ဌာန်ပရိုၚ်ဗၠးၜးမန် – နကဵုစၟတ်တ္ၚဲ ဂိတုအဝ်ဂေတ် ၈ လောန်ကၠုၚ်ဏံ ညးစၞးစၠတ်ထဝ် ၂၃ တၠတံ အပ္ဍဲချူပစိုပ်လဝ်လိက်ပံက်ထာၚ်မွဲတၞးဂှ် “ပရေၚ်ကမၠောန် ၜိုဟ်လလောံအလုံဍုၚ် ဟွံဂွံအံၚ်ဇၞးကၠုၚ်ဂှ် ဟိုတ်နူကဵုဂကောံရပ်လွဟ်တံရောၚ်” ချူလဝ်ဂှ် ဗျိလဝ်မွဲလပါ်ဒှ်တုဲ ဟၟဲဗဗွဲဓဝ်ရောၚ် ဥက္ကဌဗော်ဒဳမဝ်ကရေဇြဳအလုံရးမန် နာဲဇၞူမန် ဟီုရ။
ဗီုညးစၞးစၠတ်ထဝ်တံထပက်လဝ်စၟတ်တဲ ပ္ဍဲလိခ်ပံက်ထာၚ်
လိက်ပရိုၚ်အလဵုအသဳတံ ထမ္က်ပတိတ်လဝ် ပ္ဍဲဂိတုအဝ်ဂါတ် ၉ ဏံ အပ္ဍဲလိက်ပံက်ထာၚ်မွဲတၞးဂှ်မ္ဂး ပရေၚ်ၜိုဟ်လလောံဟွံအံၚ်ဇၞးမွဲသာ် ဒေါအ်ပန်ပှော်ကလေၚ်လီုလာ်အာတံဂှ် ဒၟာနူကဵုတၚ်ဍိုန်လျ ဂကောံရပ်လွဟ်တံရောၚ် ချူထမံက်လဝ်ရ။
“ဣဏံဂှ် ဟီုလဝ်သွက်မွဲလပါ်ဓဝ်ရဏောဝ်၊ နကဵုဗော်မန်ပိုဲတှေ် အတိုၚ်ဗော်ကောဒေံပိုဲ ၅ ဗော်ပတိတ်လဝ် လိက်လလောၚ်တြးဂှ်ရ ပၟတ်ပၞာန်ပ္ဍဲဍုၚ်ကီု၊ မ္ၚးဍုၚ်ကီု ညံၚ်ဂွံၜိုဟ်သြိုဟ်အာမာန်ဂှ် အလဵုအသဳတိုန်တၟိတံ ဒးကၠောန်အာ ချိုတ်တ်ပၠိုတ်တ်ဏောဝ်” သာ်ဝွံ ဟီုရ။
သွက်ၜိုဟ်လလောံအလုံဍုၚ်မွဲဂှ် အလဵုအသဳတၟိကဵု ညးဍုၚ်ကွာန်တံ ကၠောန်ၜိုတ်ရၚ်တၠုၚ်အာမံၚ်ကီုလေဝ် မွဲလပါ်တေံဂှ် ပရေၚ်သံသယဂၠိုၚ်ကီု၊ စိုပ်အာတၞုၚ်တၞးမွဲလပါ်ကီု၊ ပယောဂမ္ၚးတံ လုပ်ဇီုကပါ်ဂၠိုၚ်ကီု၊ ဂတိပါၚ်လီုလာ်ကီု၊ ပရေၚ်ပကမ်ပရိုက်ကြာန်န်တံဂၠိုၚ်မံၚ်ကီုဂှ်ရ ပရေၚ်သဳကၠဳ သွက်ဓဝ်ၜိုဟ်လလောံဂှ် သ္ဒးလီုအာရ သာ်ဝွံချူလဝ်ပ္ဍဲလိက်ပံက်ထာၚ်ဂှ်ရ။
ညးစၞးစၠတ်ထဝ် ၂၃ တၠတံ ထပက်လဝ်စၟတ်တဲ ပ္ဍဲလိက်ပံက်ထာၚ်ဂှ်တုဲ ရဲညးစၞးစၠတ်ထဝ်တွဵုရးဂှ် ၂၀ တၠ၊ ရဲညးစၞးစၠတ်ထဝ်ကောန်ဂကူဂှ် ၃ တၠ ပါလုပ်ရ။
အပ္ဍဲလိခ်ပံက်ထာၚ်တမ်မူလ နူဌာန်ပရိုၚ်ဗၠးၜးမန်ဂွံဒုၚ်ကေတ်လဝ်တဲ ညးတံထပက်လဝ်စၟတ်တဲဂှ် “ရန်စၞောန်လဝ်ကဵု ဒဝ်အံၚ်သာန်သုကျဳ”သာ်ဝွံချူလဝ်နွံကၠုၚ်ကီုလေဝ် အပ္ဍဲလိခ်ပရိုၚ်အလဵုအသဳဂှ် ကလေၚ်နုက်ပတိတ်လဝ်ရ။
ညးစၞးစၠတ်ထဝ်တံဂှ် ဒုၚ်လဝ်ယၟု နကဵုညးစၞးညးဍုၚ်ကွာန်၊ ညးစၞးကောန်ဂကူတံတုဲ ချူပ္ညုၚ်လဝ်ကဵု “သွက်ညးနွံပၟိက်ကဵု ပရေၚ်ဓဝ်ၜိုဟ်လလောံ” သာ်ဝွံ ဂွံဆဵုကေတ်ရ။
ညးစၞးစၠတ်ထဝ် ၂၃ တၠတံဂှ် နကဵုလညာတ်ဗော်ညးတံဟွံသေၚ် နကဵုလညာတ်ပုဂ္ဂိုလ်ညးတံဟေၚ် ထပက်လဝ်စၟတ်တဲရောၚ် က္ဍိုပ်သ္ကိုပ်ဗော်လ္ၚဵုတံ ဟီုရ။
“နကဵုဗော်ပိုဲဂှ် မိမျေအ်တာန် ပါမံၚ်၊ ထပက်လဝ်စၟတ်တဲဂှ် နကဵုဗော်ပိုဲဟွံသေၚ်ပုဟ်၊ ဍေံထပက်လဝ်စၟတ်တဲ နကဵုညးစၞးစၠတ်ထဝ်ညးဍုၚ်ကွာန်မွဲတၠရဏောဝ်၊ ဟွံဆေၚ်ပုဟ်ကဵုဗော်ပိုဲပုဟ်” သာ်ဝွံ နာဲဇၞူမန် ဟီုရ။
ဟိုတ်နူပဋိပက္ခပၞာန်အပ္ဍဲဍုၚ်က္တဵုဒှ်ကၠုၚ် ကာလဂၠိၚ်သ္ၚောဲကၠုၚ်တုဲ ပရေၚ်ဖေါအ်ဗြဳတဴတက်ဍုၚ်ဗၟာ သဝ်စှေ်မံၚ်ရောၚ် သာ်ဝွံပ္ဍဲလိခ်ပံက်ထာၚ်ဂှ် ချူလဝ်ကီုရ။
