နာဲသာၚ်-ဋ္ဌာန်ပရိုၚ်ဗၠးၜးမန် – ပ္ဍဲဂိတုဇှေ် (၁၄) မံက် ကောန်ကွာန် ကျာ်ဇၞော်အာစာတၠ ဝၚ်က ဗၞတ် (၂၀၀) တၠပြၚ် ဒုၚ်ကညဖျဴနၚ် သၚ်သၟတ်မန် ဂွံလဝ်တဆိပ်ကြာ အံၚ်ဇၞးလဝ် လိက်ပရိယတ္တိဍုၚ်သေံ ဂြုဂြုဂြီုဂြီုတုဲ စိုပ်ဘာကျာ်ဇၞော်အာစာဂှ် ပတိုန်ဂုဏ်စရာဲ နဒဒှ်သၚ်အာဇာနဲရ။
ခမဳသၚ် ဂွံနၚ်တဆိပ် အံၚ်ဇၞးလဝ် လိက်ပရိယတ္တိ ဍုၚ်သေံ (၉) ပယိုက်ဂှ် မွဲဇကု၊ (၈) ပယိုက်ဂှ် မွဲဇကု၊ (၆) ပယိုက်ဂှ် မွဲဇကု ဒှ်တုဲ ဂွံနၚ် သီုပၞိက်ကြာသၚ် နူကဵုဌာန်တိုက်လိက် ဍုၚ်သမုဒ်ပရကာန်ရောၚ်။ မ္ၚးနူကဵုခမဳသၚ် ဂွံတဆိပ်ကြာသၠုၚ် (၃) ဇကုဏအ်တုဲ ခမဳကေုာံ ထပိုဲ (၇) ဇကုတအ်လေဝ် အံၚ်ဇၞးကၠုၚ် လိက်ပရိယတ္တိ (၃) ပယိုက် ကဵု (၂) ပယိုက်တအ် နွံရ။
ပ္ဍဲကဵုသဘၚ်ကၞာ အာစာတၠဇၞော် သံဃနာယက ခရိုၚ်ကာန်မရဳ အပ်ပြာပ် တဆိပ်ကြာဂှ်မဂး တၠဂုဏ်အာစာ နူကဵု ဘာဝါတ်တာဲ ဟီုဂးဏာ ပရေၚ်အထိုၚ်အသး သာ်ဝွံရ။
သၚ်သၟတ်မန် မကလိဂွံ တဆိပ်ကြာ ပရိယတ္တိ မွဲဇကု
“ခမဳသၚ်ကီု ကောန်ကွာန်ဝၚ်ကတအ်ဂှ် အတိုၚ်ကျာ်ဇၞော်အာစာတၠဝၚ်က ဥတ္တမမဟာထေရ် ဖျေံလဝ်ဂၠံၚ်တရဴဟေၚ် ဆက်တုဲ ထိၚ်ဒဝ်အာ သာသနာကျာ်ဂှ် ဒးထိုၚ်သးရ။ လၟုဟ်
ကောန်ထပိုဲ ကောန်ပယျၚ် ဘာဝၚ်ကဂှ် ဂွံဏာတဆိပ်ကြာ ဂၠိုၚ်အိုတ်တုဲ ခမဳသၚ် ခရိုၚ်ကာန်မရဳတအ် မိပ်တဴစိုတ် ဗွဲမလောန်ရကျာ် သီုကဵု ဗှ်ဗၞုဟ် မဟာဂုဏ် ကျာ်ဇၞော်အာစာတၠရကျာ်’’
အံၚ်ဇၞးလိက်ပရိယတ္တိ (၉) ပယိုက်ဂှ် ဒှ်သၠုၚ်အိုတ် ပ္ဍဲအရာ ကတ်လိက် ပရိယတ္တိ ဍုၚ်သေံတုဲ ကျာ်ဇၞော်အာစာဝၚ်က ဂဇအ်ဒၟံၚ်ဘာလၟုဟ် မၞံုယၟု ကျာ်ဇၞော် မဟာသုချာတ် အံၚ်ဇၞးလဝ် ကၠာအိုတ်တုဲ ခမဳသၚ်သေံကီု သၟိၚ်တၠသေံကီု သ္ပအထိုၚ်အသး ပအပ်ကဵု ဂဇံဘာဝၚ်က ကျာ်ဇၞော်အာစာတၠ ဥတ္တမ သိုၚ်ခၞံလဝ်ဂှ်ရောၚ်။
လၟုဟ် သၚ်သၟတ်မန် ကောန်ကွာန်ဝၚ်က တၠဂုဏ်မဟာစာန်ဓန် အံၚ်ဇၞးဂွံနၚ် (၉) ပယိုက်ပၠန်တုဲ ပ္ဍဲကဵုဒေသခရိုၚ်ကာန်မရဳ ကၟိန်ဍုၚ်သေံဏအ်မ္ဂး ဘာဝၚ်ကမွဲဟေၚ် ဂွံတဆိပ်ကြာဏအ် ဂၠိုၚ်အိုတ်ရောၚ်။
ကောန်ကွာန်ဝၚ်ကကီု ကျာ်ဇၞော်အာစာ မဟာသုချာတ်ကီု မိပ်တဴစိုတ် ဗွဲမလောန်တုဲ ပကောံဂွံကွဳစက် ဗၞတ် (၂၆) မ ကောန်ကွာန် ဗၞတ် (၂၀၀) တၠပြၚ်ၚ်တအ် အာစိုပ် ဘာဝါတ်တာဲ ဍုၚ်ကာန်မရဳ ဒုၚ်ကညဖျဴနၚ် ခမဳသၚ် ကေက်သကာတအ်တုဲ အလုံကွာန်မွဲ မိပ်စိုတ်ဒုၚ်တၠုၚ် ထိုၚ်သးအိုတ်ရ။
ကောန်ကွာန်ဝၚ်ကတံ ဃောက္ညဒုၚ်တၠုၚ်နၚ် သၚ်သၟတ်မန် မကလိဂွံ တဆိပ်ကြာ ပရိယတ္တိ
“လိက်ပရိယတ္တိ ဍုၚ်သေံဂှ် ရံၚ်ကဵု လိက်ပရိယတ္တိမန် ဍုၚ်ပိုဲတအ်တှေ် ညးတအ်ဂှ် သဝ်နူကဵုပိုဲ၊ (၉) ပယိုက်ဂှ် ဒှ်တန်ဇၞော် (အကျဳ) ဍုၚ်ပိုဲတအ်ရ၊ ဓမ္မာစရိယ ဟွံသေၚ်ဏီ” ရဴဝွံ ကျာ်ဇၞော်တိုက်လိက် နူ္ဍဍုၚ်မန်မွဲဇကု သောၚ်ထၜးကဵုရ။
နူကဵုကျာ်ဇၞော်အာစာတၠ ဂျိုၚ်တဴမံၚ်တေံဟေၚ် ကျာ်ဇၞော်အာစာဂှ် ရံၚ်အာ အနာဂတ် ပရေၚ်ပညာ ဂကူမန်တအ်တုဲ သိုၚ်ခၞံဘာဗတောန်လိက်ကီု ပတန်ကၠုၚ် ဘာလကျာ်မန် ပ္ဍဲဍုၚ်သေံကီု ပလံၚ်ဗစိုပ် ခမဳသၚ်မန်တအ် ကဵုကတ်ပညာ ပရိယတ္တိကီု ကၠောန်သ္ပကၠုၚ် လၟေၚ်ၚ်တုဲ သၚ်မန်ကီု ညးဍုၚ်ကွာန်မန်ကီု ဂွံတန်တဴကၠုၚ် ပ္ဍဲဍုၚ်သေံရ။
ပ္ဍဲတ္ၚဲဇှေ်ပေၚ် ဇၟာပ်ပ်သၞာံဂှ် ခမဳသၚ်မန် အလုံမွဲဍုၚ်တံ သ္ပသဘၚ်ကလအ်အာစာတုဲ ကၠုၚ်စိုပ်ကွာန်ဝၚ်က ကၠုၚ်ကလအ် ကျာ်ဇၞော်အာစာတၠ ဝၚ်က ဘဒ္ဒန္တ ဥတ္တမ မဟာထေရ်ရ။ ဥတုဇ ကလာပ်ရုပ် ကျာ်ဇၞော်အာစာဂှ် နကဵုအသံ သၟိၚ်တၠသေံတအ် စွံလဝ် ပ္ဍဲဘာဖိုဟ်တုဲ ဂကူမန်ကီု ဂကူသေံကီု ဂွံကလအ်လ္ၚောဝ်အိုတ်ရ။
