ရာၚ်မြဟ် – အလဵုအသဳတၟိဗၟာဏံ ထပက်ပၞာန်ကဵု ဒပ်ပၞာန်သေံဇၞော် (သၟဝ်ကျာ) တေံတုဲ ပတဝ်က္ဍိုပ် ထပက်ကၠုၚ်ပၞာန် လပါ်ဗော်ဍုၚ်မန်တၟိ မာန်မံၚ်ဏောၚ်ဂှ် ဗော်ဍုၚ်မန်တၟိ ပတှေ်စှေ်စိုတ်ရ။
တ္ၚဲကောန်ဂကူမန် ကၠောန်ဗဒှ် ပ္ဍဲဒေသပွူဳဗဟဵု ဗော်ဍုၚ်မန်တၟိ
“ဟိုတ်နူပရေၚ်ဒတူလိုၚ်ပိုဲတုဲ အလဵုအသဳဏံ ပတဝ်ကၠုၚ်က္ဍိုပ် လပါ်ပိုဲမာန်မံၚ်။ ခြာဟွံလအ် ကၠုၚ်ဗတိုက်ပိုဲဏောၚ် ပိုဲဂွံလဝ်ပရိုၚ်။ ဂွံစဵုဒုၚ်မာန်ဂှ် ပ္ဍဲဗော်ပိုဲလေဝ် ပလေဝ်ပလေတ်စလဝ် နွံမံၚ်” ဂှ် ညးမဒှ် ကမ္မတဳ ကေၚ်ကာ ဗဟဵု ဗော်ဍုၚ်မန်တၟိ နာဲယှိုဲတိၚ် ဟီုရ။
အတိုၚ်ပရိုၚ် ကၠုၚ်နူဗွိုၚ်ဗော်မ္ဂး ပ္ဍဲပွဳပွူတိဍာ်ဗော်ဍုၚ်မန်တၟိ ဒပ်ပၞာန်အလဵုအသဳတံ ချဳဒရာၚ်မံၚ် နွံကီုလေဝ် ဟွံဒှ်ပေဲါဗတိုက်ဏီရ။
ပ္ဍဲကောံဓရီု ကမ္မတဳဗဟဵု ဗော်ဍုၚ်မန်တၟိ မကၠောန်ဗဒှ် ပ္ဍဲဌာန်ဂအုပ်ဗဟဵု မၞုံပ္ဍဲကၞောတ်ၜဳရေဝ် နူဂိတုမာတ်ချ် ၃၀ စဵုကဵု ဂိတုအေဗရာ ရ ဂှ် သ္ပအဓိကကဵု ပရေၚ်ဒတူလိုၚ်ဗော်၊ အကာဲအရာ အလဵုအသဳတၟိတုဲ သဳကၠဳကၠုၚ်လဝ်ရ။
အတိုၚ်သၞောတ်ဝ် ဒက်ပ္တန် ဗော်ဍုၚ်မန်တၟိမ္ဂး ကမ္မတဳဗဟဵု ၂၇ တၠ၊ အရန် ၅ တၠ မၞုံကီုလေဝ် ဟိုတ်နူကမ္မတဳဗဟဵုလ္ၚဵုတံ ဒေံါဇူလဝ် နွံတုဲ ကမ္မတဳ ဗဟဵု ၂၄ တၠဟေၚ် တိုန်စိုပ်ကောံဓရီုမာန်ရ။
ဟိုတ်နူအလဵုအသဳတၟိဏံ ထပက်မံၚ်ပၞာန် လတူဒပ်ပၞာန်သေံဇၞော် သၟဝ်ကျာတုဲ ပြသၞာပရေၚ်ဍုၚ်ကွာန် လ္ပသောၚ်ကဵု ပရေၚ်ပၞာန်ညိဂှ် နူကဵုကမ္မတဳ ဓမံက်ပတိုန် ကၟိန်ဍုၚ်ပံၚ်ကောံ ဖေတ်ဒရာ ကလေၚ်ကဵုဏာသတိ လတူအလဵုအသဳတၟိရ။
ပြဟ်ဟ်ဏံ ဒပ်ပၞာန်သေံဇၞော် သၟဝ်ကျာကီု ဗော်ဍုၚ်မန်တၟိကီုဂှ် ဒပ်ပၞာန်ကောန်ဍုၚ်အရၚ် မပ္တံကဵု ကရေၚ်၊ ချေၚ်၊ ကရေၚ်ဍာဲတံကီုဂှ် ပါလုပ်မံၚ် ပ္ဍဲကမ္မတဳဓမံက်ပတိုန် ကၟိန်ဍုၚ်ပံၚ်ကောံ ဖေတ်ဒရာရ။
နကဵုပရေၚ်ဍုၚ်ကွာန် ပရေၚ်ပၞာန် ဂွံတဝ်စၞေဟ်ကဵု အလဵုအသဳဗၟာမာန်ဂှ် နူသၞာံ ၂၀၁၀ ဂိတုနဝ်ဝေမ်ပါတေံ ဒက်ပ္တန်ကၠုၚ်လဝ် ကမ္မတဳ ဓမံက်ပတိုန် ကၟိန်ဍုၚ်ပံၚ်ကောံ ဖေတ်ဒရာရ။
