ဒပ်ကင်ပၞာန်ဗၟာ မဖျေံလဝ်သဇိုင် ပ္ဍဲပွိုင်ဍုင်ကျာ်မြဟ် ဒေသကွာန်လ္ၚဵုဂှ် ကေတ်လဝ်ဒၞာဲ အကြာသ္ၚိညးဍုင်ကွာန်တအ်တုဲ ညးဍုင်ကွာန်တၠသ္ၚိတအ် ဟွံဂံင်ဒၟံင်တုဲ ဒးပါဲတိတ်အာနူသ္ၚိနွံရောင် ညးဒေသမွဲတၠ ဟီုလဴထ္ၜးရ။
ပ္ဍဲပွိုင်ဍုင်ကျာ်မြဟ် မွဲဒမြိပ်ကွာန်ဆုကၠအ်ဂှ် ဒပ်ပၞာန်ဗၟာတအ် ဖျေံလဝ်ဒပ်ကင်အကြာဂၠံင်ဇၞော်ဂှ် မင်ကေတ်လဝ်ဒၞာဲ အကြာပ္ဍဲသ္ၚိညးဍုင်ကွာန်တအ် သ္ပလဝ်ဒၞန်ကဵု ညးဍုင်ကွာန်တအ်ဂှ်ရ ညးဍုင်ကွာန်တအ် ဟွံဂံင်ဒၟံင်ပ္ဍဲသ္ၚိတုဲ ဒးပါဲတိတ်အာ နူကဵုသ္ၚိတအ်နွံ နာဲမိုင်ယုင် (ဗလေတ်လဝ်ယၟု) ဂှ် ဟီုထ္ၜးသာ်ဝွံရ။
“ဒပ်ကင်ဍေံနွံမံင်ဖိုဟ်ရ ဍေံၜံက်လဝ်မြံင် သိုင်လဝ်တာဲ ဗဒိုပ်ဍေံနွံမံင်ချိုတ်ပၠိုတ်ကီုရ၊ ဆဂး ဍေံဟွံမံင်ပ္ဍဲဒပ်ကင်ဍေံပုဟ် ကရပ်ဒပ်ကင်ဍေံဂှ် သ္ၚိဇိုင်ဇိုင်စဂှ်နွံမံင်၊ ဍေံတိုန်မံင်ဒၟံင်လ္တူသ္ၚိတအ် ဂတမုက်သ္ၚိတအ် ဍေံတိုန်မံင်ဒၟံင်၊ ရဲတၠသ္ၚိစဂှ်တှ်ေ ပၞာန်ဗၟာတိုန်မံင်ဒၟံင် ပ္ဍဲသ္ၚိဇကုတှ်ေ ဖေက်၊ ဟွံဂံင်မံင်ပ္ဍဲသ္ၚိ ပါဲပြံင်တိတ်အာနူသ္ၚိ နွံမံင်” ညးဟီုရ။
အံက်တိုဝ်ဗာ (၃၁) တုဲကၠုင်ဂှ် ဂကောံဒပ်ကင် ဖျေံလဝ်သဇိုင်ပ္ဍဲကဵု ကွာန်ဆုကၠတအ်မွဲဂကောံဂှ် အခိင်နူဂယးပြဟ် အဃောဖျေံဒၟံင်ဗီု ဒပ်ကင်လ္တူဂၠံင်ဇၞော်ဂှ် ဒပ်ရာမညတအ် လုပ်ပန်ဗတိုက်တုဲ သီုၜါလ္ပာ်ဂှ် ဒးအာနွံရ။
ပေါဲဗတိုက်က္တဵုဒှ်တုဲဂှ် ညးဍုင်ကွာန်တအ် အာတရဴလ္တူဂၠံင်ဇၞော်ဂှ် ပရေင်စၟဳစၟတ်ဂၠိုင်တိုန်တုဲ အကြာဒပ်ကင်မွဲဒမြိပ်ဂၠံင်ဇၞော် ကွာန်ဆုကၠကဵု ဍုင်မုဟ်ဍုင်မွဲဒမြိပ်ဂှ်လေဝ် ဒပ်ပၞာန်ဗၟာတအ် ဖျေံလဝ်ကင်ဂၠိုင်ကဵုဒၞာဲနွံမံင်ရ။
“ဒပ်ကင်ဍေံ (ပၞာန်ဗၟာ) တြေံတေံလေဝ် နွံမံင်ရရလေဝ်နွံ၊ ဒပ်ဍေံပံက်လဝ်တၟိ ခြာဟွံလအ်ဏံလေဝ်နွံမံင်၊ ပ္ဍဲဒပ်ဍေံဂှ် မၞိဟ်ဍေံတြေံတေံ နွံမံင်ကီုရ၊ ဆဂးတှ်ေ တ္ၚဲတၟးတိုန်တှ်ေ ပၞာန်ဍေံ (ပၞာန်ဗၟာ) ကၠုင်ဗပေင်ဒၟံင်ဒြဟတ် ပ္ဍဲဒပ်ကင်ဍေံနွံမံင်အရိုဟ် တ္ၚဲဏောင်၊ အဵုဇှ်တှ်ေ ပ္ဍဲဒပ်ကင်ဍေံဂှ် မၞိဟ်ၜိုတ်လဵု ဟွံမွဲစကွေံကွေံပုဟ်၊ အကြာသ္ၚိစဂှ်ဏောင် ဍေံကၠတ်မံင်ဒၟံင် ရံင်ဟဏံတှ်ေ ဟွံတီပုဟ်၊ လဆောဝ်တှ်ေ မံင်ဒၟံင်လ္တူသ္ၚိ၊ လဆောဝ်တှ်ေ ဍေံကေတ်လဝ်ဒၞာဲဂတမုက်သ္ၚိ၊ အဵုဗီုဂှ်တှ်ေ ရဲသ္ၚိစဂှ် အလဵုဂွံဂံင်မံင်မံင်ဏီ ဒးပါဲရနွံ” သာ်ဝွံ တၠကွဳစက်လာင် မုဟ်ဍုင်ကဵု ၜါသွာင်မွဲတၠပၠန်ဂှ် ထပ်ဟီုထ္ၜးရ။
ဒပ်ကင် လ္တူဂၠံင်ဇၞော်ကွာန်ဆုကၠကဵု ဍုင်မုဟ်ဍုင်ဂှ် ကွဳစက်ဇက်ဖ္ဍိုက်ကပေါတ် နူကဵု ပယျဵုကျာ်ပိ၊ ဂၠံင်ကွာန်ခၠဵုတဂေါန်တိုင်တအ် ဂြိပ်တတ်ကၠောံဒၟံင် မွဲမွဲတ္ၚဲ လၟိဟ်ကဵုစှော်ဖ္ဍိုက်တုဲ သွက်ဂွံစၟဳစၟတ်ဗက်အကံက် ကုကွဳစက်ဇက်ဖ္ဍိုက် ကပေါတ်တအ်ဂှ် ဒပ်ပၞာန်ဗၟာတအ် ထပ်ဖျေံကၠုင်ဒပ်ကင်တၟိနွံရ။