အပ္ဍဲဒေသၜဳဂြာင် အဆက်စပ်မန်-ကရေင် ဒၞာဲကမ္မယှေန်ပၞာန်ဖျေံဒပ်ဂှ်ဝွံ ဟိုတ်နူဂကောံဒပ်ပၠန်ဂတးဂမၠိုင် ပန်ဗ္တိုက်ကဵု လွဟ်ဇၞော် ကေုာံ စက်ဗရုသာဲ မွဲနှေံမွဲနှေံဂှ်ရ ညးဒေသတံ ဒှ်မံင်ဂဝိင်ကဵု ပရေင်ဂီုကၠီုရောင် ဂးရ။
အပ္ဍဲဂိတုအံက်တဝ်ဗာတုဲကၠုင်တေံဝွံ ပ္ဍဲကွာန်သင်ကၠံကဵု ခယျးဂှ် ဒးဒုင်ဗ္တိုက်ကဵု စက်ဗရုသာဲတုဲ ဂိတုနဝ်ဝေမ်ဗာ စၟတ်တ္ၚဲ (၆) တုဲကၠုင်ဏံလေဝ် ဒပ်မန်ရာမည (RMA) ထပ်ဗ္တိုက် ဒၞာဲကမ္မယှေန်ပၞာန်ဖျေံလဝ်ဒပ် (၃) ဒၞာဲ ပ္ဍဲကွာန်ဓမ္မသ၊ သင်ကၠံ ကေုာံ ကအ်ဗိန်ဂှ် နကဵုစက်ဗရုသာဲရောင် ဂွံတီကေတ်ရ။
ဟိုတ်နူဒးဒုင်ဗ္တိုက်တုဲ လ္ပာ်ဒပ်ကမ္မယှေန်ပၞာန်တံ သၟာင်နူဟွံဒးဘဲဝပ်ချိုတ်ဂျိုင်ဂှ်မ္ဂး ဖျေံဒပ်မံင်တန်တဴဒၟံင် ပ္ဍဲဘာလကျာ်ကဵု သ္ၚိဒၟံင်ဂမၠိုင် ဗီုတြေံရဂှ်လေဝ် ညးဒေသကျာ်မြဟ်မွဲတၠ ဟီုရ။
“အကြာတဏံ ဒရုင်တံ စှ်ေမံင်မွဲနှေံမွဲနှေံ ဂွံမိင်ရ။ ဆဂး လ္ပာ်လဵုရောဟီုဂှ် ဟွံတီချိုတ်ပၠိုတ်ပုဟ်။ နူတနေံဏံ တက်ကျာကဵုဖုင်မှ ဂွံတီချိုတ်ပၠိုတ်ရ။ မၞိဟ်တံ ဟွံဒးဘဲဇီုကပိုက်ပုဟ်။ ဆဂး သ္ၚိဒၟံင် ညးဒေသတံဂှ်တှ်ေ ဗီုကဵုလီုလာ်အာနွံရ” သာ်ဝွံ ညးဟီုရ။
ဗွဲကြဴနူကွာန်ဓမ္မသဒးဒုင်စံင်ပလီု သၞာံ (၂၀၂၄) တုဲဂှ် ဒေသၜဳဂြာင်ဝွံ ကတဵုဒှ်ပေဲါဗ္တိုက်ကြပ်ဟွံမွဲ (အောန်) ဒၟံင်ကီုလေဝ် ပ္ဍဲကဵုဗလးတိဂှ် လ္ပာ်ဒပ်ကမ္မယှေန်ပၞာန်တံ ပန်ကဵုလွဟ်ဇၞော်၊ ထံက်ကင်ကဵုက္ၜင်ကျာနွံတုဲ လ္ပာ်ဂကောံဒပ်ပၠန်ဂတးတံလေဝ် ပန်ဗ္တိုက်မံင်ကဵု စက်ဗရုသာဲ အဆက်ဆက်နွံရ။
ဟိုတ်နူအကာဲအရာဂှ်ရ ဒးဒှ်မံင်ဂဝိင်ကဵု ပရေင်ဂီုကၠီု ညးဒေသတံတုဲ သ္ၚိဒၟံင်လီုလာ်ဆောံလေင်ကီု ညးဒေသဒးဘဲဝပ်ကီု နွံမံင်ရဂှ်လေဝ် ညးဒေသကရေင်မွဲတၠ ဟီုရ။
“မၞိဟ်လ္ပာ်ဏံဂှ် မံင်စှ်ေအာအခိုက် ဍာံကီုလေဝ် ဆဠဆဠ က္လေင်ဒှ်ကၠုင်တှ်ေ ဖေက်မံင်ကီုရ၊ ဒးအာသ္ၚိတှ်ေလေဝ် လီု ဒးပလေဝ်၊ ကဵုၚုဟ်ခေတ်လၟုဟ်ဏံတှ်ေ အိုတ်ဟွံအောန်ပုဟ်။ ဒးမၞိဟ်တှ်ေလေဝ် ဒှ်အာမွဲမွဲသာ်ဟာ ဒးဂဝိင်မံင်” သာ်ဝွံ ညးဟီုရ။
တုပ်သာ်ဝွံကီု နူဒပ်မန်ရာမည (RMA) လေဝ် ဂိတုနဝ်ဝေမ်ဗာ စၟတ်တ္ၚဲ (၆) တုဲကၠုင်ဏံ လုပ်စိုပ်ဗ္တိုက်လဝ် ဒၞာဲကမ္မယှေန်ပၞာန်ဖျေံလဝ်ဒပ် (၃) ဒၞာဲ ပ္ဍဲကွာန်ဓမ္မသ၊ သင်ကၠံ၊ ကအ်ဗိန် နွံရဂှ် လလောင်ပ္တိတ်လဝ်ရ။
သၟာင်နူဒးဒုင်ပန်ကဵုလွဟ်ဇၞော် ကေုာံ စက်ဗရုသာဲမ္ဂး ဟိုတ်နူပေဲါဗ္တိုက်ကအ်ကြိက်ကဵု လှာဒကှ်ဂှ်ရ အပ္ဍဲဒေသအဆက်စပ်ပယျဵုမန်-ကရေင်ဂှ် ဂလိုင်လဝ်ဇြဟတ်ပၞာန်၊ လုပ်စိုပ်ဖျေံဒပ် ပ္ဍဲကွာန်ဂမၠိုင်၊ ရပ်စၟဳစၟတ်ကောန်ကွာန်ဂမၠိုင်တုဲ ပလံင်ဗ္စိုပ်ဏာ ဇရေင်တန်ဗ္တောန်ယိုက်ဂၠေင်ပၞာန် ဗွဲအဓမ္မနွံရောင် ဂွံတီကေတ် နူတင်နင်စၟတ်သမ္တီ ညးမင်မွဲရံင်စံင်အခေါင်အရာမၞိဟ် အပ္ဍဲဒေသတံရ။