အာကာ – ပ္ဍဲစၠတ်ထဝ် မကၠောန်သ္ပ နူတနေံတေံဂှ် ၜိုန်ရဗော်ဒဳမဝ်ကရေဇြဳ အလုံရးမန် ဟွံဂွံဒုၚ်ရုဲ ဒၞာဲသဘာပတိ၊ ဥက္ကဌ၊ ဒု-ဥက္ကဌကီုလေဝ် ကိစ္စဟွံဇၞော်ရောၚ် က္ဍိုပ်သကိုပ်ဗော် နာဲဇၞူမန် ဟီုရ။

ဥက္ကဌ ဗော်ဒဳမဝ်ကရေဇြဳ အလုံရးမန် နာဲဇၞူမန်

“ဟွံဂွံဒုၚ်ရုဲ ဥက္ကဌ၊ ဒု-ဥက္ကဌလေဝ် ကိစ္စဟွံမွဲပုဟ်၊ ဍေံတံဂှ် ဒှ်မၞိဟ်ဂလိုၚ်တှေ် ဇကု ဗီုလဵုဂွံမာန်ဍေံရော၊ ပါ်မာဲတှေ် ဇကုကျတွဵုလေဝ်၊ သှေ်မံၚ်မွဲပေဲါဏီ၊ သွက်ဂွံရုဲ သကိုပ်ဝန်ဇၞော် တွဵုရး၊ ဝန်ဇၞော်တွဵုရး၊ ဒးဟီုလညာတ်အဲတှေ် ဟွံဒးဒုၚ်ရုဲက္ဍၚ် ခိုဟ်က္ဍၚ်ရ၊ ဟွံဒးဒုၚ်ရုဲတှေ် ဇကုဂှ် ဒှ်အာမၞိဟ်ဒစဵုဒစးဇေတ်ဇေတ်လေဝ်” သာ်ဝွံ နာဲဇၞူမန် ဟီုရ။

အလဵုသမတ ခါန်ကၞက် သကိုပ်ဝန်ဇၞော်တွဵုရးဂှ်ရ ဗော်မန်ဂှ် ၜိုန်ရဂွံဒၞာဲဝန်ဇၞော်တၞဟ်တၞဟ်ကီုလေဝ် အတိုၚ်ပၟိက်စိုတ်ဇကု ကၠောန်ဟွံဂွံရောၚ်၊ သွက်ပၟိက်ဆန္ဒညးဍုၚ်ကွာန်ဂှ် ဒတူလိုၚ်တုဲ ဒးလုပ်အာပေဲါဗတိုက် ပ္ဍဲစၠတ်ထဝ်ရောၚ် နာဲဇၞူမန် ဆက်ဟီုရ။

“သွက်ညးဍုၚ်ကွာန် ထေက်ကဵုဒးဒစဵုဒစးတှေ် ဒးဒစဵုဒစး ပ္ဍဲစၠတ်ထဝ်ဏောၚ်၊ ကိစ္စဇၞော်အိုတ်ဂှ် မၞိဟ်ဇကု ညံၚ်ဟွံဂွံဖေက်၊ ဇကုဂှ် မၞိဟ်ဂှ်လေဝ် အောန်၊ ဖေက်လေဝ် ဖေက်မံၚ်ပၠန်တှေ် ဟွံဒှ်ကမၠောန်ပုဟ်” သာ်ဝွံ ရန်ကဵုအမာတ်မန် တိုန်စၠတ်ထဝ်တုဲ နာဲဇၞူမန် ဟီုရ။

ပ္ဍဲကောံဓရီုစၠတ်ထဝ် နူတနေံတေံဂှ် နဒဒှ်သဘာပတိစၠတ်ထဝ် ပတိုန်ဂလာန် ကုသကိုပ်ဗိုလ်ဇၞော် အိၚ်မျေတ် (အုန်းမြၚ့်) အမာတ် ဒေသမုဟ်ဍုၚ် စၟတ် ၁ တုဲ ညးမွဲလေဝ် ဟွံဒစဵုဒစးဂှ်ရ ဒးဒုၚ်ရုဲစှ်ဏာတုဲ သွက်ဥက္ကဌစၠတ်ထဝ် ဒု-ဥက္ကဌစၠတ်ထဝ်ဂှ် ဗော်ကျဖောအ် ကဵု ဗော်မန်တံ ပြိုၚ်ပကာန်ၜါဝါကီုလေဝ် ဗော်မန် ဒးဒုၚ်ကျအာ သီုၜါဝါရ။

အမာတ်မန် ဒံက်တာ မာံနဲသဵုဂှ် သွက်ဒၞာဲဥက္ကဌစၠတ်ထဝ် ကျအာ အမာတ်ကျဖောအ် ဒေသပွိုၚ်ဍုၚ်ၜါသွာၚ် စၟတ် ၂ နာဲကျေန်ဖေ နကဵုမာဲ ရ မာဲ ၂၄ မာဲတုဲ သွက်ဒၞာဲဒု-ဥက္ကဌစၠတ်ထဝ်ဂှ် ကျအာ အမာတ်ကျဖောအ် ဒေသပွိုၚ်ဍုၚ်ကျာ်ထဝ် စၟတ် ၁ နာဲဌေလွေန် နကဵုမမာဲ ၈ မာဲ ၂၃ မာဲရ။

ကောံဓရီုစၠတ်ထဝ်ဝွံ ကၠောန်သ္ပ ပ္ဍဲရုၚ်ပယက ဍုၚ်မတ်မလီု ဇရေၚ်ကၠအ်ပကဴ မောရဝတဳတုဲ အမာတ်စုၚ်စုၚ်လေၚ်လေၚ် တိုန်စိုပ်အိုတ်ရ။

ပ္ဍဲအမာတ် ၃၁ တၠဂှ် အမာတ်ကျဖောအ် ၁၄ တၠ၊ အမာတ်မန် ရ တၠ၊ အမာတ် (တစည) ၂ တၠ ကေုာံ ညးစၞးဒပ်ပၞာန် ၈ တၠတံ ပါလုပ်အိုတ်ရ။

ကောံဓရီုစၠတ်ထဝ်တွဵုရးမန် မကၠောန်သ္ပ နူတနေံတေံဝွံ စနူအခိၚ် နူဂယး ၈ နာဍဳ ၅၅ မိနေတ်တုဲ တုဲဒှ်အာ ဆၜိုတ်ရုဲစှ် သဘာပတိ၊ ဥက္ကဌ၊ ဒု-ဥက္ကဌတံဟေၚ်ရ။ ကောံဓရီုဝွံ ဆၜိုတ်အခိၚ် မွဲနာဍဳဟေၚ် ကၠောန်သ္ပတုဲ သီရုပ်ထောံရ။ တ္ၚဲလဵု ကလေၚ်ကော်ကောံဓရီုစၠတ်ထဝ်ပၠန်ဂှ် ကေတ်ဟွံဒးဏီရောၚ် နာဲဇၞူမန် ဟီုရ။