ဟံၚ်ဍုၚ် – ပၠံၚ်ကၠေၚ်သၟုဟ်ဓါတ် ကာန်ဗံက်၊ မျာၚ်ကလေဝ် နူရးတၞၚ်သဳ တောဲဗ္ဂပ်နၚ် တွဵုရးဍုၚ်မန်ဂှ် ဆက်ဗစိန်လဝ် ဟွံခိုၚ်ကၠိုက် ထောၚ်ဒၟံၚ်မွဲနှေံမွဲနှေံတုဲ လၟုဟ်ကလေၚ်တောဲမံၚ်တၟိရောၚ် ဂွံဆဵုကေတ်ရ။

ပၠံၚ်ကၠေၚ်သၟုဟ်ဓာတ် သွက်ဂွံဆက်စၠောံ နူကာန်ဗံက်-မျာၚ်ကလေဝ် ဖျေံလဝ်အပ္ဍဲဍုၚ်မန် (ဗီု-ဌာန်ပရိုၚ် ဗၠးၜးမန်)

နူဂိတုမာတ်ချ် ၃ စဵုကဵုအခိၚ်လၟုဟ် ပ္ဍဲကဵုဍုၚ်မုဟ်ဍုၚ်၊ ပ္ဍဲကွာန်ဆက်တဲ တောဲဗ္ဂပ်မံၚ် ပ္ဍဲပွိုၚ်ဍုၚ်မုဟ်ဍုၚ် ၂ ဒၞာဲတုဲ ဖျေံလဝ်ပၠံၚ်ကၠေၚ်သၟုဟ်ဓါတ်၊ စက်ဗစိန် ကေုာံ ကွဳစက်တုက်တိရောၚ်ဂှ် ဂွံဆဵုကေတ်ရ။ ပ္ဍဲပွိုၚ်ဍုၚ်ဇြပ်ဗုမ္ဂး ဖျေံလဝ်ပၠံၚ်ကၠေၚ်သၟုဟ်ဓါတ် ပ္ဍဲကွာန်ဝါခမိတ်ဂှ်လေဝ် ဂွံဆဵုကေတ်ရ။

ဟိုတ်နူဒးကလေၚ်တောဲဗ္ဂပ် ပၠံၚ်သၟုဟ်ဓါတ်တၟိတုဲ တိဗ္ၚ၊ ကၠအ်သွဝ်တံ ညးဍုၚ်ကွာန်တံလေဝ် လီုလာ်အာနွံရ။ ပ္ဍဲပွိုၚ်ဍုၚ်မုဟ်ဍုၚ်မ္ဂး လၟုဟ်ပြဟ်ပြဟ်ဏံ တိၜိုတ် ၂၀၀ ဨက ဒးလီုလာ်အာတုဲ သွက်ဂွံလီုလာ်ပၠန်လေဝ် နွံမံၚ်ဗွဲမဂၠိုၚ်ဏီရ။

“တိအဲ နွံဒၟံၚ် ၄ ဨက၊ လီုအာ ၂ ဨက၊ သှေ်မံၚ် ၂ ဨက။ ဗီုတိအဲလီုဂှ် တိညး တၞဟ်လေဝ် လီုအာဗွဲမဂၠိုၚ် မုလေဝ်ဍေံဟွံကဵု ၚုဟ်လေဲမွဲသာ်ပုဟ်” သာ်ဝွံ ကောန်ကွာန်ဆက်တဲ ပွိုၚ်ဍုၚ်မုဟ်ဍုၚ် နာဲထောန် လဴထ္ၜးကဵုရ။

“တိဗ္ၚဏံဂှ် ဒှ်ဒၟံၚ်ထၟာဲပုၚ်ပိုဲရ၊ ကၠအ်ဂူဇကုလေဝ်ဟွံမွဲ၊ ပတှေ်တိဗ္ၚဏံသၟးရ လၟုဟ်တိဗ္ၚဏံ လီုအာပၠန်တှေ် သွက်ဂွံစသုၚ်ဂှ် မုလေဝ် ဟွံမွဲရ၊ ၜိုတ်သှေ်ဂှ်လေဝ် ကၠောန်စဟွံရုမ်ဂပ်ပုဟ်၊ ဆိၚ်လဝ်ဂှ် ဟွံအာဍုၚ်သေံပုဟ်၊ ကၠောန်အာပ္ဍဲတိဗ္ၚဏံ မွဲအာယုက်ဏောၚ်၊ လၟုဟ်ဒှ်အာဗီုဏံတှေ် ကာလဒးတိတ်ဍုၚ်မ္ၚးလေဝ် ဒးတိတ်ဏောၚ်” သာ်ဝွံ ညးဆက်ဟီုရ။

ပၠံၚ်ကၠေၚ်သၟုဟ်ဓါတ်ဝွံ သၟုဟ်သိုဟ်တိတ်ဒၟံၚ် ဇၟာပ်ပ်ဒၞါဲဆက် ဇၟာပ်ပ်ကွာန်တုဲ ဗတိုဟ်ဒၟံၚ် ဇၟာပ်ပ်သၞာံဂှ်ရ ညးဍုၚ်ကွာန်ဒေသတံ ဖေက်လကိုတ်တဴ ဗွဲမလောန်ရ။ ပ္ဍဲတွဵုရးမန် ပွိုၚ်ဍုၚ်မုဟ်ဍုၚ်၊ ပွိုၚ်ဍုၚ်ဇြပ်ဗု၊ ပွိုၚ်ဍုၚ်ရေဝ်တံဂှ် အောန်အိုတ် ဗတိုဟ်ဒၟံၚ် မွဲသၞာံ ၜါဒၞါဲရောၚ် နာဲပါန်အံၚ် ညးမစုက်လုက်ကဵု ဥက္ကဌကွာန် ပွိုၚ်ဍုၚ်မုဟ်ဍုၚ်မွဲတၠ ဟီုလဴထ္ၜးကဵုရ။

ပၠံၚ်ကၠေၚ်သၟုဟ်ဓါတ် ဗတိုဟ်ကၠုၚ်မ္ဂး ဒပ်ပၞာန်မဒးတာလျိုၚ် ပွဳပွူဒေသတံဂှ် ဗက်ကေတ်အရေဝ်၊ ကေတ်ဒုဟ် လ္တူညးဍုၚ်ကွာန်ဒေသ၊ ဥက္ကဌကွာန်တံတုဲ ဗက်ကေတ်ဒၟံၚ် ဇြဟတ်မၞိဟ် ဇြဟတ်လှုဲ ပ္ဍဲညးဒေသတံ သွက်သ္ဂောံပလေဝ်ပၠံၚ်သၟုဟ်ဓါတ် သွက်သ္ဂောံမၚ်ဂီုကၠီု ပၠံၚ်သၟုဟ်ဓါတ်ရ။ ဗွဲမဂၠိုၚ်ဂှ် ဒးဆဵုဂဗ ပ္ဍဲပွိုၚ်ဍုၚ်မုဟ်ဍုၚ်ရ။

ပၠံၚ်ကၠေၚ်သၟုဟ်ဓါတ် ကာန်ဗံက်-မျာၚ်ကလေဝ်ဝွံ စကၠောန်ကၠုၚ် နူကဵုသၞာံ ၂၀၀၀ တေံတုဲ ဇမၠိၚ်ဍေံမၞုံ ၁၈၀ တိုၚ်ရ။ တောဲဒလောဲနၚ် နူရးတၞၚ်သဳတေံတုဲ ပလံၚ်ဗစိုပ်ကဵုမံၚ် သၟုဟ်ဓါတ် မွဲတ္ၚဲမ္ဂး (၁၁၀ ပြကောဋိကိုဋ် ကုဗပေ) ကုရုၚ်တိဗဳလာတ် မျာၚ်ကလေဝ် အပ္ဍဲတွဵုရးဍုၚ် ကရေၚ်၊ စက်ပၟတ်ၚာၚ်ဒဵု ဍုၚ်မတ်မလီု၊ ရုၚ်စက်ပၟတ်သဓီု ကေုာံ ရုၚ်ဗလးပၟတ် ဍုၚ်လ္ဂုၚ်တံရ။

ဒၟာနူကၠောန်ဗဒှ် ပၠံၚ်သၟုဟ်ဓါတ်ဏံတုဲ ပရေၚ်ဒးဒုၚ်သီတိ၊ ဒးဒုၚ်ပလီုပလာ် ကောန်သမ္ဘာ၊ ဒးဒုၚ်ၜုၚ်တက်ပျဲပျာံ ဂစိုတ်ဂမျိုၚ် ကေုာံ ဒးဒုၚ်ဖံက်ဖကဝ်အခေါၚ်အရာမၞိဟ် ကတဵုဒှ်ကၠုၚ်နာနာသာ်ရ။