။
ဟိုတ်နူဗြဲပလီုလဝ်တုဲ သြောံလီုမံၚ်ဂှ်ရ ဥက္ကဌကွာန်တံ ကၠုၚ်ဗက်ကီုလေဝ် ကဵုဟွံမာန်ရောၚ် သၟာဗ္ၚ နူကွာန်ဝၚ်ဒုန် ပွိုၚ်ဍုၚ်မုဟ်ဍုၚ်မွဲတၠ ဟီုရ။
“ညးတၞဟ် မိက်ဂွံကဵုတှေ်ကဵု အဲဂှ် ကဵုဟွံမာန်ပုဟ်။ သြောံလီုမံၚ် ဂလိုၚ်ဏံတှေ်၊ ယဝ်ရမိက်ဂွံကေတ်တှေ် ကေတ်ဏာသြောံ ဒးလဝ်ဗြဲဂှ်” ညးဟီု သာ်ဂှ်ရ။
သွက်ဂွံဗက်သြောံ ဗက်သြန်ဂှ် ဥက္ကဌပွိုၚ်ဍုၚ် (မယက) စၞောန်လဝ်ကဵု ဥက္ကဌကွာန် (ရယက) တုဲ ရယကတံ ကလေၚ်ကော် ကောံဓရီု လဴပူစကဵု သၟာဗ္ၚတံအိုတ်ရ။
ပ္ဍဲအခိၚ်သီသြောံသၞာံဏံ ဂိတုမြေက္ကသဵု၊ ဂိတုပုဟ်ဂှ် ဗြဲဂူၜါဝါတုဲ ပ္ဍဲတွဵုရးမန် ဇၟာပ်ဇၟာပ်ဝါဗ္ၚ သြောံလီုအာ ၜိုတ်ကဝက်ဒှ်ရောၚ် သၟာဗ္ၚတံ ဟီုအိုတ်ရ။
အတိုၚ် အလဵုအသဳတံ အာတ်ဂှ် ၜိုန်ရသၟာဗ္ၚတံ ဟွံမိက်ကဵုကီုလေဝ် ပ္ဍဲသၞောဝ်ဍုၚ်ဗၟာဂှ် သၟာဗ္ၚတံ အခေါၚ်ပိုၚ်တိဗ္ၚ ဟွံမွဲဂှ်ရ ဂွိၚ်ဖေက်ဒးဒုၚ်သီတိတုဲ ဒးကဵုအာ အတိုၚ်အာတ်လဝ်ဂှ်ရောၚ် သ္ၚာဗ္ၚ နူဍုၚ်မုဟ်ဍုၚ်မွဲတၠ ဟီုရ။
0 Comments