ကောန်ထံၚ်ပရေၚ်ဍုၚ်ကွာန်ဖအိုတ် ဂွံအခေါၚ် သၠးဗၠးဒုဟ်ဒဏ်မာန်ရောၚ် ကောန်ထံၚ်သၟာပရေၚ်ဍုၚ်ကွာန်မန် စၟဳပတှေ်

by ဌာန်ပရိုၚ်ဗၠးၜးမန် | May 9, 2011 | ပရိုၚ် | 0 comments

နာဲမာန် – အလဵုအသဳတၟိ မံက်တိုန်တုဲ ကောန်ထံၚ်ပရေၚ်ဍုၚ်ကွာန်သီုဖအိုတ် ကဵုအခေါၚ် သၠးဗၠးဒုဟ်ဒဏ်ထံၚ်မာန်ရောၚ်ဂှ် စၟဳပတှေ်မံၚ်ရောၚ် သာ်ဝွံ ကောန်ထံၚ်သၟာပရေၚ်ဍုၚ်ကွာန်မန် နာဲယက္ခ ဟီုဂးနၚ်ရ။

နာဲယက္ခ ကေုာံ သမ္ဘာ မိချေတ်ဃေန်

ကၠာဟွံကၠောန်ပေါဲရုဲမာဲ ၂၀၁၀ တေံဏီ ညးတေံစၟဳညာတ်မံၚ် သာ်ဏံရောၚ်ဂှ် လောန်ကၠုၚ်သတ္တဟတုဲကၠုၚ်တေံ သမ္ဘာညး မိချေတ်ဃေန် အဃောအာဆဵုဂဗညး ပ္ဍဲထံၚ်ဂှ် ညးဟီုလဴနၚ် သာ်ဂှ်ရောၚ်။

“ညးဟီုနၚ်ဂှ်တှေ် အလဵုအသဳတၟိ မံက်ကၠုၚ်တုဲတှေ် ဗလးပတိတ်ကဵု ကောန်ထံၚ် သၟာပရေၚ်ဍုၚ်ကွာန်ရောၚ်ဂှ် ညးပတှေ်ကေတ်လဝ်ရ၊ နကဵုအဲဂှ်လေဝ် ပၟိက်မိက်ဂွံကဵုဒှ် ဗီုဂှ်ကီုရ၊ ကၠာပေါဲရုဲမာဲ ဟွံဒှ်ဏီဂှ်လေဝ် ညးကလေၚ်ဗၠးတိတ်မာန်ဏောၚ် ဟီုနၚ်ကဵုအဲကီု၊ ဇၟာပ်အဲ အာဆဵုဂဗညးဂှ် ညးဟီုမံၚ် အတိုၚ်ဏံတွဵုရ” သာ်ဝွံ မိချေတ်ဃေန် ဟီုရ။

ယဝ်ရ ဂွံအခေါၚ်ဗၠးတိတ်မ္ဂး မိက်ဂွံလုပ်ကၠောန် ပရေၚ်ဍုၚ်ကွာန် အပ္ဍဲဗော်ပရေၚ်ဍုၚ်ကွာန် လုပ်သၞောဝ်ရောၚ်ဂှ်လေဝ် နာဲယက္ခ ဟီုဂး ကုသမ္ဘာညးကီုရ။

နာဲယက္ခဝွံ နူကဵုဗော်ဍုၚ်မန်တၟိ ဒှ်သၟာပရေၚ်စန်ဒက်မွဲတၠတုဲ ကာလဗော်ဍုၚ်မန်တၟိကဵု အလဵုအသဳပၞာန်တံ ဒေါအ်လဝ်ပန်ပှော်တေံ ဟိုတ်နူညး ကဵုကၠုၚ်လဝ် တန်ဗတောန် ဘာပရေၚ်ဍုၚ်ကွာန် အကြာခၟဳသၚ်မန်ကေုာံ သၟတ်မန်ဗွဲမဂၠိုၚ်တံဂှ်ရ ပြာကဋ်တဴ အကြာကောန်ဂကူမန်ဗွဲမဂၠိုၚ်ရ။

ပ္ဍဲသၞာံ ၂၀၀၃၊ ဂိတုဂျူလာၚ် ၁၇ ဂှ် အလဵုအသဳပၞာန်တံ ရပ်ထိၚ်ထောံ နာဲယက္ခ၊ နာဲဆီဂကူ ကေုာံ ရဲဂကောံညးတံ ၅ တၠ သီုက္ဍိုပ်ဂကောံ လာန်ပျကျေဝ် (လမ်းပြကြယ်) ညးဗက်ဂဗုတ် ဥူအေမျေတ်၊ အေဝ်ဒဳတာ ဂျာနေဝ် ဝေၚ်ဇြဟတ် Eleven ဇြဝ်တိတ်ထိုဲတံရ။

ပ္ဍဲသၞာံ ၂၀၀၃၊ ဂိတုနဝ်ဗေန်ပါ ၂၈ တေံဂှ် နကဵုအမှုရာဇဝတ် ချပ်ဇန် သွက်ဂွံပုန်ကဵု အလဵုအသဳဍုၚ် စောဲစပ်အမှုတုဲ ဖျေံထံၚ်အမိၚ် ကာဂစိုတ်ကီုလေဝ် ဟိုတ်နူကလေၚ်သှ်ခၠေဝ်အမှု ပ္ဍဲရုၚ်သၞောဝ်ဓရ် ကဆံၚ်လတူပၠန်တုဲ ဂွံအခေါၚ် ဗၠးဒုဟ် ကာဂစိုတ် ပြံၚ်သၠာဲဖအောန်ဖျေံ ဒုဟ်ဒးဒုၚ်ထံၚ် မွဲလအိတ်အာယုက်ပၠန်ရ။

လၟုဟ် နာဲယက္ခ ဒးဒုၚ်ရပ်ထိၚ်လဝ် ပ္ဍဲထံၚ်အၚ်စိၚ် တိုက် (၄)၊ ဗဒမ် (၆) တုဲ နာဲဆီဂကူဂှ် ဒးဒုၚ်ပြံၚ်ဏာ ထံၚ်သာယျာဝတဳ ပ္ဍဲသၞာံ၂၀၀၉ တေံရ။

နကဵုအလဵုအသဳတၟိဏံဂှ် သွက်ဂွံကဵုအခေါၚ် သၠးဗၠးဒုဟ်ဒဏ် ကုကောန်ထံၚ်လ္ၚဵုဂှ် အစဳဇန်နွံမံၚ် ဟီုကီုလေဝ် ကောန်ထံၚ် သၟာပရေၚ်ဍုၚ်ကွာန်တံ ပါ ဟွံပါ ဟွံဂွံတီ ချိုတ်တ်ပၠိုတ်တ်ဏီရောၚ်ဂှ် သ္ပအစာံကဵု ဂလာန် ညးမပါလုပ် ပ္ဍဲဂကောံအလဵုအသဳမွဲတၠ ဟီုပတိတ်လဝ်ဂှ်တုဲ ပ္ဍဲမုက်လိခ်ပရိုၚ် AFP ချူဓမံက်ပတိတ်လဝ်ပရိုၚ် နွံရ။

အပ္ဍဲကဵုဍုၚ်ဗၟာဂှ် ကောန်ထံၚ် သၟာပရေၚ်ဍုၚ်ကွာန် ၂၂၀၀ တၠပြၚ် နွံမံၚ်ရောၚ် ဂကောံကဵုအခေါၚ်ဗလးဒုဟ်ဒဏ်ဍုၚ်ဂမၠိုၚ် တန်တဴဒၟံၚ် ပ္ဍဲဍုၚ်လာန်ဒါန်တေံ ဟီုဓမံက်ပတိတ်လဝ်ပရိုၚ်ရ။

← ဗော်ကောန်ဍုၚ်အရၚ်တံ ပံၚ်ကောံတုဲ အာတ်အခေါၚ် ဗ္တောန်လိက်ဘာသာမိမရောၚ် ဂကောံယေန်သၞာၚ်မန် ၂ ဂကောံ ဂွံအခေါၚ် ထ္ၜးပျး ပ္ဍဲတက္ကသိုလ် မဟဳဍောန် (Mahidol) ဍုၚ်သေံ →

Written by

နူကဵုတ္ရဲသၟတ်မန် (၁၃)ဝါဏံ ဗဒှ်ပတိုန်ဇြဟတ်သၟတ် သွက်ဂွံဇက်တိုန်ဍုင်မန်

by ဌာန်ပရိုၚ်ဗၠးၜးမန် | Dec 27, 2024 | ပရိုၚ်

တ္ၚဲသၟတ်မန်ဝွံ သ္ပအစာံကဵုသၟတ်ခေတ်တၟိကၠောန်ဗဒှ်ကၠုင် ကောံဓရီုလၟေင်ကၠာအိုတ် ပ္ဍဲကျာ်သုက် ဍုၚ်မတ်မလီု သၞာံ (၁၉၄၆) ဂိတုဒဳဇြေမ်ဗာ (၂၈) သွက်ဂွံဒစးဒုင်ဂၠာဲဂၠံင်ကောန်ဂကူ သွက်ဂွံဗၠးၜး၊ နကဵုဂၠံင်တရဴပေါဲဗတိုက်ရပ်လွဟ် သၟဝ်တၠအဝဵု (ပဆပလ)တုဲ ပ္ဍဲပေါဲသၠာဲဂတးလညာတ်သၟတ်မန် အလန်တတိယ ပ္ဍဲသၞာံ ၂၀၁၂၊ ဂိတုအေဗရေဝ် (၂၁) စဵုစိုပ် (၂၄) ဗၞတ် (၃) တ္ရဲ ဒၞာဲကွာန်ဝါဗိုင် ပွိုင်ဍုင်ရေဝ်သၠုင်ကျာဂှ် သ္ပကၠုင်ဒတန် တ္ရဲသၟတ်မန် ရ။

ဗော်ပရေင်ဍုင်ကွာန် မလုပ်ပေါဲရုဲမာဲတၠအဝဵုပၞာန်ကၠောန်ဂှ် တုပ်သၟဟ်ကဵုပၠောပ်လမျီုကၠချိုတ်တ်

by ဌာန်ပရိုၚ်ဗၠးၜးမန် | Dec 26, 2024 | ပရိုၚ်

ကၠာအိုတ်ဂှ် ဂရိခေတ်တြေံ၊ ရဝ်မခေတ်တြေံ စိုပ်ကၠုင်ခေတ်လဒေါဝ်ဂှ် ဨကရာဇ်ရဝ်မ ကေုာံ သွက်သ္ဂောံရုဲစှ်ပတိုန် က္ဍိုပ်သ္ကိုပ် စပ်ကဵုပရေင်အုပ်ဓုပ် ညံင်ရဴသၟိင်လကျာ်ပုက် (သၟိင်လကျာ်ခရေတ်) စသုင်စောဲကၠုင် ပေါဲရုဲမာဲရ။ သ္အာင်နူဂှ် အိန္ဒိယျခေတ်တြေံ က္ဍိုပ်သ္ကိုပ် ပရေင်ဘာသာ မောတ်သလေန်ဂမၠိုင်ကီု၊ အောတ်မန် ကေုာံ အလဳ၊ က္ဍိုပ်သ္ကိုပ်ဘာသာ ရာယှဳဒေါန်ဂမၠိုင် ပ္ဍဲအရာပရေင်အုပ်ဓုပ်မ္ဂး ဂါနတံ ရုဲစှ်ရာဇာကီု၊ အခိင်ခေတ်လဒေါဝ်စတမ်တေံ ရုဲစှ်ဨကရာဇ်ပါလ ဂိုဝ်ပါလ ပ္ဍဲကဵုဗေန်ဂဝ် စသုင်စောဲကၠုင်လဝ် ပရေင်ရုဲစှ်မာဲ ဂွံဆဵုကေတ်ဝင်ရ။

0 Comments

Submit a Comment Cancel reply

This site uses Akismet to reduce spam. Learn how your comment data is processed.