မိလျးထဝ် – ပ္ဍဲဒေသပယျဵုကျာ်ပိဂှ် ၜိုန်ရအကာဲအရာ ပရေၚ်ဂီုကၠီု ဟွံၜိုဟ်သြိုဟ်ဏီလေဝ် ပ္ဍဲဂိတုဂျုန် ၆ ဏံ စပံက်ဏာ ဂၠံၚ်ဍာ်ကြုၚ်ထဝ် – လှာဒကှ်ရောၚ်ဂှ် ဂွံတီကေတ် နူရဲဍုၚ်ကျာ်ပိတံရ။

“နူကဵုပိုဲဂှ် မုလေဝ် အခက်အခုဲ ဟွံမွဲ မွဲသာ်ပုဟ်၊ လၟုဟ်ဂှ် ၜိုန်ရ ဒှ်ဒၟံၚ်ပေဲါဗတိုက်ကီုလေဝ် မၞိဟ်အာတရဴဂှ် နွံဒၟံၚ်ဟဂှ်ရ၊ ဆဂး မၞိဟ်လ္ပာ်တိုန်ရဂၠိုၚ်၊ လ္ပာ်စှေ်ဂှ် ဟွံမွဲစကွေံပုဟ်” သာ်ဝွံ တၠဂၠုၚ် နူကွာန် ဝေသာလဳ မွဲတၠ ဟီုရ။

ဂၠံၚ်ဍာ်ကြုၚ်ထဝ် - လှာဒကှ်မွဲဒၞဲါ

ပ္ဍဲသၞာံဏံဂှ် လဝက နူလ္တူဍုၚ်ကျာ်ပိတံလေဝ် စှေ်အာကေတ်ဒၟံၚ် အကံက် ပ္ဍဲသၞေဟ်ဂၠုၚ် ကြုၚ်ထဝ်တုဲ ဂၠုၚ်မွဲမ ဒးကဵု ၁၀၀ ၜါတ်ကဵု လဝက တံရ။

ပ္ဍဲသၞာံတုဲကၠုၚ်တေံဂှ် ပ္ဍဲသၞေဟ်ဂၠုၚ် ကြုၚ်ထဝ် ဂကောံဂၠုၚ် (ထော့မဲပါ) နူဒပ်ပၞာန် ဒဳကေဗဳအေ၊ (သန်မြန်သူ) နူဂကောံ (ဒေသဖွံ႕ဖြိုးရေး)၊ ပန်းရဂုံ၊ (အေးချမ်းမောၚ်)၊ (နော်တယာ) နူဂကောံ (ကရၚ် ၚြိမ်းချမ်းရေး ကောၚ်စီ) ကေုာံ ဂကောံဂၠုၚ် ရာမည နူဗော်ဍုၚ်မန်တၟိ သီုဖအိုတ် မၞုံ ၆ ဂကောံရ။

ဟိုတ်နူအကာဲအရာ ပရေၚ်ဒေံါပန်ပှော် လီုကၠုၚ်တုဲ သၞာံဏံဂှ် ဂကောံဂၠုၚ် ရာမည ဒေံါဇူလဝ်ကီုလေဝ် ဂကောံဂၠုၚ် (ရေႊဖြူလေး) နူကဵု ဂကောံကျဖောအ် ကေုာံ ဂကောံဂၠုၚ် (လပြည့်ဝန်း) ထပ်ပဵုတိုန် ၜါဂကောံရ။ ဂၠုၚ်မွဲမမ္ဂး ဒးကဵု သြန်လုပ်ဂကောံ (အသၚ်းဝၚ်ကြေး) ၃ ဠက် ဒကေဝ်ရ။

“မၞိဟ်မွဲတှေ် ဒးကဵုဒၟံၚ် ခရိတ်ဂၠုၚ် ၃၅၀၀၀ ဒကေဝ်တုဲ သွက်ဒပ်ပၞာန်ဗၟာတံဂှ် မၞိဟ်မွဲ ဒးကဵု ၁၀၀၀ ဒကေဝ်ရောၚ်” သာ်ဝွံ မၞိဟ်အာတရဴမွဲတၠ ဟီုရ။

ပ္ဍဲဂိတုဂျုန် ၅ ဏံ ဂကောံရပ်လွဟ် ဟွံတီယၟု မွဲဂကောံ လုပ်ပန် ဗတိုဟ် လတူဍုၚ်ကျာ်ပိဂှ်ရ ရုၚ်စရဖ ကေုာံ ဇြပ်သဘၚ်ဓဝ်မွဲမ လီုလာ်အာတုဲ ကောန်ဂကောံ စရဖ မွဲ၊ ကောန်ၚာ်မွဲ ချိုတ်တုဲ ဒးအာဝပ် ၃ တၠရ။