ဂျူရဳဆာဲ – ဥက္ကဌ ဂကောံလိက်ပတ်ယေန်သၞာၚ် ဗုဒ္ဓဘာသာ အလုံတွဵုရးဍုၚ်မန် ကျာ်ဇၞော်အ္စာ ဘဒ္ဒန္တဣန္ဒက ပဝ်စဴအာသွဝ်တုဲ စၞးကျာ်ဇၞော်အ္စာဂှ် လၟုဟ်ရုဲပတိုန်ဏာ ဘဒ္ဒန္တကုမာရ ကျာ်ဇၞော်ဘာ ဍုၚ်မုဟ်ဍုၚ် ဂွံတီကေတ်ရ။
“ဒၞာဲကျာ်ဇၞော်အ္စာ ဣန္ဒကဂှ် ကျာ်ဇၞော်အ္စာ ဘဒ္ဒန္တ ကုမာရ ရေၚ်တၠုၚ် ကၠောန်အာ ကမၠောန်မာန်ရောၚ် စှေ်စိုတ်တုဲ ပိုဲတံ ရုဲစှေ်ပတိုန်ဏာရ” သာ်ဝွံ ဥက္ကဌဂကောံလိက်ပတ်ယေန်သၞာၚ် (ဗဟဵု) အ္စာသဝ်ဟံၚ်ဍုၚ် ဟီုလဴကဵုရ။
ပ္ဍဲဂိတုခ္ဍဲသဳ ၁ မံက်၊ ဂျူလိုၚ် ၃၁ လောန်ကၠုၚ်တုဲကၠုၚ်တေံ ကၠောန်ဗဒှ် အခန်ကၞာ ရုဲစှ်ပတိုန် ဥက္ကဌလိက်ပတ်ယေန်သၞာၚ်ဗုဒ္ဓဘာသာဂှ် ပ္ဍဲဘာလွဳမာန်ထဝ် ကွာန်ကၟာဝက်ရ။
ပ္ဍဲအခန်ကၞာဏံဝွံ ကျာ်ဇၞော်အ္စာ နူကဵု ပွိုၚ်တိုက်ဍုၚ်မုဟ်ဍုၚ် ၁၁ တိုက်ဂှ် ကျာ်ဇၞော်အ္စာ ၁၁ ဇကုကဵု ဂကောံကော်မတဳလိက်ပတ်ယေန်သၞာၚ်မန်တံ တိုန်စိုပ်ရ။
ဥက္ကဌတြေံ ဂကောံလိက်ပတ်ယေန်သၞာၚ် ဗုဒ္ဓဘာသာ အလုံတွဵုရးဍုၚ်မန် ကျာ်ဇၞော်အ္စာ ဘဒ္ဒန္တ ဣန္ဒကဝွံ လောန်ကၠုၚ် ပ္ဍဲဂိတု ဇှေ် ၁၄ မံက်၊ ဂျောန် ၁၅ ဂှ် စုတိစဴအာသွဝ် နကဵုယဲကေန်သာ ပ္ဍဲဘာလွဳမာန်ထဝ် ကွာန်ကၟာဝက်ရ။
ကျာ်ဇၞော်အ္စာဣန္ဒကဝွံ ကၠာဟွံဂွံစဴသွဝ်ဂှ် ကေတ်ကၠုၚ်တာလျိုၚ် ဥက္ကဌ ဂကောံဗ္တောန်လိက်ပတ် ဥတုကညၚ် အလုံဒေသရးမန် ပွိုၚ် ၂ သၞာံပေၚ်ၚ်ရ။
ပ္ဍဲသၞာံတုဲကၠုၚ်ဏံ ကျာ်ဇၞော်အ္စာ ဘဒ္ဒန္တ ကုမာရ ရေၚ်တၠုၚ်ကၠုၚ် နဒဒှ်ဖက်ဆောညးအုပ်ကာ ဂကောံလိက်ပတ်ယေန်သၞာၚ်ဗုဒ္ဓဘာသာ ပွိုၚ်ဍုၚ်မုဟ်ဍုၚ်ရ။
ဂကောံဗ္တောန်လိက်ပတ်ဥတုကညၚ် အလုံဒေသရးမန်ဂှ် အခိၚ်ဘာအလဵုအသဳကၟာတ်ဘာကညၚ်မ္ဂး သွက်ကောန်ကွးဘာတံ သ္ဂောံလေပ်လိခ်မန်မာန် သၚ်ခၟဳမန်ဇၟာပ်ဘာလကျာ်တံ ကေတ်တာလျိုၚ်တုဲ ဗ္တောန်ကဵုဒၟံၚ်လိခ်မန်ဇၟာပ်ပ်သၞာံရ။