ရာၚ်မြဟ် – ပ္ဍဲသၞာံ ၂၀၁၁ ကၠာဟွံဂွံအိုတ်ဏံ ကၠောန်ဗဒှ်ပေဲါရုဲမာဲအကြာမ္ဂး ညံၚ်ဂွံဒှ်ပေဲါရုဲမာဲသၠးသၠးပွးပွး နွံကဵုဗဗွဲဓဝ်ဂှ် ဗော်ဒဳမဝ်ကရေဇြဳအလုံရးမန်တံ အာတ်မိက်ပတိုန်ထ္ၜးလဝ် ဂကောံကဝ်မယှေန်ပေဲါရုဲမာဲကၟိန်ဍုၚ်တံရ။
ဂကောံကဝ်မယှေန်ပေဲါရုဲမာဲကဵု ဂကောံလုပ်ပြိုၚ်လဝ်ပေဲါရုဲမာဲ ညးစၞးဗော် ၃၆ ဗော်တံ ပ္ဍဲဂိတုဂျူလာၚ် ၂၇ ဂှ် ဆဵုဂဗညးသကအ် ပ္ဍဲနဝ်ဗျဳတဝ်တေံတုဲ ပတိုန်ထ္ၜးလဝ်သာ်ဏံရောၚ် ဥက္ကဌ ဗော်ဒဳမဝ်ကရေဇြဳအလုံရးမန် နာဲဇၞူမန် ဟီုရ။
ပ္ဍဲကဵုဗော်မန်တံ ပတိုန်ထ္ၜးလဝ် ၁၀ တၚ်ဂှ်မ္ဂး တုဲကၠုၚ်ပေဲါရုဲစှေ်မာဲတေံ ဗီုကေၚ်ဒှ်ကၠုၚ်လဝ် ကိစ္စမာဲကျဝ်ဒုၚ် ဒစးစုတ်ကဵုလဝ်တံကီု၊ လၟိဟ်ရုၚ်မာဲဟွံရုံဂပ်ကီု၊ စရၚ်မမာဲတံဟွံဍာံပြကီုတံ ပါလုပ်ရောၚ် နာဲဇၞူမန် သောၚ်ကလးကဵုရ။
“ဂွံအခိၚ် ၜိုတ် ၃ မိနေတ်ရတှေ် ၜိုတ်ဇကုစဳရေၚ်လဝ်ဂွံပတိုန်ထ္ၜးဂှ် ဒးဟီုမြက်က်ရ။ အတိုၚ်ပေဲါရုဲမာဲတုဲကၠုၚ်တေံ ဒှ်ကၠုၚ်လဝ် ဟွံမွဲကဵုဗဗွဲဓဝ်တံဂှ် အာဂတပေဲါရုဲမာဲအကြာဏံ ညံၚ်ဟွံဂွံကလေၚ်ဒှ်ပၠန် အဲပတိုန်ထ္ၜးလဝ်ရ” သာ်ဝွံ ညးဟီုရ။
ကဝ်မယှေန်ပေဲါရုဲမာဲတံလေဝ် ညံၚ်ဂွံဒှ်ပေဲါရုဲမာဲသၠးသၠးပွးပွးမာန်ဂှ် ပံၚ်တောဲအာကဵု ဗော်ပရေၚ်ဍုၚ်ကွာန်တံရောၚ် သာ်ဝွံဟီုဂးကဵုလဝ် ညးဆက်ဟီုရ။
ပ္ဍဲပေဲါရုဲမာဲ သၞာံ ၂၀၁၀ ဂိတုနဝ်ဗေန်ပါ ရ တုဲကၠုၚ်တေံဂှ် ပ္ဍဲတွဵုရးဍုၚ်မန် ပွိုၚ်ဍုၚ်လ္ၚဵုမ္ဂး ညးစုတ်မာဲတံ ဒးပတိုန်ကဵုပရောဒဒှ်ဝၚ်ပူဂဵုနွံကီု၊ စၟတ်တဲညးစၞးရုၚ်မာဲ ဟွံပါမွဲသာ် ပတိတ်ကဵုလိက်တၞးမာဲ၊ နကဵုညးတာလျိုၚ်မၚ်ရုၚ်မာဲတံ ခရက်စုတ်ကဵုမာဲဒၞာဲဗော်ကျဖေအ်ကီုတံဂှ် ဒှ်ကၠုၚ်လဝ်ရောၚ် ရဲဒေသတံ ဟီုရ။
အလဵုအသဳ သမတဥူတိၚ်စိၚ် ကလေၚ်ဒက်ပ္တန်လဝ် ဂကောံကဝ်မယှေန်ပေဲါရုဲမာဲဏံ နဒဒှ်ဥက္ကဌဂှ် ဒုတိယဗိုလ်ဇၞော်တြေံ ဥူတေၚ်ဨ၊ ကောန်ဂကောံဂမၠိုၚ်တံဂှ် ဥူမျေအ်နာၚ်၊ ဥူအံၚ်မျေအ်၊ ဒံက်တာဒဝ်မျေအ်ကျဳ၊ ဥူသာဥူ၊ ဥူဨကျူ ကေုာံ ဥူညောအ်တေန်တံ ပါလုပ်ဒၟံၚ်ရ။
ပ္ဍဲပေဲါရုဲမာဲတုဲကၠုၚ်တေံ ဗော်ဒဳမဝ်ကရေဇြဳအလုံရးမန် ဂွံလုပ်ပြိုၚ်မာဲကၠုၚ်စၠတ်ထဝ်တွဵုရးဍုၚ်မန်၊ တွဵုရးဍုၚ်ကရေၚ်ကေုာံ ရးဒေသဇၞော်တနၚ်သဳတံတုဲ ညးစၞးအမာတ် (၃၄) တၠလုပ်ပြိုၚ်လဝ်ဂှ် ၁၆ တၠ ဂွံအာဇၞးမာဲရ။
