ဌာန်ပရိုၚ်ဗၠးၜးမန် – ပ္ဍဲဂိတု ဖေဖဝ်ဝါရဳ ၄ ၜိုတ်အခိၚ်သဝ်တ္ၚဲ ၜိုတ် ၃ နာဍဳကဝါ်ဂှ် ဒပ်ပၞာန်ဗၟာ ၝောံဒပ် ရ၇ ဇြဟတ် ၂၀၀ တၠပြၚ်ၚ်တံ နကဵုလွဟ်လက်နက် ဇွောံမပေၚ်ၚ် စိုပ်ကၠုၚ် ဒေသပယျဵုသေံ ဍုၚ်ကျာ်ပိရောၚ် ဂွံတီကေတ်ရ။
ဍုၚ်ကျာ်ပိ ( ဗီု- ဌာန်ပရိုၚ်ဗၠးၜးမန်)
ပ္ဍဲၝောံဒပ် ရ၇ ဂှ် တမ်ဒပ် ၃ တမ်ဒပ် ပါကၠုၚ်တုဲ တမ်ဒပ်လဵု ပါကၠုၚ်ရောဂှ် ဟွံဂွံတီဏီရ၊ မွဲတမ်ဒပ်မ္ဂး ဇြဟတ် ၜိုတ် ၈၀ ပြၚ် မၞုံတုဲ စိုပ်ကၠုၚ် နကဵုကွဳစက်ကာ ၃၂ ပ္ဍိုက်ရောၚ် ညးလ္ၚတ်ပရေၚ်ပၞာန် ရဲဒေသမွဲတၠ ဟီုရ။
ပ္ဍဲကွဳစက်ကာ ၃၂ ဖ္ဍိုက်ဂှ် ကွဳစက်ကာပၞာန် ၂၀ မ မၞုံတုဲ သၟေဟ်တံဂှ် ကွဳစက်တံၚ်နၚ်ဆဝ် နူဍုၚ်ဇြပ်ဗု ကဵု ကွဳစက်လိၚ်နၚ် နူကဵုဍုၚ်ကျာ်ပိရောၚ် ညးဆက်ဟီုရ။
တမ်ဒပ်လၟုဟ်ဏံဂှ် စိုပ်ကၠုၚ်ဍုၚ်ကျာ်ပိ အလန်ကၠာအိုတ်တုဲ ပ္ဍဲအရာ ဗတိုက်ဒပ်ပၞာန်ကောန်ဍုၚ်အရၚ်တံဂှ် ယၟုဒယှ်မံၚ်ဂှ်ရ သွက်ဂွံ ထပက်ပၞာန်ကဵု ဒပ်ကရေၚ် ကေအေန်ယူကဵု ဗော်ဍုၚ်မန်တၟိတုဲ စိုပ်ကၠုၚ်ဒှ်မာန်ရောၚ် ညးတာလျိုၚ်ကဆံၚ်လတူ နူဗော်ဍုၚ်မန်တၟိမွဲတၠ ဟီုရ။
“မွဲဒမြိပ်ဂၠံၚ်ဂှ် ပန်မံၚ်ကဵု လွဟ်ဇၞော်တုဲ တိုန်ကၠုၚ်မံၚ်ဏောၚ်၊ ရမျာၚ်ဂှ်တှေ် ညံၚ်ဒိုဟ်သရိုဟ်ရဏောၚ်၊ ပ္ဍဲအကြာဂၠံၚ်ဂှ် ဒပ်ကရေၚ်ကေအေန်ယူတံ ကၠတ်ပန်မံၚ်တုဲ ဍေံတံပန်ဘကၠုၚ်” သာ်ဝွံ ညးဟီုရ။
ပ္ဍဲဂိတု ဖေဖဝ်ဝါရဳ ၁ ဂှ် ကွဳစက်ကာ ၂၅ မပြၚ် ပ္ဍိုက်နၚ် ဇွောံမကဵု လွဟ်မကမ်တံ တိုန်ကၠုၚ်နူ ကွာန်ဝါအနာၚ် စိုပ်ကၠုၚ်ကွာန်တဒိန်တုဲ ပ္ဍဲဂိတုဖေဖဝ်ဝါရဳ ၃ ၜိုတ်အခိၚ်သဝ်တ္ၚဲ ၅ နာဍဳဂှ် ကွဳစက်ကာ ၆ ဖ္ဍိုက် စိုပ်ကၠုၚ်ဍုၚ်ကျာ်ပိရောၚ် ရဲဍုၚ်ကျာ်ပိမွဲတၠ ဟီုရ။
ၝောံဒပ် ရ၇ ဖျေံလဝ်သဇိုၚ် ပ္ဍဲဍုၚ်ဗဂေါဂှ် စဒက်ပတန်ကၠုၚ် ပ္ဍဲသၞာံ ၁၉၆၆ တုဲ အခိၚ်လၞိန်ဗပိန်ကၠုၚ် ကောန်မျူနေတ် (ဗကပ) ပ္ဍဲတွဵုရးဍုၚ်သေံဂှ် ယၟုဒယှ်ကၠုၚ်ရ။ သအာၚ်နူဂှ်ပၠန် အခိၚ်သၚ်တံ က္ဍိုက်ပ် တိတ်ဂၠံၚ် ပလံၚ်မေတ္တာ ပ္ဍဲသၞာံ ၂၀၀၇ ဂှ်လေဝ် ဗတိုက်သရိုဟ်ကၠုၚ်လဝ်ရ။
0 Comments