စၠန်ထဝ် – ပ္ဍဲဂိတုဖေဖဝ်ဝါရဳ လောန်ကၠုၚ်ဏံ သွက်သ္ဂောံသီတိဗ္ၚကၠအ်သွဝ် ညးဍုၚ်ကွာန် ဗွဲမဂၠိုၚ်ဂှ် ပ္ဍဲကွာန်ကအ်ပြေၚ်မွဲ ပွိုၚ်ဍုၚ်ဍာ်ဗု ရးတၞၚ်သဳတေံ နူကဵုဒပ်ဍာ်မောရဝတဳ ၜတ်မံၚ်တိတုဲ ဗစူလဝ်တိုၚ်ရောၚ် ရဲဒေသတံ ဟီုရ။

“ဍေံတံ သိုၚ် ဒၞာဲဗ္တောန်ကွတ်ဘာပၞာန်ဍေံတံဏောၚ် မိၚ်မံၚ်၊ မုလေဝ် ဟွံဟီုကဵု ရဲကွာန်တံ မွဲသာ်ပုဟ်၊ ကၠအ်ထၜိုတ်အဲ ကွာတ်ဂွံမံၚ် ၈ ဨက ကဵု ကၠအ်သိၚ်ဃဵု ၁၈ ဨက ပါအာဖအိုတ်” သာ်ဏံ ညးဒးဒုၚ်သီလဝ်တိကၠအ်မွဲတၠ ဟီုရ။

တိဗ္ၚကၠအ်သွဝ် ဒးဒုၚ်သီလဝ်လၟုဟ်ဂှ် ဇမၠိၚ် မၞုံ ရ တိုၚ်၊ အနာံ မၞုံ ၄ တိုၚ်တုဲ မူစိဨကမၞုံဂှ် ဟွံတီရ။ ရဲကွာန်တံလေဝ် ဒၞာဲလဵု ဂွံအာတေၚ်ဂှ် ဟွံတီအိုတ်တုဲ ညးမွဲလေဝ် ဟွံဂံၚ်တေၚ်အိုတ်ရောၚ် သာ်ဝွံ ညးဆက်ဟီုရ။

“ဒးဖေက်မံၚ် ဒပ်ဍေံတံတှေ် မုလေဝ် ဟွံဂံၚ်ဟီုပုဟ်၊ ကၠအ်အဲဂှ် ၚုဟ်နွံ ၜိုတ် ၃၀၀ ကိုဋ် ပြၚ်မံၚ်ဏောၚ်။ ဂွံကလေၚ်သွံပၠန်လေဝ် ကၠအ်ၚုဟ်နွံ ၜိုတ် ၁၀ ကိုဋ်ဂှ် သွံ ၃ ကိုဋ်လေဝ် မၞိဟ်ရာန် ဟွံမွဲပုဟ်၊ မၞိဟ်လ္ၚဵုတံဂှ်တှေ် ရာန်လဝ်ကၠအ် မွဲသၞာံလေဝ် ဟွံပေၚ်ဏီ ဒှ်အာဗီုဏံ၊ ဇၞာပ်မၞိဟ်ဂှ် စိုတ်ဓါတ်စှေ်မံၚ်ဖအိုတ်” သာ်ဝွံ ညးဆက်ဟီုရ။

ဟိုတ်နူ ဒပ်ဍာ်တံ ပစူတိုၚ်၊ ၜတ်မံၚ်တိဂှ်ရ ရဲကွာန်တံ သွက်သ္ဂောံကၠောန်ကမၠောန် ဟွံမွဲတုဲ လ္ၚဵုတိတ်အာ ဍုၚ်သေံလေဝ် နွံ၊ လ္ၚဵုတံဂှ် ပြံၚ်ဆုဲအာ ဍုၚ်ရေဝ်လေဝ် နွံမံၚ်ရောၚ် ညးဂွံဆဵုလဝ်နမတ် ကောန်ဍုၚ်ရေဝ်မွဲတၠ ဟီုရ။

“မၞိဟ်တိတ်ကၠုၚ် ဍုၚ်ရေဝ်ဏံ နွံၜိုတ် ၁၅ တၠ၊ တုဲပၠန် တိတ်အာဍုၚ်သေံဂှ် ၜိုတ် ၂၀ တၠ နွံမံၚ်ဏောၚ်၊ အဲသၟာန်ရံၚ်ဍေံတံဂှ် ဍေံတံဟီု သွက်ဂွံကၠောန်စ ပ္ဍဲကွာန်ဟွံမွဲတုဲ ဒးတိတ်ကၠုၚ်ဗီုဏံ” သာ်ဝွံ ညးဟီုရ။

သအာၚ်နူဂှ်ပၠန် ဒပ်ဍာ်တံဂှ် ဍဵုဍိုက် သ္ပမာန် လတူကောန်ကွာန်တံကီု ကံက်အခေါၚ်ၚာၚ် လတူကောန်ကွာန်တံကီုဂှ်လေဝ် သ္ပမံၚ်ကီုရောၚ် ကောန်ကွာန်တံ ဟီုရ။

ညးဒးဒုၚ်သီတိတံ သွက်သ္ဂောံကလေၚ်ဂွံၚုဟ်လေဲ ဗွဲမထေက်တန်ဂှ် အာတ်မိက်ပတိုန်ထ္ၜးအာကဵု အလဵုအသဳတၟိဏံရောၚ်ဂှ် ညးတာလျိုၚ် ကံက်တၚ်နၚ် နူဂကောံဒက်ပတိုန် အခေါၚ်အရာမၞိဟ် ပ္ဍဲဍုၚ်မန် နာဲအဲမန် ဟီုရ။

“ဍေံတံ ကၠောန်ဗီုဗီုဏံဂှ်တှေ် ဣဏံ အလန်ကၠာအိုတ် ဟွံသေၚ်ရပုဟ်၊ ပ္ဍဲကွာန်ကောန်သၟိၚ် (မၚ်းသားရွာ)၊ ကွာန်ကြုၚ်ဗ္တဳ (သဲချောၚ်းရွာ) ဗဒဲါဗဒဲါကွာန်ကအ်ပြေၚ်မွဲဏံဂှ်လေဝ် သီကၠုၚ်တိကၠအ်ဗ္ၚ ဟွံသာပုဟ်” သာ်ဏံ နာဲအဲမန် ဆက်ဟီုရ။

ကွာန်ကအ်ပြေၚ်မွဲဝွံ ဒှ်ကွာန်ကအ်မွဲတုဲ မၞုံအကြာ တွဵုရးမန်ကဵု ရးတၞၚ်သဳရ။ လၟိဟ်သ္ၚိ မၞံုၜိုတ် ၆၀၀ ပြၚ်တုဲ ဂယိုၚ်တဴလမျီု နကဵုကမၠောန် ကၠောန်ဝါဗ္ၚ၊ ကၠအ်သွဝ်၊ တမ္ၚာတံရ။