ဌာန်ပရိုၚ်ဗၠးၜးမန် – ကမ္မတဳဗဟဵုတြေံ ဗော်ဍုၚ်မန်တၟိ နာဲတာန်တေန် အယုက် ၈၃ သၞာံဝွံ ပ္ဍဲဂိတု အဝ်ဂါတ် (၃) ဏံ စုတိကလိလောန်အာ ပ္ဍဲရုၚ်ဂဥုဲကေၚ်ဗာရာ၊ ဍုၚ်သြဝ်စတေလဳယျာရ။
နာဲတာန်တေန်ဝွံ ပ္ဍဲသၞာံ ၁၉၅၁ ဂှ် စချဳဒရာၚ်ကၠုၚ် သွက်ဗၠးၜးကောန်ဂကူမန်တုဲ လုပ်ကၠုၚ်ပ္ဍဲဗော်ပၠတရဴဍုၚ်မန်ရ။ ဟိုတ်နူညးကေက်သ္ကာကီု သီုကဵုပရေၚ်စန္ဒက်ခိုဟ်ပ္ဍဲဂကောံဂှ်ရ ဒှ်ကၠုၚ် က္ဍိုပ်သ္ကိုပ်သၟတ်မန်တံရ။
ဗီုနာဲတာန်တေန် ကဵုကၠုၚ်ဘာပရေၚ်ဍုၚ်ကွာန်မွဲဒၞာဲ
သၞာံ ၁၉၅၈ ဂှ် ဗော်ပၠတရဴဍုၚ်မန် ပအပ်ထောံလွဟ်ကဵု အလဵုအသဳဥူနုတုဲ နာဲတာန်တေန်ဂှ် ကလေၚ်လုပ်ချဳဒရာၚ် ပ္ဍဲဗွိုၚ်သၞောဝ်ပၠန်ရ။
တုဲပၠန် ပံၚ်တောဲအာကဵု က္ဍိုပ်သ္ကိုပ်သၟာပရေၚ်ဍုၚ်ကွာန်မန် နာဲနလ္လာ၊ နာဲထောန်တိၚ်၊ နာဲၚိုဲတိၚ်တံတုဲ သၟဝ်ပၠတရဴ ဗော်ပၠတရဴဍုၚ်မန် သ္ပအ္စာဘာပရေၚ်ဍုၚ်ကွာန် ပ္ဍဲဍုၚ်မတ်မလီုတုဲ ဗတောန်ပရေၚ်ဍုၚ်ကွာန် ဒဵုကဵု သၞာံ ၁၉၆၂ ရ။
သၟဝ်သၟိၚ်အလဵုအသဳ ဗိုလ်နေဝေန်ဂှ် သွက်ကောန်ဂကူမန်တံ အခေါၚ်အရာမန် ဒှ်ကၠုၚ်ဟွံမာန် ညးစှေ်စိုတ် ပတှေ်ကေတ်တုဲ ပ္ဍဲသၞာံ ၁၉၇၄ ဂှ် နာဲတာၚ်တေန် လုပ်ကၠုၚj ဗော်ဍုၚ်မန်တၟိရ။ လက္ကရဴဏံ ဒးဒုၚ်ရုဲစှ်ကၠုၚ် နဒဒှ်ကမ္မတဳဗဟဵု မွဲတၠရ။
ပ္ဍဲသၞာံ ၁၉၉၅ ဂှ် ဗော်ဍုၚ်မန်တၟိကဵု အလဵုအသဳပၞာန်တံ ဂွံကၠုၚ် ပရေၚ်ဒေံါပန်ပှော်တုဲ နာဲတာန်တေန် ဟွံပတှေ် လ္တူအရေဝ် အလဵုအသဳပၞာန်ဗၟာတုဲ ဒစဵုဒစးပရေၚ်ဒေံါပန်ပှော်တုဲ နုက်တိက်နူဗော်ဍုၚ်မန်တၟိရ။
ပ္ဍဲသၞာံ ၂၀၀၁ ဂှ် နာဲတာန်တေန်ကဵု သ္ၚိကၟိန်ကောန်ဇာတ်ညးတံ သီုဖအိုတ် ဆုဲပြံၚ်အာ ဍုၚ်အဝ်စတေလဳယျာတုဲ ဒှ်ကၠုၚ် နယက ဂကောံမန်အဝ်သတေလိယျ ရ။
နာဲတာန်တေန်ဝွံ လိက်ပရေၚ်ကီု ဒွက်ပရေၚ်ဍုၚ်ကွာန်ဂမၠိုၚ်ကီု နကဵုဘာသာ မန်၊ ဗၟာ ဗွဲမဂၠိုၚ် ချူလဝ်နွံရ။
အခိၚ်ညးစုတိအာဂှ် သမ္ဘာညး အ္စာၝောံမိတေန်ဨ၊ ကောန်ဇာတ်ဂမၠိုၚ် မာံဗညာတေအ်သိုဲ၊ မိနဲနဳသိုဲဝ်၊ နာဲတာန်တောတ် ကေုာံ မာံဝေန်ထောတ်တံ သှ်ၜေက်ဒၟံၚ်ရ။
