သ္ၚိအ္စာသဝ်မွဲတၠ ပ္ဍဲကဵုအရာပ် (သရက်ကုန်း)၊ တဳရိမျာင်၊ ဍုင်မတ်မလီု၊ တွဵုရးဍုင်မန်ဂှ် ဒးဒုင်ကၠတ်ဖံက်တုဲ ကပေါတ်ကယျိုင်ကယျဝ်ထဝ် ကေုာံ သြန် ပံင်ဖအိုတ် ကိုဋ် (၁၁၆၀) ဒကေဝ်ပြင် ပါအာလဝ်ရောင် ဂွံတီကေတ် နူညးအရာပ်တံရ။
သ္ၚိအ္စာသဝ် ဒံက်တာနေဠေန်အံင် မပံက်လဝ်ခဒမ်ဂဥုဲ နယၟု “လှိုင်လင်း” ဂတမုက်ဘာတိုက် (မှော်ရုံ) ၊ အရာပ် (သရက်ကုန်း)၊ တိဍာ်တဳရိမျာင်ဂှ် ပ္ဍဲဂိတုနဝ်ဝေမ်ဗာ စၟတ်တ္ၚဲ (၈) တုဲကၠုင်ဏံ ဒးဒုင်ကၠတ်ဖံက်လဝ်ရ။
ဒံက်တာနေဠေန်အံင်ကဵု သမ္ဘာညးဝွံ အခိင် (၈) နာဍဳဗ္တံ၊ တၟာတ်ခဒမ်ဂဥုဲတုဲ က္လေင်စဴကၠုင်သ္ၚိဂှ် ဂွံဆဵုတေက် ပါင်တြင်လက္ကရဴသ္ၚိပံက်ဒၟံင်တုဲ ကာလလုပ်ရံင် အပ္ဍဲခန်ဒၞာဲသတိက်ပ္ဍဲသ္ၚိဂှ် ဂွံတီကေတ် ဒးဒုင်ကၠတ်ဖံက်လဝ်ရောင် ဂးရ။
“သ္ၚိ (အ္စာသဝ်) ဂှ်တှ်ေ နွံမံင်လ္ပာ်ပလိုတ်(လက္ကရဴ)ဂၠံင် ခဒမ်ဂဥုဲရ။ လၟုဟ်ဏံ သ္ၚိအ္စာသဝ် ဒးဒုင်ကၠတ်ဖံက်ရ” သာ်ဝွံ ညးတန်တဴပ္ဍဲအရာပ်ဂှ်မွဲတၠ ဟီုရ။
ဟိုတ်နူဒးဒုင်ကၠတ်ဖံက်လဝ်ဂှ်တုဲ ကပေါတ်ထဝ်မၞိက်ရတ် ကေုာံ သြန် ၚုဟ်မးသီုဖအိုတ် ကိုဋ် (၁၁၆၀) ဒကေဝ်ပြင် ကၠေံဒၟံင်ရောင် ဂွံတီကေတ် နူညးစုက်လုက်ကဵု ဂကောံဒပ်ဂီုကၠီုတံရ။
ဆေင်စပ်ကဵုပရူဒဒှ်ဂှ်တုဲ ညးဖံက်သ္ၚိ ကၠတ်ကေတ်ဏာလဝ် ကပေါတ်ထဝ်မၞိက်ရတ် ကေုာံ သြန်ဂမၠိုင်ဂှ် ပံက်အမှု ကေတ်လဝ်အရေဝ် နကဵုၝောံပိုဒ် (၃၈၀) ၊ ပ္ဍဲဗဒိုပ်ဗၠာဲသၟိင်မုပေါန်ရ။
ညးတာလျိုင်မဆေင်စပ်တံလေဝ် သွက်သ္ဂောံရပ်စပ်ဂွံ ညးဖံက်သ္ၚိတုဲ ကၠတ်ကေတ်ဏာ ကပေါတ်ထဝ်မၞိက်ရတ် ကေုာံ သြန်ဂမၠိုင်ဂှ် ကၠောန်သ္ပရေင်တၠုင်မံင်ရောင် ဂွံတီကေတ်ရ။
ဂိတုအဝ်ဂေတ် စၟတ်တ္ၚဲ (၂၈) တုဲကၠုင်တေံလေဝ် ပ္ဍဲကဵုဆေင်သွံကပေါတ်ဓာတ်လလဳ “ကိုဝ်ကိုဝ်ညဳညဳ” ဂၠံင်ဇိုင်ၜဳ၊ အရာပ် (မရမ်းကုန်း)၊ ဍုင်မတ်မလီုဂှ် မၞိဟ် (၃) တၠ မရပ်လဝ်လွဟ်ဂၠေံ ဂြောပ်လဝ်မုက်အရံင်ဗ္စံက်တံ လုပ်ဗ္တိုက်ဏာလဝ်ဏီရ။