ကြဴနူဗမ်ဗတိုဟ် လ္တူဍုၚ်ကျာ်ပိတုဲ ဆေၚ်ဖျာတံ ကၟာတ်

by | Jun 6, 2011 | ပရိုၚ် | 0 comments

မိလျးထဝ် – နူတနေံဏံ ဟိုတ်နူဗမ်ဗတိုဟ်အာ ပ္ဍဲရုၚ် (စရဖ) အလဵုအသဳ လ္တူဍုၚ်ကျာ်ပိဂှ်ရ တ္ၚဲဏံဂှ် ဆေၚ်ဖျာ သွံကပေါတ်နာနာ ကေုာံ ဆေၚ်ဖျာထဝ် မၞံုဒၟံၚ်လ္တူဍုၚ်ကျာ်ပိတံ ကၟာတ်ထောံအိုတ်ယျရောၚ်ဂှ် ဂွံတီကေတ် နူရဲဍုၚ်ကျာ်ပိတံရ။ 

“လၟုဟ်ဂှ် ဆေၚ်ဖျာဍောတ်တ်တံရ ပံက်၊ ဖျာဇၞော်ဇၞော်တံ၊ ဖျာထဝ်တံဂှ် ဟွံဂံၚ်ပံက်အိုတ်ပုဟ်” သာ်ဝွံ ရဲဍုၚ်ကျာ်ပိမွဲတၠ ဟီုရ။

နာဲအံၚ်ဆာန် ကောန်ဗော်ဍုၚ်မန်တၟိ မွဲတၠ ဒးလဝ်ဝပ်တုဲ အဃောတိုန်မံၚ်ရုၚ်ဂဥုဲပ္ဍဲပလိုၚ်ဂျပါန် ( ဗီု - ဌာန်ပရိုၚ်ဗၠးၜးမန် )

နာဲအံၚ်ဆာန် ကောန်ဗော်ဍုၚ်မန်တၟိ မွဲတၠ ဒးလဝ်ဝပ်တုဲ အဃောတိုန်မံၚ်ရုၚ်ဂဥုဲပ္ဍဲပလိုၚ်ဂျပါန် ( ဗီု - ဌာန်ပရိုၚ်ဗၠးၜးမန် )

ဟိုတ်နူပရေၚ်ဂီုကၠီု ဟွံခိုဟ်တုဲ ကောန်ဍုၚ်ကျာ်ပိ မကၠောန်ဒၟံၚ်ကမၠောန် ပ္ဍဲရုၚ်ကမၠောန်ဒၞပ် ကေုာံ ရုၚ်ကမၠောန် ဇိၚ်ဂၠိက်ယာတ် (ရုၚ်စက်) မၞံုပ္ဍဲကုန်ကျာ် ကျာ်ပိ သြၚ်သေံတံကီု တၠကၠအ်တံကီု ဟွံဂံၚ်အာကမၠောန်အိုတ်ရောၚ်ဂှ် ညးဆက်ဟီုရ။

“ပိုဲဂွံမိၚ်ကေတ် ပရိုၚ်ဂှ်တှေ် တ္ၚဲဏံ သွက်ဂွံဒှ် ပေဲါဗတိုက် နွံမံၚ်ဏီ၊ ဟိုတ်ဂှ်ရ ရဲဍုၚ်ကျာ်ပိတံ ညးမွဲလေဝ် ဟွံဂံၚ်အာကၠောန်ကမၠောန်” သာ်ဝွံ ကောန်ဍုၚ်ကျာ်ပိဂှ် ဟီုရ။

အလုံဍုၚ်ကျာ်ပိမွဲ သ္ၚိတ်ဇြမံၚ်တုဲ လတူဍုၚ်ဂှ်လေဝ် ဟွံဆဵုကေတ် ဒပ်ပၞာန် အလဵုအသဳတံရောၚ် ညးတာလျိုၚ် ဗော်ဍုၚ်မန်တၟိမွဲတၠ ဟီုရ။

“ကောန်ပၞာန်မွဲလေဝ် ပိုဲဟွံဆဵုပုဟ်၊ အဲထေၚ်ကေတ်တှေ် ညးတံ ပရးလဝ်ပၞာန် မ္ၚးဍုၚ်ဟာ ဟွံတီ” သာ်ဝွံ ညးဟီုရ။

နူတနေံ ပ္ဍဲဂိတုဂျုန် ၅ အခိၚ် ၃ နာဍဳ သဝ်တ္ၚဲဂှ် ဂကောံရပ်လွဟ် ဟွံတီယၟုမွဲဂကောံ မၞိဟ် ၄ တၠ ကၟာတ်လဝ်မုက်တုဲ လုပ်ဗတိုဟ်ဗမ် ပ္ဍဲရုၚ် (စရဖ) ကေုာံ ဇြပ်သဘၚ်ဓရ် ဍုၚ်ကျာ်ပိတုဲ သီုကတဵုဒှ်ပန်ပှော် ညးသကအ်ဂှ်ရ ညးမၞုံလျိုၚ် နူရုၚ် (စရဖ) မွဲတၠ ကေုာံ ကောန်ၚာ်ဗြဴ အာယုက် ၜိုတ် ၁၃ သၞာံမွဲတၠ ချိုတ်အာတုဲ မၞိဟ် (၄) တၠ ဒးအာဝပ်ရ။

ကောန်ၚာ်ဗြဴချိုတ်အာဂှ်ဝွံ ဃောမၞုံဒၟံၚ် ဂတမုက်ရုၚ်ခေပ်သော် ဒးလွဟ် ချိုတ်အာဒၞာဲဂှ်တုဲ ဒု-အကြာပ် ဥူကျဝ်ကျဝ်အံၚ် နူရုၚ် (စရဖ) ဂှ် ဟိုတ်နူအသိၚ် ဒးဝပ် စုတိအာ ပ္ဍဲရုၚ်ဂဥုဲရ။ ပ္ဍဲညးဒးဝပ်တံဂှ် ညးလျိုၚ်သၞေဟ်ကၚ် ဗော်ဍုၚ်မန်တၟိ နာဲအံၚ်ဆာန် ကော် နာဲသော်ဂၠိၚ် ကေုာံ ညးဒဳကွဳလိုန်ဓါတ်လိၚ် ၂ တၠ ပါလုပ်ရ။

ဒပ်ပၞာန်အလဵုအသဳ လ္တူဍုၚ်ကျာ်ပိတံဂှ် မိၚ်လဝ်ပရိုၚ် ဒပ်ပၞာန်ဒဳကေဘဳအေတံ သွက်ဂွံလုပ်ဗတိုက် ဍုၚ်ကျာ်ပိ နွံမံၚ်တုဲ နူသတ္တဟတုဲကၠုၚ်ဂှ် ပတေၚ်လဝ်ဂီုကၠီု ပ္ဍဲဍုၚ်ရ။ အခိၚ်လုပ်ဗတိုဟ်ဗမ် ပ္ဍဲရုၚ် (စရဖ) ဏံဂှ် ဒှ်အခိၚ် သၠာဲဂီုကၠီုတုဲ ညးမၚ်ဂီုကၠီုတံ ဟွံမွဲ ပ္ဍဲရုၚ်ဂှ်အိုတ်ရ။

ကြဴနူပေဲါရုဲစှ်မာဲ ပ္ဍဲဂိတုနဝ်ဝေမ်ပါ ၈၊ သၞာံ ၂၀၁၀ တေံ ဒပ်ပၞာန်ဒဳကေဘဳအေ တမ်ဒပ် (၉၀၇) တံ လုပ်ဗတိုက် ဍုၚ်ကျာ်ပိတုဲဂှ် ဒပ်ပၞာန် မၞုံလတူဍုၚ်ကျာ်ပိတံ ရုပ်သီထောံ သၞေဟ်ကၚ် မၞုံမ္ၚးဍုၚ်တုဲ ပသှေ်စွံလဝ် ပ္ဍဲရုၚ်အလဵုအသဳ လတူဍုၚ်ကျာ်ပိမွဲဒၞာဲဟေၚ်ရ။

ဟိုတ်နူပေဲါဗတိုက် အလန်ကၠာတေံဂှ် ညးဍုၚ်ကွာန် ဍုၚ်ကျာ်ပိ လၟိဟ် ၂ လ္ၚီပြၚ် ဂြိပ်ဒဴပၞာန်တုဲ စိုပ်အာ လပါ်ကွာန်ပလိုၚ်ဂျပါန်၊ ကွာန်ဂူၜဴ ဒၞာဲတိဍာ် ဗော်ဍုၚ်မန်တၟိ ထိၚ်ဒဝ်လဝ်ဂှ်ရ။

Written by

Related Posts

သ္ၚိဟွံကဵုဩန် သွက်လိၚ်မၞိဟ်ယိုက်ဂၠေၚ်ပၞာန်(ဗၟာ)လ္ၚဵု ဒးကံက်မာဲလုပ်ပၞာန်

သ္ၚိဟွံကဵုဩန် သွက်လိၚ်မၞိဟ်ယိုက်ဂၠေၚ်ပၞာန်(ဗၟာ)လ္ၚဵု ဒးကံက်မာဲလုပ်ပၞာန်

သ္ၚိညးဟွံကဵုဩန် သွက်ဂွံလိၚ်စုတ်မၞိဟ်စၞးယိုက်ဂၠေၚ်သ္ပကောန်ပၞာန်ဗၟာ ပ္ဍဲဒေသလ္ၚဵုဂှ်ဝွံ ဒးကံက်မာဲလုပ်ပၞာန်ဂှ် စဒှ်ကၠုၚ်ယျရောၚ် ဂကောံအုပ်ဓုပ်အရာပ် ဒးဖန်ဇန်မွဲတၠဂှ် ဟီုလဴထ္ၜးရ။

ပ္ဍဲအရာလိင်မၞိဟ်သ္ပကောန်ပၞာန်ဗၟာစၞးအရာပ်ကွာန်ဂှ် ဂကောံအုပ်ဓုပ်အရာပ်-ကွာန်လ္ၚဵု ဒးကၠတ်ဗပေင်စုတ်လဝ်ဩန် သွာင်ပရဟိတကွာန်

ပ္ဍဲအရာလိင်မၞိဟ်သ္ပကောန်ပၞာန်ဗၟာစၞးအရာပ်ကွာန်ဂှ် ဂကောံအုပ်ဓုပ်အရာပ်-ကွာန်လ္ၚဵု ဒးကၠတ်ဗပေင်စုတ်လဝ်ဩန် သွာင်ပရဟိတကွာန်

သွက်ဂွံဗပေင်လဝ်ဩန် ဒၞာဲလိင်မၞိဟ်သ္ပကောန်ပၞာန်ဗၟာစၞးအရာပ်-ကွာန်ဂှ် ဂကောံအုပ်ဓုပ်အရာပ်-ကွာန်လ္ၚဵု မ္ဒးကၠတ်ဗ ပေင်စုတ်လဝ်ဩန် သွာင်ပရဟိတကွာန်နွံမံင်ရောင် ညးလုပ်ဂကောံအုပ်ဓုပ်ကွာန် ဒေသဍုင်မန်မွဲတၠ ဟီုလဴ ထ္ၜးရ။

ဗီုညး ညးပတေင် ပရေင်ဍုင်ကွာန် ဆလအ်ဟွံၜိုဟ်သြိုဟ်

ဗီုညး ညးပတေင် ပရေင်ဍုင်ကွာန် ဆလအ်ဟွံၜိုဟ်သြိုဟ်

ပိုဲမၞိဟ်တံမ္ဂးဂှ် ဇၟာပ်ပ်တ္ၚဲ မ္ဒးဆဵုဂဗမံင်ကဵုပြသၞာဂမၠိုင်တုဲ ဇၟာပ်ပ်တ္ၚဲ ပိုဲမၞိဟ်တံ မ္ဒးပသောင်ဒၟံင် ပြသၞာရ။ စပ်ကဵုပသောင်ပြသၞာဂှ် ယဝ်ရစိစောန်မံင်အရာဇဳသာ်မ္ဂး က္လိဂွံဂုဏ်ဖဵု ဗွဲမဂၠိုင်မာန်ရ။ ပြသၞာလ္ၚဵု မဆဵုဂဗလၟုဟ်ဂှ် ကြံင်မ္ၚိုဟ်နူကဵု ပြသၞာကေင်ဆဵုဂဗလဝ် လောန်ကၠုင်တုဲတုဲတေံ ဂၠိုင်ကဵုဆလေဝ်ဒှ်မာန်ရ။ ပြသၞာဂှ် ဗွဲမဂတာပ်တဲ သီုဟွံမွဲကဵုပရေင်ခက်ခုဲ သောင်က္လးမာန်မ္ဂး ဒှ်ညးမၞုံကဵုအစောန်စရာဲခိုဟ်ရ။ ဇၟာပ်ပ်ပြသၞာ နဲသောင်က္လးဍေံ နွံမွဲဗီုဓဝ်ဟွံသေင်ရ။ သွက်သ္ဂောံသောင်က္လးပြသၞာဂှ် ဗီုလဵုပိုဲပလေဝ်ပလေတ်လဝ်နွံနွံ အရာပိုဲဟွံတီလဝ်တံ နွံမံင်လၟိုန်ရ။ ဟိုတ်ဂှ်ရ ပြသၞာညံင်ဟွံဂွံဒှ်ဂှ် မ္ဒးစွံလဝ်သတိလၟိုန်တုဲ ဒှ်ပြသၞာရမ္ဂး မ္ဒးပသောင်ကၠေံ ဍေံပြဟ်ဟ်ရောင်။

0 Comments

Submit a Comment

Your email address will not be published. Required fields are marked *

This site uses Akismet to reduce spam. Learn how your comment data is processed.